“¡19 watapanam shuyarëkarqä!”. ¿Imatataq tsë wawqi shuyarëkarqan? Mushoq Patsachö Kawaqkunapaq Diospa Palabran Mateu-Revelacion Biblia, Bengalï idiömanchö yarqunantam. Mëtsikaq nunakunam, Mushoq Patsachö Kawaqkunapaq Biblia parlayanqan idiömachö yarquptin tsënö niyan. Peru ¿musyarqëkiku tsë Bibliakuna yarqunampaq imëkata patsätsiyanqanta?

 Puntataqa, Testïgukunata Pushaqkunapa Yachakunapaq Ruramoqkunata rikaqkuna niyanqannömi, juk idiömaman tikratsiyänampaq patsätsipäkuyan. ¿Ëka tiempuchötaq Bibliata juk idiömaman tikratsiyan? Nueva Yorkpa Warwick markanchö Juk Idiömaman Tikratseqkunata Yanapaqkunawan trabajaq wawqi Nicholas Ahladismi, kënö nin: “Tsëqa, imëkapitaran kanqa. Këkunatam cuentachö katsiyänä: juk idiömaman tikratsir ëkaq yanapakuyänampaq kaqta, tsë idiömaman tikratsi fäcil o mana fäcil kanqanta o Biblia qellqakanqan witsan vïda imanö kanqanta leyeqkuna musyayanqanta o mana musyayanqantam. Jina juk markapita juk markaman tsë parlayanqan idiöma imanö cambianqampitam. Diospa Palabran Mateu-Revelacion Bibliataqa, juk o kima watachömi rurar ushayan. Y llapan Bibliatanam, chusku o mas watakunachö rurar ushayan. Y makillapa parlayanqan idiömamanqa, mas tiempuchöran ushayan”.

 Bibliata juk idiömaman tikratsiyänampaqqa, manam tsë idiömaman tikratseqkunallatatsu wanayan. Jina tikratsiyanqanta leyir yanapakoq wawqi panikunatapis wanayanmi, y tsë leyeqkunaqa, höraqa juk nacionkunapitapis kayanmanmi. Leyiyanqanchö ima alliyänan pishinqanta qellqayanqanmi, cläru y fäcil-lla entiendina kanampaq yanapakun. Juk idiömaman tikratseqkunata yachatseq Sudafrica nacionpita juk wawqim kënö nin: “Juk idiömaman tikratseqkunaqa, Jehoväpa Palabranta alli traduciyänampaq y leyeqkuna entiendiyänampaqmi kallpachakuyan”.

 Bibliata juk idiömaman tikratsir usharirqa, papelmanmi imprimiyämun y librunö kanampaqmi imëkata rurayan. Tsëpaqqa, papelta, tintata, qaranta rurayanampaq, pegamentuta, qaran shumaq rikakunampaq, plata colorta, cintakunata, höjakunata tsaränampaq telata, qepanman laqayänampaq cartonta y maskunatam utilizäyan. 2019 watachöqa tsëkunata ratiyänampaqqa, 20 millon dölarpitapis mastam gastayarqan. Y tsë watallachömi, Bibliata imprimiyänampaq y më tsëman apatsiyänampaq, wawqi panikunaqa 300 mil hörakunapitapis mas trabajayarqan.

 Bibliata rurarninqa, ¿imanirtan atska tiempu trabajantsik y mëtsika qellëta gastantsik? Juk Nacionkunapaq Publicacionkunata Imprimeqta rikaqkunapita Joel Blue jutiyoq wawqim kënö nin: “Ima publicacionkunata ruranqantsikpitapis, Bibliata mas väleqpaq churarninmi”. Y kënöpis ninmi: “Tsënöpam Diosta alabanqantsikta y pëpita yachatsikunqantsikta, väleqpaq churanqantsikta rikätsikuntsik”.

 Jina Mushoq Patsachö Kawaqkunapaq Bibliataqa, tukuyläyapa leyeqkunapaqmi rurayä. Makillapa leyiyänampaq Brailli niyanqanchöqa, Mushoq Patsachö Kawaqkunapaq Bibliaqa, 10 idiömachömi rurakashqa. Braillichöqa, atska librukunachöran juk Biblia yarqamun y tsëkunata rurayänampaqqa 8 hörasran demoran. Tsë librukunata pelarkuyaptinqa 2,3 metrusmi altun. Y carcelchö kaqkunapaqqa, jukläya qarayoqta mana permitiyaptinmi, cartonpita qarayoqllata Bibliata rurayä.

 Mushoq Patsachö Kawaqkunapaq Bibliata leyeqkunaqa, alläpam agradecikuyan. Republica Democrätica del Congo nacionpa Tombe markanchö kilüba idiöma parlaq congregacionmi, tsënö kanqanta rikätsikun. Tsë markaqa, tsë nacionpa capitalnimpita 1.700 kilömetruchönömi këkan. Tsëchö wawqi panikunapaqa, juk Bibliankunallam kilüba idiömachöqa kayäpoq y manam allillaqa entiendikaqtsu. Reunionkunachö yachatsikuyänampaq preparakoqkunaqa, tsë Bibliallatam mañanakuyaq. Peru 2018 wata agostu killapitaqa, llapan wawqi panikunapam Mushoq Patsachö Kawaqkunapaq Bibliankuna kilüba idiömachö kayäpun.

 Mushoq Patsachö Kawaqkunapaq Bibliata altsapäyanqampaqmi, aleman idiömata parlaq juk pani kënö nin: “Noqaqa manam ‘Bibliatam leyinä’ nïnatsu. Kananqa, ‘¿imë hörataq yapë leyirï?’ nïmi”. Carcelchö llawirëkaq juk nunam kënö nir qellqarqan: “Mushoq Patsachö Kawaqkunapaq Bibliatam qarayämarqan, y tsëmi jukläyana kawakunäpaq yanapëkäman. Kë Bibliata leyir qallanqäpitam, Diospa Palabrantaqa mas alli entiendir qallëkurqö. Jehoväpa testïgunkunatam mas reqita munä, pëkunanö kanäpaq imata ruranäpaq kaqtam musyëta munä”.

 Mushoq Patsachö Kawaqkunapaq Bibliata leyeqkunaqa, churakunqëki qellëwan tsë Bibliata rurayanqampitam alläpa agradecikuyan. Entëru Patsachö Yachatsikunapaq yanapakuyta munarqa, donate.pr418.com neqpa aparatsi. Alläpam agradecikuyaq yanapakuyanqëkipita.