2022 wata juliu killaqa imëpitapis masmi mëtsëchö alläpa achachëkushqa.

•   “China nacionchömi willakuyan kë killaqa 70 markakunapitapis maschö ishkë kutipana imëpitapis mas achachanqanta” (2022 wata 25 de juliu, CNN noticiëru willakunqan).

•   “Imëpitapis mas achachaptinmi Euröpa nacionkunachö mëtsika montikunata nina ushëkan” (2022 wata 17 de juliu, Internetchö The Guardian periödicu willakunqan).

•   “Domingu junaqqa, Estädus Unïduschö mëtsika markakunachömi alläpa usyaptin imëpitapis mas achachashqa” (2022 wata 24 de juliu, The New York Times revista willakunqan).

 ¿Imanirtan tsënö pasëkan? Tsënölla achachar sïguiptinqa o peoraptinqa, ¿nunapis y imëkapis ushakäkushuntsuraq? ¿Imallatapis Bibliachö tsëpaq ninku?

 Awmi, kanan tiempu alläpa usyar mëtsëchö alläpa achachanqanqa Bibliachö willakunqannömi pasakuykan. Jesusmi nirqan ‘imëka espantëpaqkunata’ y ‘jatun señalkunata’ rikänapaq kaqta (Lücas 21:11). Alläpa usyar unëpitapis mas achachanqanta rikarmi pïmë mantsakashqa këkäyan, y nunapa culpanrëkur kë mundu ushakänantam mantsayan.

 Manam, Diosnintsikqa kë munduta kamashqa nunakuna tsëchö imëpis kawayänampaqmi (Salmus 115:16; Eclesiastes 1:4). Diosnintsikqa manam permitinqatsu kë munduta nunakuna ushakätsiyänanta. Tsëpa rantinqa, ‘patsata ushakëkätseqkunatam [pëqa] ushakätsinqa” (Apocalipsis 11:18).

 Yachakurishun Patsachö alli kawakunantsikrëkur ima masta Diosnintsik ruramunampaq kaqta:

•   “Tsunyaq sitiuchö y tsaki patsachöpis alläpam kushikuyanqa. Imapis mana kanqan pampakunachöpis azafran planta wëtanqannöran wëtayanqa” (Isaïas 35:1). Tsënömi kanqa, Diosnintsikqa manam dejanqatsu kë munduta ushakätsinanta. Tsëpa rantinqa, nunakuna llapan malograyanqantam altsamunqa.

•   “Teyta Dios qam patsata bendiciptikim, imëkapis shumaq wayun. Yakupis mëtsikam kan” (Salmus 65:9). Diosnintsikqa entëru Patsatam juk shumaq huertaman tikratsinqa.

 Alläpa usyarnin imëpitapis mas achachanqampaq Bibliachö ima ninqanta maslla musyëta munarqa “¿Qué dice la Biblia sobre el cambio climático y nuestro futuro?” neqta leyi.

 Bibliachöqa nin Patsachö imëkata malograyanqanta Diosnintsik altsamunampaq kaqtam. Masllata yachakuyta munarqa, “¿Quién salvará el planeta?” neqta leyi.