3 KAQ
35 KAQ CANCION Mas precisaq cösaskunata puntaman churashun
Jehovä munanqannö imatapis decidi
“Teyta Dios yachaq kanqanta entienditaqa qallëkuntsik, Teyta Jehoväta respetarmi. Alli entiendeqqa tikrantsik, Teyta Dios limpiu kanqanta musyarmi” (PROV. 9:10).
¿IMATATAQ YACHAKUSHUN?
Këchöqa yachakushun imatapis decidinapaqqa alliraq musyapakunantsikpaq, tsë asuntupaq Jehovä Dios imata pensanqanman pensanantsikpaq y tsë decidinapaq kaq alliman o mana alliman chätsimänapaq kaqman alli pensanapaqmi.
1. ¿Imatataq cada junaq rurantsik?
CADA JUNAQMI imëkata decidintsik. Wakin asuntukunata decidiqa fäcil-llam, peru wakin asuntukunata decidinanqa manam fäciltsu. Këllaman pensarishun: imata mikunapaq o imë höra punukunapaq kaqtaqa fäcil-llam decidintsik. Peru salornintsik asuntupaq, familiachö kushishqa kanantsikpaq y Diosnintsikta adorar imakunata ruranantsikpaq decidinanqa manam fäciltsu. Llapantsikpis munantsik decidinqantsikkunawan kushishqa këta y familiantsikkunapis kushishqa kayänantam, peru tsëpitapis masqa decidinqantsikkunawan Jehovä Diosnintsik kushishqa kanantam munantsik (Rom. 12:1, 2).
2. ¿Imakunatan yanapamäshun imatapis alli decidinapaq?
2 ¿Imakunatataq rurashwan imatapis alli decidinapaq? Kë kimankunatam: 1) rurëta munanqantsik imanö kanqantam alli musyanantsik, 2) tsë asuntupaq Jehovä imata pensanqantam alli musyanantsik y 3) imaman chätsimänapaq kaqtam alli pensanantsik. Tsëkunatam këchö yachakushun. Tsënöllam yachakushun tsë rurëta munanqantsik alli o mana alli kanqanta cuentata qokuyta yachakunapaq (Prov. 2:11).
RURËTA MUNANQËKI IMANÖ KANQANTA ALLI MUSYË
3. ¿Imanirtan imatapis manaraq decidirnin alliraq musyapakushwan? Juk ejempluwan willakaramuy.
3 Imatapis alli decidinapaqqa, puntataqa alliran musyapakunantsik tsë rurëta munanqantsik imanö kanqanta. Këllaman pensarishun: juk nuna alläpa qeshyarnin doctorman ëwanman, y doctorqa manaraq tapuparnin y exämintapis manaraq rurarnin ima jampitapis upunampaq ninman. Tsëqa, ¿allitsuraq kanman? Manam. Ima jampitapis upunampaq ninampaqqa, imapita qeshyanqantaran alli musyanan. Tsënöllam imata decidita munarpis, tsë ruranantsikpaq kaq imanö kanqantaraq alli musyapakunantsik. Peru ¿imanötan tsëta musyashwan?
4. Proverbius 18:13 ninqannö, ¿imanötan segurakunkiman rurëta munanqëki imanö kanqanta musyanëkipaq? (Fötukunata rikäri).
4 Imanö kanqanta alli musyanëkipaqqa tapukunëkim. Këllaman pensarishun: amïguykikuna juntakäyanqanman invitariyäshunkiman. Peru musyankimantsu tsë reunionta pï patsëkätsinqanta, imakunata rurayänampaq kaqta o imanö kanampaq kaqta. Tsëqa, ¿imatataq puntata rurankiman? Kënömi tapukunëki: “¿Mëchötan y imëtan kanqa? ¿Ëkaqtan y pikunatan ëwayanqa? ¿Pitan tsë reunionchö encargädu kanqa? ¿Imakunatataq rurayanqa? ¿Washkutaqa qarakuyanqatsuraq?”. Tsë llapankunata musyanqëkim yanapashunki ëwanëkipaq o mana ëwanëkipaqpis alli decidinëkipaq (leyi Proverbius 18:13).
