“Jehovä Diosqa nunatam churarqan shumaq Eden huertaman, tsëchö murunampaq y cuidanampaq. Jina kënö nirmi Jehovä Dios nunata mandarqan: ‘Huertachö llapan plantakuna wayunqantam mikïta puëdinki, pachëki juntanqanyaq. Peru tsë alli kaqta y mana alli kaqta musyatsikoq plantapitaqa, manam mikunëkitsu, tsëta mikurqa, mikunqëki junaqmi wanunki’.” (Genesis 2:15-17.)

Eden huertamanmi Jehoväqa, Adanta churarqan, tsë sitiuqa shumaqmi karqan, mëtsika animalyoq y plantakunayoq. Adanqa mëtsika frütayoq plantakunapa chöpinchömi kawarqan y mëqantapis mikïta puëdirqanmi, peru jukllëllatam manaqa, Jehovämi tsëta mana mikunampaq nirqan. Mana cäsukurqa wanunampaq kaqtam Diosqa nirqan.

¿Imatataq Adan tsëpita entiendirqan? Pëqa musyarqanmi wanï ima kanqanta, porqui animalkuna wanoqtam rikarqan. Animalkunanö kamashqa kaptinqa, manachi imapaqpis sirwinmantsu karqan Dios mandanqan, porqui wanïllamanchi chanman karqan. Adanqa entiendirqanmi Diosta cäsukur y tsë plantapa frütanta mana mikurqa imëyaqpis kawakunampaq kaqta.

Wakinkunaqa pensayan tsë plantaqa ollquwan warmi pununakuyanqampaq rikätsikunqantam, peru pantashqam këkäyan, porqui Adantawan Ëvataqa Jehovämi kënö nirqan: “Wamrëkikuna katsun y atskaqyäyë y patsa juntanqanyaq mirayë y dominayë” (Genesis 1:28). Juk rasumpa plantapaqmi parlëkarqan: “Alli kaqta y mana alli kaqta musyatsikoq planta” nirmi Jehoväqa qayarqan, porqui tsëqa rikätsikoq nunakunapaq ima alli o mana alli kanqanta pëlla nita puëdinqantam. Tsë plantapa frütanta Adan mana mikurqa, wiyakoq kanqanllatatsu manam rikätsikunman karqan, sinöqa llapan qonqampita Kamakoqninta agradecïdu këkanqantawanmi.

Diosmi Adanta kënö nirqan: “Mana mikunëkipaq mandanqaq plantapa frütantam mikurqunki”. Tsëmi, ‘allpaman tikranqëkiyaq sudornikita ramar-raq mikunki, tsëpita rurashqa karnin. Porqui allpapitam kanki y allpamanmi tikranki’ (Genesis 3:17, 19).

Adanqa Dios michanqan frütatam mikurqan, Diosqa manam ichikllapaqtsu tsëta churarqan, porqui contranmi churakëkarqan, llapan qonqampita Jehoväta mana agradecikunqantam rikätsikïkarqan. Tsë michanqan frütata mikurmi Jehoväta mana wiyakunqanta y kikinlla imatapis akrakïta munanqanta rikätsikurqan, y tsëqa mana allimanmi chätsinman karqan.

Jehovä ninqannömi, tiempuwanqa Adan wanurqan. Diosqa allpapitam Adanta rurashqa karqan y ninqannömi allpaman kutirqan, y manam juk läduchö kawartsu sïguirqan (Genesis 2:7; Eclesiastes 9:5, 10).

“Adanmi jutsata rurecorqan, y tsenopam jutsa rure qallecorqan. Tserecurmi wani shamorqan. Tsemi que munducho llapan nunacuna jutsata rurarnin, wanuyan.” (Romänus 5:12.)

Adan mana wiyakur jutsallakunqanqa alläpa mana allimanmi chätsirqan. Kawënintam oqrarqan, peru manam noqantsiknö 70 o 80 wata kawëllatatsu, sinöqa mana wanushpa kawakïtam. Jinamampis jutsayoqmi tikrarirqan, tsëmi llapan tsurinkunapis jutsayoqna yuriyan.

Adanpa kastan karmi jutsayoqllana yurintsik, tsë ninqanqa jutsa ruraqllam kantsik y tiempuwanqa wanuntsik. Tsënö kanqantam Pablu kënö qellqarqan: “Noqanam mana allicuna rureta munapar jutsapa esclabun cuenta caquicä. ¡Ay, noqalla! ¿Imanoraq calläshaq! ¿Pillaraq libreconqa condenasionpita [wanïpita, NM] jutsasapa etsalläta!”. Kikinmi kënö nirqan: “Peru ¡grasias Diosta! ¡Pemi Jesucristurecur cananqa librecamashqa!” (Romänus 7:14, 24, 25).

