1. ¿Imanötan kanan witsan nunakuna kayan?

 KANAN WITSAN nunakunaqa kikinkunallamanmi masqa pensayan, tsëmi alabayänanta munarnin imanö kayanqanta o imakunata rurayanqanta Internetpa willakuyan o rikätsikuyan. Peru Jehovä Diosnintsiktaqa wallkaq nunakunallam alabayan. Tsëmi këchöqa yachakushun Jehovä Diosnintsikta alabë ima ninan kanqanta, imanir y imanö alabanapaq kaqta, y shamoq tiempuchö jutinta Jehovä imanö respetatsinampaq kaqta.

JEHOVÄTA ALABË NIRQA, ¿IMA NITATAQ MUNËKAN?

2. ¿Imanötan Jehoväqa poderösu kanqanta Sinaï jirkachö rikätsikurqan? (Jana qaranchö dibüjuta rikäri).

² Bibliachöqa Jehovä Diosnintsikpaq alläpa poderösu kanqantam nin. Këllaman pensarishun: israelïtakunaqa mëtsika millonmi Egiptupita yarqayämurqan. Y Jehovä parlanqanta wiyayänampaqmi Sinaï jirka jawanchö juntakäyarqan. Tsënam entëru jirkata pukutë tsapëkurqan, feyupa jirka kuyurqan, hornupita qoye o qoshni yarqoqnö entëru jirkapita qoshni yarqurqan, räyukuna chilapyarqan y carnërupa waqranta alläpa fuertipa tocayaqtanö wiyayarqan (Ex. 19:16-18; 24:17; Sal. 68:8). Jehovä tsënö poderösu kanqanta rikarqa, israelïtakuna alläpachi mantsakäyarqan y kushikuyarqan.

3. ¿Imanötan Jehoväta alabashwan?

 ³ ¿Y noqantsikqa Jehoväta alabëta puëdintsikku? Awmi. ¿Imanötan rurashwan? Alläpa puëdeq kanqampita y imanö kanqampita nunakunata parlaparnin y imatapis ruranapaq poderninwan yanapamanqantsikpita agradecikurninmi (Is. 26:12). Tsëtam gobernanti Davidpis rurarqan. Juk kutim llapan israelïtakuna wiyëkäyaptin, Jehovä Diosta kënö nir alabarqan: “Jehovä Dios qamllam puëdeq y kallpayoq kanki, imanö kanqëkipis alläpa shumaqmi, qamllam alläpa respetashqa kanki. Ciëluchö y patsachö llapan kaqpis qamllapam”. Tsënö mañakur ushariptinmi, llapan israelïtakuna “Jehoväta alabayarqan” (1 Crön. 29:11, 20).

4. ¿Imanötan Jesusqa Teytan Jehoväta alabarqan?

⁴ Jesuspis kë Patsachö karqa, Teytantam alabarqan. Milagrukunata rurarqa, Teytan Jehovä yanapashqa kanqantam imëpis nirqan (Mar. 5:18-20). Tsënöllam wakin nunakunata Jehoväpita yachatsirnimpis y shumaq tratarnimpis Jehoväta alabarqan. Juk kutim Diosta adorayänan wayichö yachatsikuykarqan y tsëchömi 18 watapana demoniuyoq warmi këkarqan. Tsë demoniupa culpanrëkurmi tsë warmiqa qorukashqalla o umpukashqalla pureq. ¡Tsë warmiqa alläpam sufrirqan! Peru Jesusqa alläpa sufrinqanta cuentata qokurmi llakiparqan y kënö nirqan: “Warmi, kananmi qeshyëkipita alliyärirqunki”. Tsënö niskirmi tsë warmita yatëkurqan. Tsëmi warmiqa alliyärir derëchuna purirqan y “Teyta Diosta[m] alabar qallëkurqan” (Lüc. 13:10-13). ¡Alliyanqampitaqa llapan shonqunwanchi Diosnintsikta alabarqan! Y noqantsikqa, ¿imanirtan Jehoväta alabashwan?

¿IMANIRTAN JEHOVÄTA ALABASHWAN?

5. ¿Imanirtan Jehovä Diosnintsikta respetantsik?

