1. ¿Imanötan yanapamantsik Jesus wanunqanta cada wata yarpanqantsik?

 SALVAMÄNAPAQ Tsurin wanunanta Jehovä permitinqampitaqa alläpam agradecikuntsik (2 Cor. 9:15). Tsërëkurmi Jehoväwan alli amïgu këta puëdintsik y mana wanurna kawakuyta shuyarantsik. Jehoväqa kuyamarnintsikmi Tsurin wanunanta permitirqan, y alläpam agradecikuntsik (Rom. 5:8). Y Jesusqa agradecikoq kanantsikta munarmi, wanunqanta cada wata yarpänäpaq mandakurqan (Lüc. 22:19, 20).

2. ¿Imatataq yachakushun?

² Kë 2025 wataqa, säbadu 12 de abrilmi Jesus wanunqanta yarpäshun. Y tsë reunionmanqa llapantsikmi ëwëta munëkantsik. ¿Imatataq rurashwan Jesus wanunqanta yarpäna witsanchö? Jehoväwan Jesus rurayämunqankunaman pensanapaqmi a tiempuntsikta rakinantsik. Tsëmi këchöqa yachakushun Jesus wanunqanrëkur, Jehoväwan Jesus imanö kayanqanta. Y qateqninchönam yachakushun Jesus wanunqan imanö yanapamanqantsikta y imanö agradecikunapaq kaqta.

JESUS WANUNQANWANQA, ¿JEHOVÄ IMANÖ KANQANTATAQ MUSYANTSIK?

3. ¿Imanötan juk nuna wanunqanllawanqa mëtsikaq nunakuna salvakuyta puëdiyan? (Dibüjukunata rikäri).

³ Jesus wanunqanwanmi entiendintsik, Jehovätaqa imëpis alli kaqllata o justiciata rurë gustanqanta (Deut. 32:4).  ¿Imanirtan tsënö nintsik? Adanqa Diosta mana cäsukurmi, jutsaman y wanuyman churamarqantsik (Rom. 5:12). Tsëmi Jehoväqa jutsapita y wanuypita libramänantsikpaq Tsurin Jesusta mandamurqan. Peru ¿imanötan juk jutsannaq nunalla mëtsikaq millon nunakunata salvëta puëdinman karqan? Tsëta entienditsikurmi apostol Pablu kënö nirqan: “Juk nuna mana cäsukoq kanqanrëkurlla mëtsikaq nunakuna jutsata ruraq tikrayanqannöllam, juk nuna cäsukoq kanqanrëkurlla mëtsikaq nunakuna allita ruraqnö rikashqa kayanqa” (Rom. 5:19; 1 Tim. 2:6). Imanömi jutsannaq nuna Adan mana cäsukurnin jutsaman y wanuyman churamarquntsik, tsënöllam Diosnintsikta cäsukur jutsannaq nuna Jesus, jutsapita y wanuypita libramarquntsik.

4. ¿Imanirtan Jehoväqa nunakunata salvanampaq Jesus wanunantaraq permitirqan?

⁴ ¿Manatsuraq Jehoväqa Jesus wanunanta mana permitirlla Adanpa cäsukoq kastankunata imëyaqpis kawakuyänanta permitirinman karqan? Capazchi tsënö pensanqantsik noqantsikpaqqa alli kanman, peru Jehovä Diosnintsiktaqa justicia rurëmi gustan. Tsëmi Adan jutsata ruranqantaqa mana kaqpaq churarqantsu.

5. ¿Imanirtan següru këkantsik Jehovä Diosnintsik imëpis alli kaqllata ruranampaq kaqta?

⁵ Peru ¿imaraq pasakunman karqan Tsurin wanunanta mana permitirlla Adanpa cäsukoq kastankunata imëyaqpis kawakuyänampaq permitiptinqa? Tsëta rurarqa manachi justiciata rurëkanmantsu karqan o ima alli y ima mana alli kanqanta kikin patsätsinqanta cumplïkanmantsu karqan. Tsënö kanqanta musyarqa, nunakunaqa manachi Diosnintsikman confiakuyanmannatsu karqan. Capazchi kënö pensayanman karqan: “Tsë asuntuchöpis mandakunqanta mana cumplïkarqa, ¿cumplinqatsuraq wakin änikunqankunata?”. Peru Jehovä Diosnintsik alli kaqta ruraq kanqanta musyarmi tsënöqa yarpachakuntsiknatsu. Pëqa kuyë Tsurin wanunan kaptimpis, justiciatam rurarqan. Tsëmi següru këkantsik imëpis alli kaqllata ruranampaq kaqta.