Imanö kanqanta musyanëkipaq tapukuy. (Leyi 4 kaq pärrafuta). a
5. Rurëta munanqëki imanö kanqanta musyapakurirqa, ¿ima mastataq rurankiman?
5 Tsë llapankunata musyapakurirqa, kananqa kënönam pensanëki: “Diosta mana respetaq nunakuna ëwayaptinqa o washkuta qarakuyaptinqa, ¿allitsuraq kanqa? ¿Pipis mana controlaptintsuraq mana alli rurëkunaman chäkuriyanqa? (1 Pëd. 4:3). ¿O allitsuraq kanqa tsëman ëwanärëkur reunionman faltanqä o yachatsikoq mana yarqunqä?”. Tsëkunaman alli pensanqëkim yanapashunki alli kaqta decidinëkipaq. Peru ¿tsëkunata musyanqëkillawantsuraq decidirinkiman ëwanëkipaq? Manam. Kananqa pensanëki tsë asuntupaq Jehovä imata pensanqantam (Prov. 2:6).
JEHOVÄ IMATA PENSANQANTA MUSYËTA PROCURË
6. Santiägu 1:5 ninqannö, ¿imanirtan Jehoväta mañakunkiman yanapashunëkipaq?
6 Jehoväta mañakuy tsë asuntupaq imata pensanqanta entiendinëkipaq. Jehoväqa, pipapis yachënin pishiptinqa ‘mana medishpam qaran, y manam qarakunqampita imatapis nikuntsu’ (leyi Santiägu 1:5). Jehoväpa yachëninmi yanapashunki rurëta munanqëki pë munanqannö o mana munanqannö kanqanta musyanëkipaq.
7. ¿Imanötan musyankiman ima asuntupaqpis Jehovä imata pensanqanta? Juk ejempluwan willakaramuy.
7 Jehoväta yanapashunëkipaq mañakurirqa, imanö contestashunëkipaq kaqtam alkäbu kanëki. Këllaman pensarishun: juk mana reqinqëki markapa viajëkar oqrakärirqa, ¿imatataq rurankiman? Tsë markata alli reqeq nunatam tapukunkiman. Peru ¿tapurirllatsuraq ëwakunkiman? Manam. Tsëpa rantinqa, contestashunëkitam shuyänëki y nishunqëkitam alli entiendinëki. Tsënöllam yanapashunëkipaq Jehoväta mañakurirpis, nishunqëkita wiyaq cuenta, tsë asuntupaq Jehovä ima ninqanta y consëjunkunata Bibliachö ashinëki. Punta kaq pärrafuchö amïguykikuna invitayäshunqëkiman pensarishun. Tsë reunionman manaraq ëwarmi cuentachö katsinëki mana alli fiestakunapaq, mana alli amïgukunawan juntakëpaq y Diospa Gobiernunta puntaman churëpaq Biblia ninqankunata (Mat. 6:33; Rom. 13:13; 1 Cor. 15:33).
8. ¿Imatataq rurankiman imatapis rurëta munanqëkikunapaq masllata musyëta munarqa? (Fötuta rikäri).
8 Peru capazchi imatapis rurëta munanqëkikunapaq musyëta munar tapukunki. Y capazchi juk wawqi o juk pani imanö ruranëkipaq kaqta nishunki. Tsënö kaptimpis, rurëta munanqëki asuntupaqqa kikikim alli estudianëki. Tsëpaq parlaq tëmakunataqa tarinki, Jehoväpa testïgunkuna yachakur ashinapaq neqchö y Alli kawakunapaq Bibliachö consëjukuna neq publicacionchömi. ¿Imatataq yarpankiman imatapis decidinëki kaptinqa? Tsë decidinqëki Jehovä munanqannö kanantam.
Tsë asuntupaq Jehovä imata pensanqanta cuentachö katsi. (Leyi 8 kaq pärrafuta). b
9. ¿Imanötan musyashwan decidinqantsikkuna Jehovä munanqannö kanqanta? (Efesius 5:17).