‘Jinantincho nunacunata salbananpaqmi Dios tsurinta cachamushqa.’ (1 Juan 4:14.)

Jutsapita y wanïpita libramänapaqqa Jehovä juk precisaqtam rurarqan. Kuyë Tsurintam Patsaman kachamurqan Adannö jutsannaq yurinampaq. Peru Jesusqa “ni ima jutsatapis manam rurarqantsu” (1 Pëdru 2:22). Tsëmi wanunampaqqa condenashqatsu karqan y mana wanushpa kawakïtam puëdinman karqan.

Tsënö kaptimpis, Jehoväqa permitirqan chikeqninkuna Tsurinta wanutsiyänantam y kima junaq pasarinqanllachömi kawaritsimurqan. Jesusqa juk espïritunönam kawarimurqan y ichik tiempullachömi ciëluta kutikurqan. Tsëchömi kawënimpa valorninta presentarqan Teytanta, y tsë kawënintaqa Adanpa kastankunata salvanampaqmi entregashqa karqan. Jehoväqa Tsurimpa sacrificiuntam chaskirqan, tsëmi yanapakushqa Jesusman llapan markäkoqkuna mana wanushpa kawakïta chaskiyänampaq (Romänus 3:23, 24; 1 Juan 2:2).

Awmi, Jesusqa Adan jutsata ruranqampitam libramarquntsik. Pëqa wanurqan mana wanushpa kawakïta puëdinapaqmi. Bibliam kënö nin: “Diosmi alli queninrecur permiterqan noqantsiccunarecur [Jesus] tseno wanunanpaq” (Hebrëus 2:9).

Këqa Jehovä imanö kanqantam rikätsikun. Jutsarëkurmi nunakunaqa puëdiyanmantsu karqan jutsapita pagakïta, salvakunapaq Dios mandakunqannö. Peru wanïpita libramänapaqqa Dios pagakunan karqan Tsurimpa kawëninwanmi (Romänus 5:6-8).

‘Jesucristoqa llapanpa puntantam cawarimushqa. Tsemi creyintsic llapan nunacunapis wanurir cawariyämunanta. Diosta Adan mana cäsonqanrecurmi Diosnintsic permitïcorqan llapan nunacuna wanuyänanpaq. Y Jesucristu cawarimonqanrecur permitïcushqa noqantsicpis wanurir cawarimunapaq. Tsemi Adanpa jutsanrecur wanuntsic, y Teyta Jesucristurecurnam wiñepa cawanapaq cawarimushun.’ (1 Corintius 15:20-22.)

Jesus kawanqanta y wanunqantaqa manam neguëta puëdintsiktsu, peru ¿imanötaq musyantsik kawarimunqanta? Tsëtaqa musyantsik tukïläya sitiukunachö mëtsikaq nunakunata yuripushqa kaptinmi. Juk kutim 500 nunakunapita masta yuripurqan. Tsë pasakunqampitam Corintu cristiänukunaman cartakurnin apostol Pablu qellqarqan. Jina nirqanmi tsë pasakunqanta rikaqkuna kawëkäyanqantaraq, tsëtaqa nirqan tsë pasakunqan rasumpa o mana rasumpa kanqanta tsë nunakuna niyänampaqmi (1 Corintius 15:3-8).

Jesuspaq parlar ‘llapanpa puntan cawarimoq’ nir apostol Pablu ninqanqa alläpam precisarqan, porqui tsëmi rikätsikun mas nunakunapis kawariyämunampaq kaqta. Kikin Jesusmi nirqan, ‘parlashqäcunata wanushqacuna wiyarmi, cawariyämunqa’ (Juan 5:28, 29).

“Porqui que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq.” (Juan 3:16.)

Bibliapa qallanan kaq päginankunaqa parlan wanï qallanqan y Eden huerta ushakanqan witsankunapaqmi. Ushanan kaq päginankunanam parlan wanï ushakänampa kaqpita y entëru Patsata juk shumaq huertaman Dios tikratsimunampaq kaqpita. Tsë junaqkuna chämuptinqa llapan nunakunam mana wanushpa kushishqa kawakuyanqa. Apocalipsis 21:4 textum änikun ‘mananam wanuyanqanatsu’, y Diospa änikïninman chipyëpa markäkunapaqmi 5 kaq versïculu kënö nin: “Llapantam cumplishaq; porqui noqaqa manam ulicütsu”.

¿Qamqa creinkiku ‘llapanta cumplimunampaq’ kaqman? Creirninqa, Jesuspita mas yachakï y pëman markäkï; tsëmi Jehovä chaskishunki. Pëqa manam kanan witsanllatsu bendicishunki, sinöqa kë Patsachö mana wanushpa kawakïtapis qoshunkim, tsëchöqa mananam wanï kanqanatsu, “waqayanqanatsu ni llaquiyanqanatsu, mananam imancunapis nananqanatsu”.