6. ¿Imanirtan Jehoväqa tsurin wanunanta permitirqan? (1 Juan 4:9, 10).

⁶ Tsurin wanunanta permitinqanwanmi musyantsik, Jehovä Diosnintsik alli kaqllata ruraq kanqanta, peru masqa alläpa kuyamanqantsikta (Juan 3:16; leyi 1 Juan 4:9, 10). Jehoväqa Tsurin wanunanta permitirqan imëyaqpis kawakunantsikta munar y familianchö kanantsikta munarmi. Peru Adan jutsata rurarirqa mananam Jehoväpa familianchönatsu karqan. Tsëmi llapantsikpis Jehoväpa familianchönatsu yurirquntsik. Peru Jesus wanunqanrëkur Diosnintsikman markäkur o yärakur y mandakunqankunata  cäsukurqa, tiempuwanqa familianmi kashun. Peru Jehovä Diosnintsikqa kanampis, jutsata ruranqantsikkunapitaqa perdonamantsikmi. Tsëmi amïgun y sirweqninkunapa amïgumpis këta puëdintsik. ¡Jehoväqa alläpam kuyamantsik! (Rom. 5:10, 11).

7. Jehovä kuyamanqantsikta entiendinapaqqa, ¿imanötan yanapamantsik Jesus sufrinqanman pensanqantsik?

⁷ Jehovä kuyamanqantsiktaqa musyantsik, mana fäcil kaptimpis salvamänantsikrëkur Jesus wanunanta permitinqanwanmi. Satanasqa Diospa sirweqninkunapaqmi nirqan mana allikunapa pasarqa Diosta sirwita dejariyänampaq kaqta. Peru tsëqa manam rasumpatsu, tsëmi Jehoväqa permitirqan Tsurin Jesus sufrir wanunanta (Job 2:1-5; 1 Pëd. 2:21). Jehoväqa ciëlupitam rikämurqan, Jesuspita burlakuyanqanta, maqayanqanta, qeruman warkuyanqanta y alläpa sufrirnin wanunqanta (Mat. 27:28-31, 39). Munarninqa, Jehoväqa Jesusta salvarinmanmi karqan. Nunakunam kënö niyarqan: “Yanapëta munarqa mä Dios salvatsun”, tsënö niyanqan höram Diosnintsikqa salvarinman karqan (Mat. 27:42, 43). Peru Jesusta salvaptinqa manachi jutsantsikpita pagakunmantsu karqan y manachi alli kawakuyta shuyarashwannatsu karqan. Tsëmi Jehoväqa alli kawakunantsikta munarnin, Tsurin alläpa sufrinanta y wanunanta permitirqan.

8. ¿Imanötan musyantsik Tsurinta wanutsiyaptin Jehovä alläpa llakikunqanta? (Dibüjuta rikäri).

⁸ Tsurin Jesusta wanutsiyänampaq kaqpita Jehovä mana salvarpis, sufreqta rikarninqa alläpam llakikurqan. ¿Imanötan musyantsik? Pëqa kamamarquntsik sentimientuyoqtam, tsëwanmi entiendintsik pëpis sentimientuyoq kanqanta. Y Bibliachöqa clärum nimantsik, wakin nunakunaqa rurayanqankunawan Teyta Diosta ‘llakitsiyanqanta’ (Sal. 78:40, 41). Pensarishun Abrahanman. Abrahantaqa Jehovä mandarqan tsurin Isaacta pëpaq rupatsinampaqmi (Gen. 22:9-12; Heb. 11:17-19). ¿Imanöraq Abrahan sientikurqan wamranta wanutsinampaq kaqta musyar? Capazchi sufrinanta mana munarnin raslla o saslla wanuratsita munarqan. Y Jehoväqa, ¿imanöraq sientikurqan Tsurinta maqayaptin y wanutsiyaptin? Alläpachi llakikurqan. (Rikë jw.org päginachö Ejemplos de fe: Abrahán [parte 2] neq videuta).

