1. ¿Imata rurashqatan Jehovä kushikun?

 PENSARI juk kuyashqa amïguykita imatapis alläpa väleqta y mas wananqan kaqta qarëkunqëkiman. ¿Imanöraq sientikunkiman tsë qaranqëkita churëkur qonqëkuptin? Llakikunkimanchi. Peru tsë qaranqëkita alläpa valorarnin agradecikushuptiki y utilizaptinqa alläpachi kushikunkiman. Tsënöllam Jehovä Diosnintsikpis kuyamarnintsik Tsurin Jesus wanunanta permitirqan. ¡Alläpachi kushikun Jesus wanunqanta valorashqa y kuyamanqantsikpita agradecikushqa! (Juan 3:16; Rom. 5:7, 8).

2. ¿Imakunatataq këchö yachakushun?

² Peru tiempu pasariptinqa juk qarëta churëkur qonqareq cuentam, Jesus wanunqampita agradecikushwannatsu. ¿Imatataq rurashwan imëpis agradecikoq kanapaq? Jehoväwan Jesus kuyamanqantsikmanmi seguïdu pensanantsik. Tsëmi këchöqa yachakushun, Jesus wanunqan kanan witsan imanö yanapamanqantsikta y shamoq tiempuchö imanö yanapamänapaq kaqta. Tsënöllam yachakushun Jehovä kuyamanqantsikpita imanö agradecikunapaq kaqta. Tsëtaqa Jesus wanunqanta yarpäna witsanchömi maslla rurëta puëdintsik.

JESUS WANUNQAN KANAN WITSAN IMANÖ YANAPAMANQANTSIK

3. ¿Imanötan Jesus wanunqan kanan witsan yanapamantsik?

³ Jesus wanunqanqa kanan witsampis imëkachömi yanapamantsik. Këllaman pensarishun: Jesus wanunqanrëkurmi jutsantsikkunapita Jehovä perdonamantsik. Y tsëta ruranampaqqa manam pipis obligarqantsu. Tsëmi juk cancionchö  gobernanti David kënö nirqan: “Teytallä Jehovä, alli kaptiki y perdonakoq kaptikim mañakamü” (Sal. 86:5; 103:3, 10-13).

4. Jesus wanunqanqa, ¿pikunatataq yanapan? (Lücas 5:32; 1 Timoteu 1:15).

⁴ Wakin nunakunaqa pensayan Jehovä perdonananta mana mereciyanqantam. Peru rasumpa kaqchöqa llapantsikpis manam merecintsiktsu. Tsëmi apostol Pablu kënö nirqan: “[Manam] apostolnö reqishqa kanäpaqnötsu kä”. Peru tsëpitam kënö nirqan: “Teyta Dios noqawan alläpa alli kanqanrëkurmi kanan kanqäqa kä” (1 Cor. 15:9, 10). Rasumpa arrepentikushqaqa Jehoväqa perdonamantsikmi. Peru manam merecishqatsu, sinöqa alläpa kuyamarnintsikmi. Tsëmi Jehovä perdonamänata mana merecinqantsikta pensarqa llakikunantsiktsu. Jesusqa manam jutsannaqkunapaqtsu wanurqan, sinöqa jutsata rurayanqampita rasumpa arrepentikoqkunapaqmi (leyi Lücas 5:32; 1 Timoteu 1:15).

5. ¿Sirwinqantsikpitaku Jehovä perdonamantsik?

⁵ Mëtsika watapana Jehoväta sirwirpis, manam pensanantsiktsu imëka päguta chaskeq cuenta Jehoväpa perdonninta chaskishqa kanqantsikta. Rasunmi, llapan ruranqantsikkunataqa Jehovä valoranmi (Heb. 6:10). Peru manam sirwinqantsikpita pagamänantsikpaqtsu Tsurin wanunanta permitirqan, sinöqa juk qarëmi karqan. Sirwinqantsikpita Jehovä perdonamanqantsikta pensarqa, Jesus wanunqantam mana kaqpaq churëkashwan (igualaratsi Gälatas 2:21 textutawan).

