¿Noqantsiknö pensaqkunallataku respetashwan? ¿Ima nintan Bibliachö?
Respetakoq këqa “pïmëwampis yamë kawakunapaqmi yanapakun” (Declaración de Principios sobre la Tolerancia de la Unesco, 1995).
Peru respetanakuyta mana yachaqkunaqa chikinakuyman, rimanakuyman, desprecianakuyman, maqanakuyman y hasta wanutsinakuymanmi chäyan.
Tsënö kaptimpis, rasumpa respetakoq kë ima kanqampaqqa jukta juktam niyan. Wakinqa niyan rasumpa respetakoqkunaqa nunakuna imanö kayanqanta o imanöpis portakuyanqanta allillapa rikäyanqantam. Peru wakinqa tsëpaq Bibliachö yachatsikunqanwanmi acuerdu kayan: Bibliachöqa yachatsikun, rasumpa respetakuyta yachaqqa, mana acuerdu karpis nunakunapa religionninkunata y imanö kawakuyanqanta respetanqantam.
¿Bibliachö ninqanqa yanapamashwantsuraq pita mëtapis rasumpa respetanapaq?
¿Ima nintan Bibliachö pita mëtapis respetëpaq?
Bibliachöqa yachatsikun pita mëtapis respetanapaqmi. Kënömi nin: “Llapankuna musyayätsun pensayanqëkillachö mana tsarakuyanqëkita” (Filipensis 4:5). Awmi, pita mëtapis llakipëpa, kuyëpa y alli tratanapaqmi Bibliachöqa nin. Bibliachö ninqanta cäsukoqkunaqa, nunakuna imanö portakuyanqampaq mana acuerdu karpis o pëkunanö mana pensarpis llapankunatam respetayan.
Tsënö kaptimpis, Bibliachöqa clärum willakun nunakuna imanö portakuyänanta Diosnintsik munanqanta. Kënömi nin: “Pëqa nishurqunkinam ima alli kanqanta” (Miquëas 6:8). Diosnintsikqa Palabran Bibliachömi nimantsik alli kawakuyta munarqa imata ruranapaq kaqta (Isaïas 48:17, 18).
Tsë karpis, Diosnintsikqa manam munantsu pitapis juzganantsikta. Bibliachömi kënö nin: “Jukllëllam Leyta Churaq y Juezqa [...]. Peru qamqa, ¿pitan kanki nuna mayikita juzganëkipaq?” (Santiägu 4:12). Diosnintsikqa munan cada ünu imatapis decidinantsiktam, y manam munantsu decidinqantsikpita pitapis culpatsänantsikta (Deuteronomiu 30:19).
Respetakoq këpaq, ¿ima nintan Bibliachö?
Bibliachömi kënö nin: “Tukuyläya nunakunata väleqpaq churar respetayë” (1 Pëdru 2:17). Tsëmi Bibliachö ninqanta cäsukoqkunaqa pita mëtapis imanö kawakuptimpis y ima religionpita kaptimpis respetayan (Lücas 6:31). Awmi, nunakuna imata creiyanqampaq o imanö pensayanqampaq mana acuerdu karpis, llapankunatam respetayan. Mana allipa tratayänampa rantinmi nunakunata Señor Jesusnö tratanqannö tratayänampaq kallpachakuyan.
Juk kutim Señor Jesusqa juk religionyoq warmita parlaparqan. Tsë warmiqa juk nunawanmi täkurqan, y tsë nunaqa manam nunantsu karqan: Jesuspaqqa, tsë warmi tsëta ruranqanqa mana allim karqan, peru tsënö karpis Jesusqa shumaq respëtuwanmi tsë warmita tratarqan (Juan 4:9, 17-24).
Kanan tiempu cristiänukunapis Jesus ruranqannöllam wiyakuyta munaqkunataqa pita mëtapis Bibliapita yachatsiyan, peru shumaq ‘respetakurmi’ yachatsiyan (1 Pëdru 3:15). Kikin Bibliachömi kënö nin: “Señorpa sirweqninqa manam pelyar kanantsu, sinöqa llapankunatam shumaq tratanan, alli yachatsikuytam yachanan, mana alli tratayaptinmi controlakuyta yachanan (2 Timoteu 2:24). Tsëmi Señor Jesusman creikoqkunaqa mana ni pitapis obligayantsu imata creiyänampaq o mana creiyänampaq kaqta.