9. Romänus 8:32, 38, 39 textuta leyirnin, ¿Jehovä Diosnintsik imanö kanqantataq entiendintsik?

⁹ ¿Imanötan entiendintsik Jehovä alläpa kuyamanqantsikta? Noqantsikrëkur Tsurin wanunanta permitinqanwanmi. Pëqa familiantsikpita y mas alli kaq amïguntsikpitapis masmi kuyamantsik (leyi Romänus 8:32, 38, 39). Jehoväqa, kikintsik kuyakunqantsikpitapis masmi kuyamantsik. Këllaman pensari:  ¿munankiku imëyaqpis mana wanuypa kawakuyta?, ¿munankiku jutsëkikunapita perdonashqa këta? Jehovä Diosnintsikqa qampitapis masmi tsëkunata munan. Peru tsëpaqqa Jesus wanunqanmanmi markäkunantsik o yärakunantsik y mandakunqankunatam cäsukunantsik. Yachakurinqantsiknöpis, Jesus wanunqanwanmi cläru entiendirintsik Diosnintsik alläpa kuyamanqantsikta. Shumaq Patsachöqa masran yachakushun Jehovä Diosnintsik kuyakoq kanqanta (Ecl. 3:11).

SALVAMÄNAPAQ WANUNQANWANQA, ¿JESUS IMANÖ KANQANTATAQ MUSYANTSIK?

10. (1) ¿Imapaqtan Jesus alläpa yarpachakoq? (2) ¿Imanötan Jesusqa Teytampa jutinta respetatsirqan? (Leyi “ Jesusqa alli tsarakurmi Teytampa jutinta respetatsirqan” neq recuadruta).

¹⁰ Jesusqa manam munarqantsu Teytanta mana allichö quedatsita (Juan 14:31). Pëqa alläpam yarpachakurqan, “¡Diostam ofendishqa!” nirnin acusayaptin, y manam munarqantsu Teytampaq mana allita parlayänanta. Tsëmi kënö nirqan: “Teytallä, puëdikaptinqa kë cöpata noqapita pasëkatsillë” (Mat. 26:39). Jesusqa wanunqanyaq alli tsarakurmi Teytampa jutinta respetatsirqan.

11. ¿Imakunatataq Jesusqa rurarqan nunakunata alläpa kuyarnin? (Juan 13:1).

¹¹ Jesusqa wanunqanwanmi rikätsikurqan nunakunapaq alläpa yarpachakunqanta. Y qateqninkunapaqmi masqa yarpachakun (Prov. 8:31; leyi Juan 13:1). Jesusqa allim musyarqan kë Patsachö alläpa sufrir wanunampaq kaqta. Tsëta musyëkarpis nunakunatam kushishqa yanaparqan y Diosnintsikpita yachatsirqan. Y wanutsiyänampaq manaraq prësuyaptinmi apostolninkunata animarqan, imëkata yachatsirqan y chakinkunatapis yakuwan awipurqan o mayllapurqan (Juan 13:12-15). Y qeruchö clavarëkarnam,  delincuenti nunata änirqan Shumaq Patsachö kanampaq, y Juantanam nirqan mamänin Marïata cuidanampaq (Lüc. 23:42, 43; Juan 19:26, 27). Rikärinqantsiknömi, Jesusqa nunakunata alläpa kuyarnin yachatsirqan y pëkunarëkur wanurqan.

12. ¿Imakunata rurartan Jesus yanapëkämantsik?

¹² Jesusqa jutsapita y wanuypita libramänapaqmi ‘juk kutilla wanurqan’, tsënö karpis tukuynöpam yanapëkämantsik (Rom. 6:10). Imëka trabäjutam rurëkamun yanapamänantsikpaq. Gobernanti kar, Sacerdötikunapa mandaqnin kar y congregacionpa dirigeqnin karmi imëkakunata rurëkämun (1 Cor. 15:25; Efes. 5:23; Heb. 2:17). Pëmi carguta chaskishqa ciëlupaq akrashqakunata y kë Patsachö kawaqpaq kaqkunata juntanampaq, y tsë trabäjutaqa alläpa sufrimientu manaraq ushaptinmi cumplinqa (Mat. 25:32; Mar. 13:27). b Tsënöllam, kë ushanan tiempukunachö Diosnintsikpita alli yachakunantsikpaqpis dirigikämun (Mat. 24:45). Y Mil Watapa gobernanqan witsampis tukuynöpam yanapamäshun. Tsëqa, ¿wanunanllapaqku Jesusta kë Patsaman Jehovä mandamurqan? Manam, sinöqa imëkakunata rurarnin yanapamänapaqmi.