6. ¿Imanirtan apostol Pabluqa Jehoväta sirwirqan?

⁶ Apostol Pabluqa manam Jehovä perdonananta munarllatsu sirwirqan, sinöqa alli karnin perdonakoq kanqampita agradecikurmi (Efes. 3:7). Tsënöllam noqantsikpis Jehovä Diosnintsiktaqa sirwintsik perdonamanqantsikpita agradecikurnin y manam sirwinqantsikpita perdonamänata munartsu.

7. ¿Imanö mastan yanapamantsik Jesus wanunqan? (Romänus 5:1; Santiägu 2:23).

⁷ Tsënöllam Jesus wanunqanqa yanapamantsik Jehoväwan amïgu kanantsikpaq. a Yachakunqantsiknöpis, manam yurikunqantsik junaqtsu Diospa amïgun tikrarqantsik. Sinöqa Jesus wanunqan yanapamashqaraqmi Dioswan yamë këta y amïgu këta puëdintsik (leyi Romänus 5:1; Santiägu 2:23).

8. ¿Imanirtan Jehovä Diosnintsikta alläpa agradecikushwan mañakuyta puëdinqantsikpita?

⁸ Jehoväpa mas amïgun kanantsikpaq y mañakunantsikpaq Jesus wanunqan imanö yanapamanqantsikta masllata rikärishun. Jehovä Diosnintsikqa manam reunionkunachö mañakayämunqankunallatatsu wiyan, sinöqa cada ünu mañakunqantsiktapis wiyanmi. Jehoväman mañakurqa, mas tranquïlu y yamëmi sientikuntsik. Peru manam tsëllatsu, Jehovä Diosnintsikpa mas amïgunmi tikrantsik (Sal. 65:2; Sant. 4:8; 1 Juan 5:14). Jesuspis kë Patsachö karqa, seguïdum Teytanman mañakoq, tsënöqa mañakoq wiyanqanta musyarnin y Papäninwan mas amïgu këta munarmi (Lüc. 5:16).

JESUS WANUNQAN SHAMOQ TIEMPUCHÖ IMANÖ YANAPAMANQANTSIK

9. Jesus wanunqanqa, ¿imanötan Jehoväpa sirweqninkunata shamoq tiempuchö yanapanqa?

⁹ Jesus wanunqanqa, ¿imanötan Jehoväpa sirweqninkunata shamoq tiempuchö yanapanqa? Jesus wanunqanrëkurmi Jehovä Diosqa mana wanuypa kawakuyänanta permitinqa. Nunakuna imëpis wanushqa kayaptinmi, wakinkunaqa pensayan imëyaqpis kawakuyta mana puëdiyänampaq kaqta. Peru  yarpashqaqa, Jehovä Diosqa manam nunakunata wanuyänampaqtsu kamarqan, sinöqa imëyaqpis kawakuyänampaqmi. Tsëmi Jehoväqa imëyaqpis kawakunantsikta munarnin kuyë Tsurimpa vïdanwan pagakurqan (Rom. 8:32).

10. ¿Imatataq ciëlupaq akrashqakuna y Patsachö kawaqpaq kaqkunapis alläpa shuyarëkäyan?

¹⁰ Kananqa manam mana wanuypa kawakuyta puëdintsikraqtsu, peru Jehoväqa munan tsënö kawakunapaq kaqman pensanantsiktam. Ciëlupaq akrashqakunaqa Jesuswan juntu kë Patsaman gobernayämunampaqmi alläpa shuyarëkäyan (Apo. 20:6). Y Patsachö kawaqpaq kaqkunaqa, Shumaq Patsachö manana sufrirnin kawakuytam shuyarëkäyan (Apo. 21:3, 4). ¿Kë Patsachö imëyaqpis kawakuytaku shuyarëkanki? Kë Patsachö kawakuypaqqa, manam pensanëkitsu ciëluchö kawëpita mas mënus kanqanta. Yarpashqaqa, Jehoväqa nunakunata kamarqan mana wanur Patsachö kawakuyänampaqmi y manam ciëluchö kawayänampaqtsu. Tsëmi Shumaq Patsachö kawakuyqa alläpa shumaq kanqa.