⁵ Teyta Jehovätaqa alabantsik alläpa respetarmi. Peru ¿imanirtan Jehoväta respetantsik? Alläpa poderösu kaptinmi. Pëqa imëkatam rurëta puëdin (Sal. 96:4-7). Y yachaq kanqanqa imëka ruranqankunachömi rikakun. Përëkurmi kawantsik, y kawanapaqpis pëmi llapan wananqantsikta ruramushqa (Apo. 4:11). Teyta Jehoväqa manam dejamantsiktsu (Apo. 15:4). Llapan ruranqankunapis allillam yarqun y änikunqankunatapis llapantam cumplin (Jos. 23:14). Tsëchi willakoqnin Jeremïasqa kënö nirqan: “Mëtsë nacionkunachö y gobiernukunachöpis manam qamnö yachaqqa ni pï kantsu” (Jer. 10:6, 7). Tsënö kaptinmi Jehovä Diostaqa alläpa respetarnin alabantsik. Peru manam respetantsikllatsu, sinöqa alli Dios kaptinmi kuyantsik.

6. ¿Imanirtan Jehoväta alläpa kuyantsik?

⁶ Jehovätaqa alabantsik llapan shonquntsikwan kuyarmi. Imanö kanqanta musyarmi pëtaqa alläpa kuyantsik. Pëqa alläpa llakipäkoqmi (Sal. 103:13; Is. 49:15). Sufreqta rikämarnintsikqa, pëpis alläpam llakikun (Zac. 2:8). Amïgun kanantsikta munarmi yanapamantsik (Sal. 25:14; Hëch. 17:27). Y humildi karmi, ‘këkanqampita ciëluta y patsata rikëkämun. Tsënöqa rikëkämun waktsa nunata yanapanampaqmi’ (Sal. 113:6, 7). Diosnintsik tsënö këkaptinqa, ¿manatsuraq alabashwan? (Sal. 86:12).

7. ¿Imata rurartan Jehovä Diosnintsikta alabantsik?

⁷ Jehovä Diosnintsiktaqa alabantsik nunakuna reqiyänanta munarmi. Satanas ulikushqa o llullakushqa kaptinmi nunakunaqa Diosnintsik mana alli kanqanta pensayan (2 Cor. 4:4). Satanasmi nunakunata  creitsishqa, Jehoväqa castigakoq Dios kanqanta, nunakunapaq mana yarpachakunqanta y Diospa culpanrëkur imëka mana allikunapis pasanqanta. Peru noqantsikqa clärum musyantsik tsënö mana kanqanta. Tsëmi nunakunataqa rasumpa kaqta Diosnintsikpita yachatsita puëdintsik, y tsëta rurarmi alabantsik (Is. 43:10). Qateqninchömi yachakurishun Jehovä Diosnintsikta alabanapaq Salmus 96 ninqampita. Tsëmi yanapamäshun Jehovä Diosnintsikta imëpis alabanantsikpaq.

¿IMANÖTAN JEHOVÄ DIOSNINTSIKTA ALABASHWAN?

8. ¿Imanötan Jehoväta alabashwan? (Salmus 96:1-3).

⁸ (Leyi Salmus 96:1-3). Jehovätaqa alabëta puëdintsik pëpaq allikunata parlarmi. Salmus libruqa nimantsik Jehoväpaq cantanapaq, jutinta alabanapaq, Salvakoq kanqampita nunakunata willanapaq y llapan ruranqankunata mëtsë nacionkunachö willakunapaqmi. Tsëkunata rurarmi Jehovä Diosnintsiktaqa alabantsik. Tsëtam rurayarqan Jehoväta kuyaq judïukuna y punta cristiänukunapis, pëkunaqa llapan puëdiyanqanmannömi Jehoväpa jutinta respetatsiyarqan y imanö yanapanqanta willakuyarqan (Dan. 3:16-18; Hëch. 4:29). Y noqantsikqa, ¿imanötan pëkunanö Jehoväta alabashwan?

9, 10. ¿Imatataq Angelïna ruranqampita yachakuntsik? (Fötuta rikäri).

⁹ Estädus Unïduspita Angelïna a jutiyoq panintsik pasanqanta rikärishun. Pëqa valientim kanan karqan trabäjunchö Jehoväpa jutinta defendinampaq. Trabäjuman tsëllaraq yëkushqa kaptinmi, wakin compañërunkunawan reqinakuyänampaq juk reunionman invitayarqan, y tsëchömi llapankuna reqinakuyänampaq pï kayanqanta willakuyänan karqan. Panintsikqa Testïgu karnin kushishqa kawakunqanta rikätsikunampaqmi fötunkunata alistashqa karqan. Peru Angelïnata parlë manaraq tocaptinmi juk compañërun puntanta willakur qallëkurqan Testïgu familiachö winashqa kanqanta, y Testïgukunapa creenciankunapitam burlakurqan. Angelïnam kënö nin: “Alläpam yarpachakurqä. Tsënö karpis, kënömi pensarqä: ‘¿Jehoväpa jutintaqa defendishaqku, o mana allita parlar sïguinantaku permitishaq?’”.