MASLLA YACHAKUYTA PROCURË

13. ¿Imatataq rurankiman Jehoväwan Jesus kuyamanqantsikta maslla entiendinëkipaq?

¹³ Jehoväwan Jesus kuyamanqantsiktaqa maslla entiendinki, imakunata rurayämunqankunaman alli pensarmi. Allim kanman Jesus wanunqanta yarpäna witsanchö Mateu, Marcus, Lücas y Juan librukunata leyinqëki. Ama alläpa atskataqa leyitsu, tsëpa rantinqa, kuyamarnintsik imakunata rurayämunqankunata entiendinëkipaq wallka wallkalla leyi y yachakunqëkikunata wakinkunata willë.

14. Salmus 119:97 y nöta ninqannö, ¿imatataq rurankiman noqantsikrëkur Jesus wanunqampita y juk tëmakunapita maslla yachakunëkipaq? (Fötuta rikäri).

¹⁴ Atska watapana Jehoväta sirwirqa, capazchi pensëkanki Diosnintsik justiciata ruraq y kuyakoq kanqampita y imanö salvamanqantsikpita maskunata yachakuyta manana puëdinqëkita. Peru rasumpa kaqchöqa tsëkunapita yachakuytaqa manam imëpis ushashuntsu. ¿Imatataq rurankiman maslla yachakunëkipaq? Publicacionnintsikchömi tsë asuntukunapaq parlaq yachatsikuykunata ashinëki.  Mana entiendinqëki textuta tarirqa, maslla entiendinëkipaq publicacionnintsikkunachö ashï. Tsëpitana, Jehoväwan Tsurin Jesus imanö kayanqampaq y kuyakoq kayanqampaq imata yachakunqëkiman entëru junaq pensë (leyi Salmus 119:97 y nöta).

15. ¿Imanirtan Bibliata estudiarqa mana musyanqantsik yachatsikuykunata ashirnin sïguishwan?

¹⁵ Bibliata estudiarnin mana musyanqëki yachatsikuykunata mana tarirqa ama qelanäkuritsu. Bibliata estudiëqa öruta ashinömi. Öruta asheqkunaqa mana tarirpis, atska junaqkunapam pacienciawan ashiyan. Y ichikllatapis taririrqa, alläpa väleq kanqanta musyarmi alläpa kushikuyan. Bibliachö mana musyanqëki yachatsikuykunata tarinqëkiqa tsë örupitapis masmi välin (Sal. 119:127; Prov. 8:10). Tsëmi Bibliataqa pacienciawan yachakunëki y manam leyita ni estudiëta qelanäkurinëkitsu (Sal. 1:2).

16. ¿Imakunata rurartan Jehovänö y Jesusnö kashwan?

¹⁶ Bibliapita yachakurninqa, yachakunqëkinö ruranëkipaq kallpachakuy. ¿Imakunatataq rurankiman Jehovänö imëpis alli kaqta ruranëkipaq? Llapan nunakunatam igualpa tratanëki. Y Jehoväta y nunakunata Jesusnö rasumpa kuyarqa, ¿imakunatataq rurankiman? Mana fäcil kaptimpis Diospa jutinta musyatsikunëkipaqmi listu këkänëki, imëka pasakuptimpis wawqi panikunatam yanapanëki y Jesus wanunqampita bendicionta chaskiyänampaqmi nunakunata yachatsinëki.

17. ¿Imatataq qateqninchö yachakushun?

¹⁷ Jesus wanunqan imanö yanapamanqantsikta alli entiendirqa masmi Jehovätawan Jesusta kuyashun y pëkunapis masmi kuyamäshun (Juan 14:21; Sant. 4:8). Tsëmi Jesus wanunqan imanö yanapamanqantsikta Jehovä yachatsimanqantsikkunata alli provechanantsik. Qateqninchömi yachakushun Jesus wanunqan imanö yanapamanqantsikta, y kuyamarnintsik Tsurin wanunanta permitinqampita Jehoväta imanö agradecikunapaq kaqta.