2022 wataqa, mëtsika noticiakunachömi willakayämushqa, guërrakunapaq, qellë pishinqampaq y imëka desgraciakuna kanqampaq. Tsëkuna imanir pasëkanqantaqa Bibliallachömi willamantsik.

¿Imatataq rikätsikun 2022 watachö imëka mana allikuna pasanqan?

 Kë ultimu wata imëka mana allikuna pasanqanmi cläru rikätsikun, Bibliachö willakunqannölla ‘ushanan tiempuchöna’ kawëkanqantsikta (2 Timoteu 3:1). Tsë ushanan tiempuqa, 1914 watam qallarqan. Këchömi yachakunki kanan tiempuntsikpaq Bibliachö puntallapitana willakunqankuna, tsëllaraq pasanqankunachö imanö cumplikëkanqanta.

 “Guërrakuna” (Mateu 24:6).

•   “2022 wataqa Euröpa kinrëchö guërrakuna yapë kaptinmi, imëka mana allikunapa pasayashqa”. a

 “Mallaqë” (Mateu 24:7).

•   “2022 wataqa mana imëpis pasanqannömi alläpa mallaqë kashqa”. b

 “Muyakoq [o shukukoq] qeshyakuna” (Lücas 21:11).

•   “Nunakunaqa yapëmi poliu niyanqanwan qeshyëkäyan, mas nunakunam viruëla del mönu niyanqanwan qeshyëkäyan y coronavïrus qeshyapis sïguinran nunakunata sufritsir. Tsë llapanmi cläru rikätsikun muyakoq qeshyakuna alläpa peligrösu kanqanta, y nunakuna peligruchö këkanqantsikta”. c

 ‘Imëka espantëpaqkuna’ (Lücas 21:11).

•   “2022 wata usya tiemputaqa, alläpa achachanqampitam yarpäyanqa. Mëtsëchömi alläpa achachashqa, tamyam kashqatsu, plantakuna kanqan sitiukunatam nina ushakätsishqa y fuerti tamyam imëkata ushakätsishqa. Tsëkuna pasanqanmi entëru Patsachö imëkata ushakätsishqa. Tsëkunachömi atskaq nunakuna wanuyashqa, y mëtsikaqmi wayinnaq quedayashqa”. d

 ‘Imëka mana allikunata rurayanqan [o ‘desordinta rurayanqan’, nötachö ninqanta rikäri]’ (Lücas 21:9).

•   “Nunakunaqa imëpitapis masmi qellë asuntupaq yarpachakur cölerashqa këkäyan, masqa imëkapis alläpa cuestaptin. Tsëmi 2022 wataqa imëpitapis mas gobiernupa contran huelgata rurayashqa”. e

¿Imanöraq shamoq wataqa kanqa?

 2023 wata ima pasanampaq kaqtaqa manam ni pï musyantsu. Peru musyantsikmi ciëluchö këkaq Diospa Gobiernunqa, ichikllachöna Patsachö imëkata cambianampaq kaqta (Daniel 2:44). Tsë gobiernuqa sufritsimanqantsik kaqkunatam ushakätsinqa, y Teyta Dios Patsachö rurëta munanqantam logranqa (Mateu 6:9, 10).

 Jesucristu ninqanta cäsukur “alkäbu alkäbulla” këkänëkipaqmi niriyaq, tsënöpa kanan witsan pasakunqankunachö, Bibliachö willakunqan imanö cumplikëkanqanta rikänëkipaq (Marcus 13:37). Biblia imanö yanapashuynikita puëdinqanta y shamoq tiempuchö familiëkiwan imanö kawakuyta puëdiyanqëkipita masta musyëta munarqa, Jehoväpa testïgunkunawan parlari.