 ¹⁰ Tsë compañërun parlar ushariptinmi, Angelïnaqa Jehovä Diosnintsikman mañakurirqan. Tsëpitam kënö nirqan: “Papänïkunaqa Testïgum kayan, y noqapis Testïgum kä”. Tsë höra parlakunampaq mana fäcil kaptimpis, tranquïlu kanampaqmi kallpachakurqan. Tsëpitam asamblëaman ëwanqan shumaq fötunkunata rikätsikurqan y creinqankunatam respëtuwan entienditsikurqan (1 Pëd. 3:15). Y parlar ushariptinnam, compañërunqa mas tranquïluna këkarqan y nirqanmi pëpis Testïgu papäninkunawan kushishqa kawakushqa kanqanta. Angelïnam kënö nin: “Jehoväpa jutintaqa defendinantsikmi. Pëpa jutinta defendiqa, ¡alläpa shumaqmi!”. Noqantsikpis Jehoväpa jutintaqa defendinantsikmi y alabanantsikmi.

11. ¿Imanötan Jehoväpa sirweqninkunaqa Salmus 96:8 ninqanta imëpis rurayashqa?

¹¹ (Leyi Salmus 96:8). Jehovätaqa kapamanqantsik cösaskunawanmi alabëta puëdintsik. Jehoväpa sirweqninkunaqa, imëpis cösasninkunawan yanapakurmi Jehoväta alabayashqa (Prov. 3:9). Këllaman pensarishun: israelïtakunam templuta rurayänampaq y altsayänampaq imëka cösasninkunawan yanapakuyarqan (2 Rëy. 12:4, 5; 1 Crön. 29:3-9). Jesuspa wakin qateqninkunanam imëka cösasninkunawan Jesusta y apostolninkunata yanapayarqan (Lüc. 8:1-3). Y punta cristiänukunanam faltapakuykaq wawqi panikunata imëkankunawan yanapayarqan (Hëch. 11:27-29). Noqantsikpis pëkunanömi qellënintsikwan Jehovä Diosnintsikta alabëta puëdintsik.

12. ¿Imanötan qellënintsikwan yanapakur Jehoväta alabantsik? (Fötuta rikäri).

¹² ¿Imanötan qellënintsikwan yanapakur Jehoväta alabantsik? Pasakunqanta rikärishun. 2020 watachömi, Zimbäbue nacionchö atska tiempupa usya kaptin nunakuna mikuyänampaq mikuy karqantsu. Y tsë nacionchömi Prisca jutiyoq panintsikpis täkurqan. Alläpa yarpachakuypaq kaptimpis, panintsikqa imëpis ruranqannömi cada mierculis y cada viernis yachatsikoq yarqoq, hasta yapyapakuy tiempuchöpis tsëtam rurarqan. Tsëmi vecïnunkunaqa, trabajanampa rantin yachatsikur puriptin burlakurnin kënö niyarqan: “¡Mallaqpitam wanunki!”. Peru panintsikqa kënömi  neq: “Jehoväqa manam imëpis sirweqninkunata dejashqatsu”. Tsëpita pöcu tiempullatanam Jehoväpa sirweqninkunaqa, cäjaman winakunqantsik qellëwan vïviriskunata rantipakurir panintsikpaq apatsiyarqan. Tsëta rikarmi vecïnunkunaqa kënö niyarqan: “Diosqa manam dejashurqunkitsu. Pëpitam masllata musyëta munayä”. Y siëti vecïnunkunam reunionkunaman ëwar qallëkuyarqan.

13. ¿Imanötan Salmus 96:9 ninqannö Jehovä Diosnintsikta alabantsik?

