Entëru Patsachöqa ishkë billon dölarpitapis mastanam guërrapaq armakunata rurar y rantir 2022 watachö gastayashqa. Masqa gastayashqa Ucrania nacionta Rusia nacion atacanqanta rikarshi. Instituto Internacional de Estocolmo para la Investigación de la Paz (SIPRI) niyanqanchö trabajaqkunam, 2023 wata abril killachö këta willakayämushqa:

•   Euröpa kinrëchö nacionkunaqa imëpitapis masshi mëtsika qellëta (13% masta) armakunachö gastayashqa. Tsënö mëtsika qellëtaqa manash Guerra Fría niyan witsampita kananyaq gastashqatsu kayänaq.

•   Rusia nacionpis, imëpitapis masshi (9,2% mas) armakunachö gastashqa, tsëchi armakunachö mas gastaq nacionkunachöqa kima kaq puestuchöna kananqa këkan, unëqa pitsqa kaq puestuchöshi kanaq.

•   Estädus Unïdus nacionqa unënöllash kanampis llapan nacionkuna gastayanqampitapis mas atskata (39% kaqta) armakunachö gastashqa.

 SIPRI niyanqanchö trabajaqkunawan yanapanakoq Dr. Nan Tianmi kënö nin: “Mëchö tsëchöpis armakunachö imëpitapis mas gastayanqanta rikarmi cuenta qokuntsik yamë kawakuyta manana puëdinapaq kaqta”.

 Bibliachöqa unënam willakushqa karqan nacionkunapura chikinakuyänampaq kaqta, peru yamë kawakuyta tarinapaq kaqtapis willakunmi.

•   Bibliachöqa clärum nin “ushanan tiempuchö” kawëkanqantsikta (Daniel 8:19).

•   Bibliachöqa, Daniel libruchömi willakurqan kanan tiempuchö mas puëdeq kaq nacionkuna chikinakuyänampaq kaqta. Tsë puëdeq nacionkunaqa puëdeq kayanqanta rikätsikuyänanrëkurmi ‘ashipänakuyänan’ karqan. Tsërëkurmi “örunta, pläta metalninta y imëka väleq cösasninkunata” gastayänan karqan (Daniel 11:40, 42, 43).

 Tsëkuna pasanampaq kaqta Bibliachö willakunqanta maslla musyëta munarqa, Daniel capïtulu 11 imanö cumplikanqan neq videuta rikë.

•   Bibliachöqa clärum nin llapan gobiernukunata Diosnintsikpa Gobiernun ushakätsinampaq kaqta. Daniel 2:44 textuchömi Diospa Gobiernumpaq kënö nin: “Tsë gobiernutaqa manam ni pï ushakätsinqatsu, ni manam pëpa rantin juk markakunapita gobernantikuna gobernayanqatsu. Tsë gobiernuqa, wakin gobiernukunatam llapanta ushakätsinqa y pëllam imëyaqpis gobernanqa”.

•   Diosnintsik Jehoväqa a pï nunapis mana rurëta puëdinqantam ruramunqa: llapantsikmi ni imatapis manana mantsar yamë kawakushun. Tsënö kawakunapaqqa, ¿imatataq Diosnintsik ruramunqa? Gobiernunmi nunakuna rurayanqan armakunata llapanta ushakätsinqa, y manam permitinqanatsu pipis guërrata rurananta (Salmus 46:8, 9).

 Diosnintsikpa Gobiernun imakunata ruramunampaq kaqta maslla musyëta munarqa, “El Reino de Dios traerá ‘paz en abundancia’” neqta leyi.