Cada watam, më tsë nacionchö llapan tiempunkunawan Diospita yachatsikur yanapakoqkunata, Galaad Escuëlaman ëwayänampaq invitayan. Tsë escuëlaqa, Watchtowerpa Galaad Escuëla a jutiyoqmi, y tsëqa Nueva Yorkpa Patterson markanchömi këkan. Tsë escuëlachöqa, Diosta sirwiyanqanchö mas yanapakuyänampaqmi imëkata yachatsiyan. Y tsëchö yachakuyanqanwanmi, congregacionkunachö y Betel wayikunachö këkaq wawqi panikunawan mas alli yanapakuyan.

 Galaad Escuëlamanqa, më tsë nacionkunapitam ëwayan. Tsënö kanqanqa rikätsikun, 2019 wata 147 kaq cläsiman, 29 nacionkunapita 56 wawqi panikunata invitayanqanmi. Tsë escuëlapita yarqoqkunaqa, Diosta sirweqkunawanmi llapan tiempunkunawan yanapakuyan. Wakinmi, Betel wayikunachö yanapakuyan, wakinnam misionëru o precursor especial kayan, y wakinnam congregacionkunata watukar yanapakuyan.

 Tsë escuëla manaraq qallaptinmi, puntallapitana imëkata patsätsipakuyan. Këllapaq parlarishun: Viajayänampaq Kaqta Rikar Principal Oficïnachö yanapakoqkunam, tsë escuëlaman invitayanqan wawqi panikunapaq, avionwan ëwayänampaq pasäjinkuna rantipuyan. Juk nacionpita 147 kaq cläsichö kaqkuna, Patterson markaman ëwayänampaq y tsëpita kutikuyänampaqqa, cada ünupaqmi 1.075 dölartanö pagakuyarqan. Islas Salomon niyanqampita estudiantikunaqa, chusku avionwanran Patterson markaman chäyarqan y kimawanran kutiyarqan. Pëkunaqa 35.400 kilömetrutam viajayarqan. Tsënö viajayänampaqqa, cada ünupaqmi 2.300 dölarta pagakuyarqan. Tsë pasäjikunachö alläpa mana gastakuyänampaqmi, Viajayänampaq Kaqta Rikar yanapakoqkunaqa, juk progrämata utilizäyan mas barätu kaqta tariyänampaq. Juk pasäjita separarirmi, tsë progrämaqa atska semänakunapa o killakunapa, mas barätu kaqta ashir sïguin. Viajayänampaq Kaqta Rikar yanapakoqkunaqa, seguïdu viajayaptin mas barätuchö rantikuyanqan pasäjikunatam ashiyan o juk wawqi panikunata mëyaq viajayanqampita qarayanqan tïkikunata apatsiyanqantam utilizäyan.

 Tsë escuëlaman wakin ëwaqkuna Estädus Unïdus nacionman yëkuyänampaqqa, juk permïsutaran wanayan. Tsëmi Testïgukunapa Principal Oficïnankunachö Ley Asuntukunata Rikaqkuna, estudiantikunapaq tsë permïsuta jorqayan. Tsë papelkunachöqa, cada ünupaqmi 510 dölartanö gastayan.

 ¿Imanötan Galaad Escuëlachö yachakuyanqanqa noqantsiktapis yanapamantsik? Suresti Asiäticu nir reqiyanqampa juk nacionninchö këkaq juk congregacionmanmi, Galaad Escuëlapita juk wawqiwan warminta mandayarqan. Tsëchömi creikoqkunata rikar Hendra Gunawan wawqi yanapakun, pëmi kënö willakun: “Unëqa manam ni juk precursor regularllapis congregacionnïkunachö karqantsu. Peru tsë wawqiwan warmin kushishqa yachatsikoqta rikarmi, wakimpis precursor këta qallëkuyarqan. Y tsëpita tiempuwanqa, congregacionnïkunapita juk panitam Diospa Gobiernumpita Yachatsikoqkunapaq Escuëlaman invitayarqan”.

 Sergio Panjaitan jutiyoq wawqim, Galaad Escuëlapita yarqushqa juk ishkë wawqikunawan Suresti Asiäticuchö nacionkunata rikaq Betelchö trabajan. Pëmi kënö cuentakun: “Tsë escuëlachö kë wawqikuna yachakuyanqanqa, kikinkunapaq y noqakunapaqmi juk bendicion kashqa. ¡Imëkatam yachakuyashqa! Yachakuyanqampita gälakuyänampa rantinmi, noqakunatapis yachatsiyäman. Tsëqa alläpam yanapayäman, y noqakunanam tsënölla wakinkunata yanapayä”.

 ¿Imanötan kë escuëla rurakänampaq gastukunataqa pagakuyan? Entëru Patsachö Yachatsikunapaq qellëta churayanqanwanmi. Wakinqa, Internetchö donate.pr418.com neqpam qellëninkunawan yanapakuyan. Qellënikikunawan tsënö yanapakuyanqëkipitam alläpa agradecikuyaq. Tsëmi, më tsë nacionkunachö llapan tiempunkunawan Diospita yachatsikoqkunata, tsë escuëlaman ëwayänampaq yanapan.