¹³ (Leyi Salmus 96:9). Alli portakurpis Jehovätam alabëkantsik. Sacerdötikunaqa Diospa carpa wayinchö y templuchö trabajayänampaqmi limpiu kayänan karqan (Ex. 40:30-32). Noqantsikpis limpiu limpiu purinapaqmi kallpachakunantsik, peru masqa Jehovä Diospa rikëninchö alli portakunapaqmi kallpachakunantsik (Sal. 24:3, 4; 1 Pëd. 1:15, 16). Allim kallpachakunantsik ‘unë imanö kanqantsikta’ dejanapaq y Dios munanqannö nuna kanantsikpaq. Juk parlakuychöqa, unë mana allikunata ruranqantsikkunata y mana alli pensanqantsikkunatam dejanantsik y Jehovä munanqannönam imatapis pensanantsik y ruranantsik (Col. 3:9, 10). Jehovä Diosnintsik yanapaptinmi, jukwan jukwan kakoq o alläpa maqakoq nunakunapis cambiëta puëdiyan y Diosnintsik munanqannö portakuyan.

14. ¿Imatataq yachakuntsik cambiukunata Jack ruranqampita? (Fötuta rikäri).

¹⁴ Jack jutiyoq nuna cambianqanta rikärishun. Pëqa alläpa maqakoq y asesïnu nunam karqan, tsëmi “Demoniu” nir reqiyaq. Y nunakunata wanutsinqampitam, wanutsiyänampaq condenayarqan. Peru manaraq wanutsiyaptinmi Bibliapita yachakur qallëkurqan. Imëka mana allikunata rurashqa karpis, Jackqa cambiukunatam rurarqan y tiempuwanqa bautizakurqanmi. Jack alli nunana kanqantaqa llapankunam musyayarqan, tsëmi wanutsiyänan junaqqa juk guardia waqarnin despidikurqan. Y juk guardianam kënö nirqan: “Jackqa alläpa peligrösu nunam karqan. Peru kananqa wakin prësukunapitapis mas alli nunanam”. Jackta wanutsiyanqampita juk semäna pasarinqanllachömi, Testïgukuna carcelchö reunionta rurayanqanman juk prësu nuna ëwarqan. ¿Imanirtan imëpis mana ëwashqa këkarnin  ëwarqan? Cambiukunata Jack rurashqa kanqanta rikashqa karmi, Jehovä Diosta adorëta munar imata ruranampaq kaqta musyëta munarqan. Rikärinqantsiknöpis, alli portakunqantsikwanmi Jehovä Diosnintsiktaqa alabëta puëdintsik (1 Pëd. 2:12).

¿IMANÖTAN JEHOVÄQA ICHIK TIEMPULLACHÖNA JUTINTA RESPETATSINQA?

15. Jutinta Jehovä respetatsinampaqqa, ¿imataraq ichik tiempullachöna ruramunqa? (Salmus 96:10-13).

¹⁵ (Leyi Salmus 96:10-13). ¿Imanötan Jehoväqa ichik tiempullachöna jutinta respetatsinqa? Salmus 96 textupa ushananchömi nin llapan nunakunata Jehovä juzganampaq kaqta. Ichik tiempullachönam jutinta mana allichö quedatseq Alläpa Puëdeq Babiloniata o llapan mana alli religionkunata ushakätsinqa (Apo. 17:5, 16; 19:1, 2). Capazchi wakin nunakunaqa mana alli religionkunata ushakaqta rikar Jehovä Diosnintsikta adorëta decidiyanqa. Tsëpitanam Jehoväqa, Satanas llapan ruranqankunata Armagedonchö ushakätsinqa. Jehoväpa jutinta chikeqkunata y mana allichö quedatseqkunatam llapanta ushakätsinqa, peru pëta kuyaqkunata, cäsukoqkunata y kushishqa alabaqkunataqa salvanqam (Mar. 8:38; 2 Tes. 1:6-10). Y Mil Watapa Jesus gobernar ushariptin y ultimu kaq pruëba pasariptinmi Jehoväpa jutinqa chipyëpana respetashqa kanqa (Apo. 20:7-10). Tsë tiempuchöqa, “lamarchö yaku junta kanqannömi, patsachö nunakunaqa Teyta Jehovä alläpa puëdeq kanqanta musyayanqa” (Hab. 2:14).

16. ¿Imata ruranëkipaqtan listu këkanki? (Dibüjuta rikäri).

¹⁶ Llapan nunakuna Jehoväpa jutinta alabayaptinqa, ¡alläpa shumaqchi kanqa! Peru tsë tiempu chämunqanyaqqa, kananmi alli provechanantsik Jehovä Diosnintsikta tukuynöpa alabanantsikpaq. Tsënö alabanantsikta munarmi, Jehoväpa Testïgunkunata Pushaqkunaqa kë 2025 watapaq Salmus 96:8 textuta akrayämushqa. Kënömi nin: “Teyta Jehoväpa jutinta alabayë”.