9 ¿Imatataq rurashwan decidinqantsikkuna Jehovä munanqannö kanqanta següru kanapaq? Tsëpaqqa, Jehovä Diosnintsik imanö kanqantam alli musyanantsik. Proverbius 9:10 textuchömi kënö nin: “Alli entiendeqqa tikrantsik, Teyta Dios limpiu kanqanta musyarmi”. Tsëmi imatapis decidinqantsik alli kanqanta musyanapaq, puntataqa Jehovä Diosnintsik imanö kanqanta, imakunata munanqanta, imata kuyanqanta y imata chikinqantaraq alli musyanantsik. Kënömi pensanantsik: “Jehovä imanö kanqantaqa clärunam musyä. Tsëqa, ¿imata decidinqäraq pëpaqqa mas alli kanqa?” (leyi Efesius 5:17).
10. Familiantsikkunata cäsunantsikpa rantin o markantsikchö costumbrikunata qatinantsikpa rantinqa, ¿imanirtan Bibliachö consëjukunata cäsukunantsik?
10 Jehovä munanqankunata ruranapaqqa, höraqa familiantsikkuna munayanqan kaqkunatam dejanantsik. Këllaman pensarishun: capaz wakin papäkunaqa warmi wamrankunata casaratsita munayanqa qellëyoq wawqiwan. Tsëtaqa capaz munayanqa wamrankuna mana faltapakunanta o alli atiendishqa kananta munarnin. Peru tsë wawqi Diosta shumaq mana sirwiptinqa, ¿allitsuraq kanman? Pëwan casaratsiyaptinqa, ¿piraq wamrankunata yanapanqa Dioswan mas amïgu kanampaq? ¿Imataraq Diosnintsik tsë asuntupaq pensan? Tsëtaqa musyëta puëdintsik Mateu 6:33 textuta leyirmi. Tsëchömi nimantsik “Diospa Gobiernunta” mas puntaman churanapaq. Papänintsikkunata o markantsikchö costumbrikunata respetarnimpis, masqa munantsik decidinqantsikkunawan Jehovä Diosnintsik kushishqa kanantam.
IMATA DECIDINËKIPAQPIS ALLIRAQ PENSË
11. Filipensis 1:9 y 10 textu ninqannö, ¿imatan yanapashunki imatapis manaraq decidirnin alli akranëkipaq?
11 Decidita munanqëkikunapaq Bibliachö consëjukuna ima ninqanta musyarirqa, imata decidinëkipaq kaqtam alli akranëki (leyi Filipensis 1:9, 10). ¿Y imanötan tsëta rurankiman? Tsëpaqqa yanapashunki tsë decidinëkipaq kaq imaman chätsishunëkipaq kaqta o imanö yanapashunëkipaq kaqta alli entiendinqëkim. Höraqa tsëta musyananqa fäcil-llam kanqa, peru höraqa manam fäciltsu kanqa. Tsënö kaptimpis alli pensëta yachanqëki y entiendinqëkim yanapashunki, decidinan mana fäcil kaptimpis, alli kaqta akranëkipaq.
12, 13. Imatapis alli entiendinqëkiqa, ¿imanötan yanapashunki trabäju asuntuchö mas alli kaqta decidinëkipaq?
12 Këllaman pensarishun: trabäjuta ashikarnin ishkë trabäjuta tarinkiman. Tsëqa capazchi musyapakurinkiman tsë trabäjukuna imanö kanqanta, imë höra yëkunëkipaq kaqta y karuchö o amänuchö kanqanta. Ishkan trabäjupis juk cristiänupaqqa allillam kanman. Tsëqa capazchi mas gustashunqëki kaqta o maslla pagayanqan kaqta akrëta munankiman. Peru manam tsëllatatsu cuentachö katsinëki, sinöqa maskunamanran pensanëki.
13 Këllaman pensarishun: ¿mëqan trabäjuraq yanapashunki reunionkunaman ëwanëkipaq, familiëkiwan mas juntu kanëkipaq y familiëkiwan juntu Diosnintsikpita yachakuyänëkipaq? Tsëkunaman pensanqëkim yanapashunki qellëllaman pensanëkipa rantin mas väleq kaqkunata puntaman churanëkipaq o Jehovä Diosnintsikta y familiëkitapis mana dejanëkipaq. Tsëkunata cuentaman churarnin alli decidiptikiqa, Jehovämi bendicishunki.
