Cada watam mëtsika nunakuna Diosta sirwiyänampaq bautizakuyan. Tsëpaqmi wanantsik mas juntakänantsik wayikunata. Tsëmi Obrakunata y Plänukunata Rikaqkunaqa, 2020 watachö 2.700 Diosta adorana wayikunata rurayänampaq y altsayänampaq patsätsipakuyarqan. a

 Tsënö kaptimpis, Coronavïrus qeshya qallariptinqa mananam patsätsipakuyanqanta rurëta puëdiyarqannatsu. Publicacionkuna Kanampaq Rikaqkunapitam, wawqi panikunapa salorninkunata cuidayänampaq y gobiernukunata cäsukurmi patsätsipakuyanqankunata manana rurayänampaq niyarqan. Manaraq kë qeshya kaptinmi, 2020 wataqa 1.700-pitapis masta Diospa Gobiernumpita yachakunapaq wayikunata rurayashqa y altsayashqa. Y manam tsëllatsu, Betel wayikunatapis pachakpitapis mastam rurar ushayashqa. Rikärishun ishkë markakunachö Betel wayita rurayanqanta, y imanö wawqi panikunata yanapanqantapis.

 Camerunchö Betel wayi. Duäla markachö këkaq Betel wayiqa takshalla y unëna karmi, imëkampis altsëpaq karqan. Tsëmi Publicacionkuna Kanampaq Rikaqkunapitaqa altsëta munëkarpis, alläpa gastukuna kanampaq kaqta rikarnin altsayarqannatsu. Tsëpa rantinqa, juk sitiuchö rantita o listu wayita rantir altsëtam munayarqan. Peru mananam ni mëqantapis rurayarqannatsu.

 Duäla markachö autoridäkuna carretërata rurayänampaq kaqtam wawqikunaqa musyariyarqan. Tsë carretëraqa, asamblëakunata rurayänan localpa lädumpam pasanan karqan. Y Betel wayiman luzta, yakuta y desäguita churayänampaqpis yanapakurqanmi. Tsëta musyarirmi Jehoväpa Testïgunkunata Pushaqkunaqa, tsëchö rurayänampaq rantiyarqan.

 Wawqikunaqa ras o saslla rurayänampaq y qellëta mana alläpa gastayänampaqmi, obrakunata ruraq nunakunata contratayarqan. Tsëta rurayanqanmi yanapakurqan alläpa mana gastakuyänampaq. Y manaraq Coronavïrus qeshyä kaptinmi, wawqi panikunaqa tsë rurayanqan Betel wayiman ewkuyarqan.

 Camerun Betel wayichö wawqi panikunaqa kushishqa y mas allinam trabajayan. Pëkunaqa, Jehovä Diospa juk shumaq qarënin kë wayi kanqantam niyan. Tsëmi juk wawqi warminwan kënö nin: “Kananqa Jehoväpaqmi masta rurëta munayä, y alläpam agradecikuyä shumaq cuidayämanqampita”.

 Tojolabal (Mëxicu) Idiömaman Tikratsiyänan Wayi. Mëtsika watakunapam, Centroamëricachö tojolabal idiömaman tikratsiyarqan. Tojolabal idiömata parlaq nunakunaqa, Altamiränu y Las Margarïtas markakunachömi parlayan. Tsë markakuna Betel wayipita alläpa karuchö kaptinmi, yanapakoq wawqikunapaqqa fäciltsu karqan yanapakuyänampaq. Tsëmi Betelchö trabajaq wawqikunaqa puëdiyaqtsu, Bibliapita yachakunapaq yarqamunqankunata y wiyanapaq grabacionkunata tiempunchö rurëta.

 Tsëta rikarmi Publicacion Qellqaqkunata Rikaq wawqikunaqa, Betel wayipita tojolabal idiömata parlaq markaman ëwakuyänampaq niyarqan. Tsëmi chakrata rantiyänampa o wayita alquilayänampa rantin, rurashqa wayillatana rantiyarqan y altsayarqan. Tsëmi yanapakurqan alläpa mana gastayänampaq.

 Betel wayichö yanapakoq wawqim kënö cuentakun: “Chunka watapana Betelchö yanapakurpis, manam ni juk familiallatapis tojolabal parlaqtaqa tarirqätsu. Peru kananqa tojolabal parlaq nunakunapa markanchö karmi, pëkunawan cada junaq parlakuyä. Tsëmi yanapamarqan idiömäta yarpänäpaq y trabäjüta mas alli ruranäpaq”.

 2021 watapaq Coronavïrus qeshya manana kaptinqa, 75 Betel wayikunata rurayänampaq y Jehoväta alli sirwita yachakunapaq escuëlakunata altsayänampaqmi patsätsipakuyashqa. Y puwaq Betel wayikunata rurayänampaqmi patsätsipakuykäyan, y juknin kaqqa Rämapu (Nueva York) markachömi. Argentïna y Italia Betel wayikunachö yanapakoqkuna, juk läduman ëwakuyänampaqpis patsätsipakuykäyanmi. Y manam tsëllatsu, waranqapitapis masta Diospa Gobiernumpita yachakunapaq mushoq wayikunata rurayänampaq, 6.000-pitapis mas juntakäyänan wayikuna mana alli kaptinmi jukta rurayänampaq y 4.000 Diospita yachakuyänan wayita jukta rurayänampaqmi patsätsipakuykäyan.

 ¿Ima qellëwantan kë llapanta rurayan? Centroamërica Betel wayichö yanapakoq wawqi Läzaru Gonzälizmi, tojolabal idiömaman tikratsiyanqan wayita rurayanqampaq kënö nin: “Tsëchö täraq wawqi panikunapaqqa manam qellëninkuna kanllatsu. Tsëmi kikinkunapitaqa, tsë wayita rurëta puëdiyanmantsu karqan. Entëru Patsachö wawqi panikuna qellëninkunata churakuyanqanwanmi, tsë wayita y juk markakunachö parlakuyanqan idiömakunaman tikratsiyänampaq wayikunata rurayashqa. Tsënö qellëninkunawan yanapakoq wawqi panikunatam, llapan shonqükunawan agradecikuyä”. Rikanqantsiknöpis, churakunqantsik qellëwanqa imëkatam rurëta puëdiyan. Juknöpaqa, qellënintsikta churakuntsik donate.pr418.com päginapam.