11, 12. ¿Ima bendicionkunataraq Shumaq Patsachö chaskishun? (Dibüjukunata rikäri).

¹¹ Shumaq Patsachö imanö kawakunëkipaq kaqman pensë. Tsëchöqa manam yarpachakunkinatsu, “kananqa qeshyarishaqchi” o “wanurishaqchi” nirnin (Is. 25:8; 33:24). Jehoväqa llapan munanqëkiwanmi bendicishunki. ¿Imatataq yachakuyta munanki Shumaq Patsachö? ¿Musyëta munankiku animalkuna imanö kayanqanta? ¿Yachakuyta munankiku müsica toquëta o dibujëta? Shumaq Patsachöqa alläpam wanashun wayikunata rurayänampaq plänu rurëta yachaqkunata, murupakoqkunata, cocinëta yachaqkunata, plantakunata cuidëta yachaqkunata, herramientakunata rurëta y altsëta yachaqkunata y maskunata rurëta yachaqkunatam (Is. 35:1; 65:21). Shumaq Patsachöqa, ¡imëka rurëta yachakunapaqmi tiempu kanqa!

¹² Kawarimoqkunata chaskiqa, ¡alläpa shumaqchi kanqa! (Hëch. 24:15). Y alläpa kushikuypaqchi kanqa Jehoväpita y llapan ruranqankunapita masta yachakuypis (Sal. 104:24;  Is. 11:9). Peru tsëkunapitapis masqa, jutsata manana rurarmi Jehovä Diosnintsikta limpiu concienciawan adorëta puëdishun, y mananam kanannö imatapis mana allita ruranqantsikpita llakikur kashunnatsu. ¿Tsë llapantatsuraq perdirinkiman kanan tiempu ‘cuerpuyki munanqanta rurakur’? (Heb. 11:25). Kanan witsan imëkata dejanqantsikkunapita mas väleq y mas alliqa Diosnintsik änikunqankunata chaskinapaq kaqkunam. Tsë Shumaq Patsachöqa mananam Diosnintsik änikunqankunata shuyaräshunnatsu, tsë änikunqanqa cumplikashqanam kanqa. Y tsë llapankunaqa cumplikanqa Diosnintsik kuyamanqantsikpitam y noqantsikrëkur Tsurin wanunanta permitinqampitam.

¿IMAKUNATATAQ RURASHWAN JEHOVÄ KUYAMANQANTSIKPITA AGRADECIKURNIN?

13. ¿Imatataq rurashwan Jehovä kuyamanqantsikpita agradecikurnin? (2 Corintius 6:1).

¹³ ¿Imakunatataq rurashwan noqantsikrëkur Jesus wanunqampita agradecikurnin? Jehovä Diosnintsikta sirwitam mas puntaman churanantsik (Mat. 6:33). Diospa Palabranmi kënö nin: “[Jesusqa] llapantsikpaqmi wanurqan, tsënöpa kawaqkunaqa kikinkunapaq manana kawayänampaq, sinöqa pëkunarëkur wanoqpaq y kawamoq kaqpaqna kawayänampaq” (2 Cor. 5:15). Manam imanöpapis, kuyamarnintsik Jehovä ruramunqampitaqa agradecikuyta dejëta munantsiktsu (leyi 2 Corintius 6:1).

14. ¿Imanötan rikätsikushwan Jehovä mandakunqankunaman confiakunqantsikta?