14. ¿Imanötan alli pensëta yachanqantsik y kuyakoq kanqantsik yanapamäshun creikuyanqanchö jukkunapaq atäju mana kanantsikpaq?
14 Alli pensëta yacharninqa, imata decidirpis cuentachömi katsishun wakinkuna imanö sientikuyanqanta, tsënöpam “creikuyanqanchö” atäju kashuntsu (Filip. 1:10). Y imanö vistikunantsikpaq o altsapäkunantsikpaq decidinqantsik höram, wakinkuna imanö sientikuyanqanta cuentachö katsishwan. Capaz gustamashwan imanö altsapäkunqantsik o vistikunqantsik. Peru ¿imataraq rurashwan imanö vistikunqantsikwan o altsapäkunqantsikwan wawqi panikuna o juk nunakunapis mana alli sientikuyaptinqa? Alli pensëta yacharninqa, imanö sientikuyanqantam respetashun. Y kuyakoq kanqantsik y humildi kanqantsiknam yanapamäshun imatapis ‘wakinkunapa biennimpaq’ ruranantsikpaq (1 Cor. 10:23, 24, 32; 1 Tim. 2:9, 10). Tsënömi imatapis decidinqantsikkunachö wakinkunata respetanqantsikta y kuyanqantsikta rikätsikushun.
15. Decidinqëkita cumplinëkipaqqa, ¿imakunamantan pensanëki?
15 Imatapis alläpa precisaqta decidirninqa, tsë decidinqëkita cumplinëkipaq imakuna yanapashunëkipaq kaqmanmi alli pensanëki. Jesusqa clärum nirqan imata rurarpis ‘ëkata gastanantsikpaq’ kaqman alli pensanapaq (Lüc. 14:28). Tsëmi decidinqëkita cumplinëkipaqqa, ëka tiempu ushanëkipaq kaqta, ëkata gastanëkipaq kaqta y imanö ruranëkipaq kaqta alli pensanëki. Capazchi wakin cäsukunachöqa familiëkita willanqëki alli kanqa, tsënöpa pëkunapis yanapayäshunëkipaq. ¿Imanirtan imanö ruranëkipaq kaqta alli patsätsinkiman? Alli patsätsipakurmi musyanki ima cambiukunata ruranëkipaq kaqta o juknöpapis ruranëkipaq kaqta. Tsënöllam imanö ruranëkipaq kaqta familiëkikuna niyäshuptikiqa, respëtuwan wiyanëki; tsënöpam pëkunapis gänas gänaswan yanapayäshunki (Prov. 15:22).
ALLI KAQTA DECIDINËKIPAQ KALLPACHAKUY
16. ¿Imakunatataq rurankiman decidinqëki alli yarqunampaq? (Leyi “ ¿Imanötan alli kaqta decidinkiman?” neq recuadruta).
16 Këchö yachakunqantsikkunata rurarqa, listunam këkanki rurëta munanqëkikunata decidinëkipaq. Ruranëkipaq kaq imanö kanqantam alli musyanëki y Jehoväpa consëjunkunatam Bibliachö ashinëki. Tsëkunata rurarirqa, Jehovämanmi mañakunëki ruranqëkikuna alli yarqunampaq.
17. ¿Pillatan yanapamënintsikta puëdin imatapis alli decidinapaq?
17 Unë decidinqëkikuna alli yarqushqa kaptimpis, manam pensanëkitsu imatapis allillata decidita yachanqëkitaqa, tsëpa rantinqa yachëyoq kanëkipaq Jehovälla yanapashunqëkitam imëpis yarpänëki. Pëllam yanapamënintsikta puëdin rurëta munanqantsikkuna imanö kanqanta musyanapaq, alli entiendinapaq y decidinqantsikkuna imakunaman chätsimänantsikpaq kaqta o yanapamänantsikpaq kaqta alli musyanapaq. Tsëkunata musyarllam imatapis alliqa decidishun (Prov. 2:1-5). Tsëmi Teyta Jehovä munanqannö imatapis decidinëkipaqqa, imëpis yarpänëki pëlla yanapashuynikita puëdinqanta (Sal. 23:2, 3).
28 KAQ CANCION ¿Imanöraq Jehoväpa amïgun kashwan?
