Höraqa eunücu palabrataqa Biblia utilisan kapashqa nunakunapaq parlarmi. Unë witsanqa wakin nunakunatam kapayaq castigarnin o esclävu kayänampaq tsarirnimpis. Tsë eunücukuna markäkïpaq kayaptinqa, reykunapa warminkunata cuidayänampaqmi churayaq. Tantiyarinapaq, Hegai y Saasgaz nunakunaqa rey Asuërupa warminkunatam cuidayaq (Ester 2:3, 14).

Tsënö karpis, manam Bibliachö parlanqan llapan enücukunatsu kapashqa kayarqan. Wakin yachaq nunakunam niyan, jina tsë palabrataqa utilisäyaq reykunapa palaciunchö trabajaqkunapaq parlarnin. Jeremïaspa amïgun Ëbed-mëlecpis itsa tsënö trabajaq karqan y Felïpi parlapanqan Etiopïa gobiernupaq trabajaq nunapis itsa tsënö karqan. Ëbed-mëlecqa autoridäyoq y precisaq nunachi karqan, porqui rey Sedequïaspa mas markäkïpaq sirweqninmi karqan (Jeremïas 38:7, 8). Diosta adoranampaq Jerusalenman ëwaq Etiopïa gobiernupaq trabajaq nunaqa, reypa tesorërunmi karqan (Hëchus 8:27).

Shamoq tiempuchö juiciupaq parlarmi, Jesus kënö nirqan: ‘Nunapa Tsurin alläpa reqishqa këninwan chämurmi, [...] nunakunata rakinqa, juk mitsikoq cabrakunapita üshakunata rakeqnö’ (Mateu 25:31, 32, NM). Kë igualatsikïqa unë mitsikoqkunapa costumbrinkunapitam karqan, pëkunam üshankunapita cabrakunata rakiyaq. ¿Imanirtaq tsëta rurayaq?

Junaqpaqa üshakuna cabrakunawanmi juntu kayaq, peru ampipaqa (paqaspaqa) alalëpita, suwapita y juk animalkuna mana mikuyänampaqmi corralninkunaman qëkuyaq (Genesis 30:32, 33; 31:38-40). Jinamampis üshakunatam cabrakunapita juk corralman rakiyaq cuidayänanrëkur, peru masqa wawayoq üshankunatam, porqui cabrakunaqa mas maqakoqmi kayaq. Juk librupis kënömi nin: “Lichinta qapiyänampaq, millwanta rutuyänampaq y orquwan juntayänampaqmi” rakiyaq. Judïukunata yachatsinampaqqa Jesusqa igualatsikïninchö utilisarqan juk reqishqa costumbrinkunatam, cäsi llapanmi chakrachö masqa täräyaq.