¹⁴ Tsënöllam Jehovä kuyamanqantsiktaqa agradecikuntsik mandakunqankunaman confiakur. Imatapis decidinantsik kaptin, imata estudianantsik kaptin o ima trabäjumampis yëkunantsik kaptinqa tsë asuntukunapaq Jehovä imata pensanqantam cäsukunantsik (1 Cor. 10:31; 2 Cor. 5:7). Mandamanqantsikkunata cäsukurqa masmi Diosnintsikman confiakushun, amïgun tikrashun y änikunqankunatapis masmi shuyaräshun (Rom. 5:3-5; Sant. 2:21, 22).

15. ¿Imanötan agradecikoq kanqantsikta rikätsikushwan Jesus wanunqanta yarpäna witsanchö?

¹⁵ Jesus wanunqampita y Jehovä kuyamanqantsikpita agradecikunqantsiktaqa rikätsikushun, Jesus wanunqanta yarpäna witsanta alli provecharmi. Jesus wanunqanta yarpäna reunionman ëwanapaq kallpachakurpis, wakin nunakunatam tsë reunionman invitanantsik (1 Tim. 2:4). Nunakunata invitarqa, tsë reunion imanö kanqanta alli entienditsishun. Tsëpaqqa jw.org päginachömi rikäratsishwan ¿Imanirtan Jesusqa wanurqan? y Jesus wanunqanta yarpäshun neq videukunata. Y anciänukunaqa, Jehoväta sirwita dejashqakunatam invitayämunqa. Jehoväta sirwita dejashqakuna jukllëllapis tsë reunionman shamuptinqa, ¡alläpachi ciëluchö kaqkuna y  Patsachö kaqkunapis kushikuyanqa! (Lüc. 15:4-7). Jesus wanunqanta yarpäna reunionman ëwarqa, ama kikintsik purallaqa saludanakurnin kashuntsu, tsëpa rantinqa tsëllaraq shamushqakunata y reunionman unëta shamushqakunata shumaq saludashun. ¡Llapankunapis alli sientikuyänanta procurashun! (Rom. 12:13).

16. ¿Imanirtan Jesus wanunqanta yarpäna witsanchö maslla yachatsikushwan?

¹⁶ Tsënöllam Jehoväwan Jesus noqantsikrëkur rurayämunqankunapita agradecikunqantsikta rikätsikushun, Jesus wanunqanta yarpäna witsanchö maslla yachatsikurnin. Tsëta rurarqa, Jehovä yanapamanqantsiktam valorashun y masmi pëman confiakushun (1 Cor. 3:9). Tsënöllam tsë semänakunapaq akrashqa textukunata leyinantsik. Tsë textukunataqa tarishun Llapan junaqkuna Bibliapita yachakunapaq follëtuchö y Cristiänunö Kawakunapaq y Yachatsikunapaq höjachömi. Hasta tsë textukunatam akrashwan maslla estudianapaq.

17. ¿Imanirtan Jehoväqa noqantsikwan kushishqa këkan? (Leyi “ ¿Imanötan Jehoväta agradecikunkiman?” neq recuadruta).

¹⁷ Y këchö yachakunqantsikkunata rurëta mana puëdirqa, ama llakikuytsu. Jehoväqa manam ruranqëkita jukkuna rurayanqankunawan igualatsintsu. Pëqa musyanmi shonquykichö imanö kanqëkita, y musyanmi Tsurin wanunanta permitinqampita alläpa agradecikunqëkita (1 Sam. 16:7; Mar. 12:41-44).

18. ¿Imanirtan Jehovätawan Jesusta alläpa agradecikuntsik?

¹⁸ Yachakunqantsiknöpis Jesus wanunqanrëkurmi Jehoväqa jutsantsikpita perdonamantsik, amïgun këta puëdintsik y mana wanuypa kawakuyta shuyarantsik. Jehovä Diosnintsik kuyamanqantsikpita imëpis agradecikushun. Pëqa kuyamarnintsikmi imëka bendicionkunata chaskinapaq patsätsimurqan (1 Juan 4:19). Tsënöllam, kuyamarnintsik wanunqampita Jesustapis agradecikunantsik (Juan 15:13).