Chikikoq këpaq, ¿ima nintan Bibliachö?
Bibliachöqa nin ‘llapankunawan yamë kawakunapaqmi’ (Hebrëus 12:14). Llapankunawan yamë kawakuyta munaqkunaqa manam ni pitapis chikiyantsu, tsëpa rantinqa, pita mëtapis shumaq tratayänampaqmi kallpachakuyan. Peru tsënö kaptimpis, jukkuna kuyayänanrëkurllaqa manam Bibliachö ninqampa contranta rurayantsu (Mateu 5:9). Bibliachömi nin rasumpa cristiänu kaqkunaqa mana alli tratayaptimpis, kuyakoq këta procurayänampaq. Tsëmi chikikäyaptimpis llapankunata kuyayänan (Mateu 5:44).
Bibliachömi nin Diosnintsiktaqa nunakunata mana alli tratayänanta ni ‘ichikllapis mana gustanqanta’ o ‘alläpa melananqanta’. Tsënö ninqanwanmi entiendintsik nunakuna mana allikunata rurayänantaqa Diosnintsik mana munanqanta. Peru cambiëta munayaptin y Diosnintsik mandakunqankunata cäsukur kawakuyta munayaptinqa, Pëqa yanapanmi y perdonanmi (Isaïas 55:7).
Pita mëtapis respetëpaq Bibliachö imakunata ninqankuna
Tïtu 3:2: “Pensayanqanllachö mana tsarakuyänampaq y llapan nunakunawan yachanëpaq kayänampaq”.
Kikinkunapa pensëninkunallachö mana tsarakoqkunaqa, ima asuntupaqpis jukläya jukläya niyaptimpis, manam piñakuntsu ni ajäkuntsu, llapankunatam respetakun.
Mateu 7:12: “Alli tratayäshunëkita munayanqëkinölla pitapis tratayë”.
Llapantsikmi munantsik respetamänata y ninqantsikkunata y imanö sientikunqantsikta cuentachö katsiyänanta. ¿Imanötan Jesus tsënö mandakunqanta cäsukushwan? Tsëta musyëta munarqa, leyiri kë yachatsikuyta “¿Qué es la Regla de Oro?”.
Josuë 24:15: “Kanan akrakuyë pita sirwiyänëkipaq kaqta”.
Wakinkuna imatapis decidikuyanqantaqa respetanantsikmi, tsënöpam llapanwampis alli kawakushun.
Hëchus 10:34: ‘Diosqa llapan nunatapis igualpam rikan’.
Diosnintsikqa llapantapis igualpam rikan, pëqa manam juk markapita kayaptin, yana o yulaq kayaptin o warmi kayanqampita o ollqu kayanqampita o unë imanö kashqa kayanqampitaqa pitapis mana alli tratantsu. Tsënöllam Diosnintsik mandakunqanta cäsukoqkunapis wakinkuna imanö kayaptimpis respetayan.
Habacuc 1:12, 13: “[Diosqa] mana alli rurëkunataqa alläpam chikin”.
Pï mëtapis igual-lla tratarpis. Diosnintsikqa mananam permitinqanatsu nunakuna imëpis mana allillata rurakuyänanta. Tsë asuntupaq masllata musyarita munarqa. Rikäri kënö neq videuta ¿Imanirtan sufrinantsikta Diosnintsik permitin?
Romänus 12:19: “Teyta Dios cölerakunanta dejayë. Kënömi qellqarëkan: “‘Dispuninqä tiempuchömi, rurëninkunamannö castigashaq’ ninmi Teyta Jehovä”. a
Jehovä Diosqa dispunishqanam juk tiemputa justiciata ruramunampaq y manam pitapis justiciata ruranampaq o vengakunampaq permïsuta qoshqatsu. Tsëta maslla entiendirkunëkipaq leyiri kënö neq yachatsikuyta: “¿Alguna vez se hará justicia en el mundo?”.
a Jehovämi Diosnintsikpa jutin (Salmus 83:18). Leyiri kënö neq yachatsikuyta: “¿Pitan Jehovä?”.
Capaz këkunapis gustashunki
REQIYÄMË
¿Munankimanku visitayänaqta?
¿Munankiku Bibliapita maslla yachakuyta o Jehoväpa testïgunkuna imanö kayanqanta musyëta?
