Cada watam drögakunapa y tsëtanö rurayanqampa culpan mëtsika nunakuna wanuyan o wañuyan. Coronavïrus qeshya witsannäqa, mas nunakunam drögakunata utilizar qallayashqa. Atskaq nunakunatam Bibliachö ninqan drögakunata dejayänampaq yanapashqa. Qamqa, ¿drögakunata dejanëkipaqku kallpachakuykanki? Tsënö kaptinqa, këchö consëjukunam yanapashunki. a

Këchöqa këkunapitam yachakunki:

•  Ima viciutapis dejanëkipaqqa, ¿imanirtan Bibliachö yanapakuyta ashinëki?

•  Bibliachö chusku consëjukunam ima viciuta dejanëkipaqpis yanapashunki

•  Bibliachö kënö ninqanmi ima viciutapis dejanëkipaq yanapashunki

•  Bibliaqa mas nunakunatapis yanapashqam viciukunata dejayänampaq

•  ¿Biblia michäkunku viciuyoq nunakuna doctorman ëwayänanta?

•  ¿Biblia michäkunku jampikunapaq drögakunata utilizänantsikta?

 Masta musyapakoq nunakunam niyan, japallankuna karnin, estresyoq karnin, imapaqpis alläpa yarpachakur o deprecionyoq karnin, nunakuna ima viciumampis chäyanqanta. Bibliachö ninqanmi yanapashunki ima viciumampis chätsikoq problëmakunata vencinëkipaq, y Diospa amïgun kanëkipaq imata ruranëkipaq kaqtapis yachakunkim (Salmus 25:14). Qampaq mana puëdipaqnö kaptimpis, Bibliaqa imata vencinëkipaqpis yanapashunkim (Marcus 11:22-24).

1.  1. Jehoväpita b yachakuy (Juan 17:3). Jehoväqa llapantam kamashqa y poderninqa manam ushakantsu. Peru manam tsëllatsu, pëqa ciëluchö këkaq kuyakoq Teytëkim. Pëqa amïguyki këtam munan, y poderninwanmi yanapashuynikita munan (Isaïas 40:29-31; Santiägu 4:8). Kuyamarnintsik ruranqanta chaskikuptikiqa, shamoq tiempuchö shumaq kawakunëkipaqmi änishunki (Jeremïas 29:11; Juan 3:16).

2.  2. Jehoväta yanapashunëkipaq mañakuy. Diosman mañakur ima viciutapis dejanëkipaq rogakuy, tsënöpa ’limpiu [kanëkipaq] y Diosta kushitsinëkipaq’ (Romänus 12:1). Pëqa ‘nunakuna mana katsiyanqan poderta’ chaskinëkipaqmi, santu espïritunwan o poderninwan yanapashunki (2 Corintius 4:7; Lücas 11:13). Tsëmi yanapashunki drögakunata dejanëkipaq, y ichikllapa ichikllapa “jukläya nunana” kanëkipaq (Colosensis 3:9, 10).

3.  3. Dios imata pensanqampita yachakuy (Isaïas 55:9). Diosmi yanapashunki ‘jukläyana pensanëkipaq kallpachakur sïguinëkipaq’ o imanö pensanqëkita cambianëkipaq, tsëmi yanapashunki ima viciutapis dejanëkipaq (Efesius 4:23). Dios imata pensanqanqa Bibliachömi këkan, tsëmi cada junaq Bibliata leyinëki (Salmus 1:1-3). Wakin nunakunataqa jukkunam yanapayashqa Bibliachö ninqanta entiendiyänampaq (Hëchus 8:30, 31). Jehoväpa testïgunkunaqa juk libruwanmi Bibliapita shumaq yachatsikuyä. Reunionnïkunaman shamunëkipaqpis invitayaqmi, tsëchömi Bibliapita y Bibliachö ninqannö kawayänäpaq yachakuyä.

4.  4. Yanapashuynikita puëdeq nunakunawan juntakuy. Ima viciuta dejanëkipaqpis kallpachakuykaptikiqa, pikunawan amïgu kanqëkipitam tsëta dejanëkipaq fäcil o difïcilpis kanqa (Proverbius 13:20). Diosta adoraqkunawan juntakurqa, alli amïgukunatam tarishun. Imëkachö yanapamanqantsikta musyarmi, Diosqa pëta sirweqkunawan amïgu kanantsikta munan (Salmus 119:63; Romänus 1:12). Imata rikarpis, wiyarpis o leyirpis, rikanqëkichö, wiyanqëkichö o leyinqëkichö yarqamoqkunawanmi tiemputa pasëkanki, tsëmi distraikunëkipaq ruranqëkita alli akranëki. Awmi, ima viciutapis dejanëkipaq mana yanapashunqëki kaqkunapitam cuidakunëki (Salmus 101:3; Amos 5:14).

 Filipensis 4:13: “Teyta Dios poderninwan yanapamaptinmi, imata ruranäpaqpis kallpä kan”.

 “Musyarqämi kikïllapitaqa drögakunata dejëta mana puëdinäpaq kaqta. Tsëmi yanapëkamänampaq Diosman mañakurqä, y pëmi poderninwan drögakunata dejanäpaq yanapamarqan” (Italia nacionpita Patrizia).

 Joseph Ehrenbogen nunaqa pelyalla kanqan sitiuchömi winarqan, alcoholtam alläpa upoq, y tabäcuta, marihuäna y heroïna niyanqantam alläpa utilizaq. Tsëkunata alläpa utilizarmi atska kuti cäsi wanurqan, peru Bibliata leyinqanmi yanaparqan cambiëta puëdinqanta musyanampaq. Vïdampita masta musyëta munarqa, “Warmikunata y kawënïtapis respetëtam yachakurqö” neqta leyiri.

 Dimitri Korshunov nunaqa atska kutim alcohol upyëta dejëta munarqan. Tsë viciuta dejanampaq ima yanapanqanta musyëta munarqa, rikäri “Unë imanö kawanqätaqa paqwëmi chikï” neq videuta.

 Manam. Bibliachömi këta nin: “Sänu këkaqkunaqa manam doctorta wanayantsu, peru qeshyëkaqkunam sïqa” (Mateu 9:12). Estädus Unïduschö Instituto Nacional sobre el Abuso de Drogas niyanqampis kënömi nin: “Drogakuyqa mana fäcil dejanan qeshyam, tsëmi dejëta munarpis y dejayänampaq kallpachakurpis, mastaraq rurayänan”. Awmi, Teyta Dios poderninwan yanapamanqantsikmi, kikintsik ruranqantsikpitapis mas yanapamantsik. Tsënö kaptimpis, Bibliachö ninqanta rurar viciukunata dejaqkunapis, doctor yanapanantaran wanayashqa. c Tsëpa pasaq Allen jutiyoq nunam këta willakun: “Alcohol upyëta dejëta munarqa, alcoholta mana upurmi mana aguantëpaqnö alläpa nanatsikoq kä. Tsë höram cuentata qokurqä, Bibliapita yachakuykarpis doctor yanapamänantaraq wananqäta”.

 Manam. Bibliachömi willakun mana alläpa nanatsikuyänampaq, qeshyëkaqkunata o wanuyänampaqna këkaqkunata alcoholta qarëta puëdinqantsikta (Proverbius 31:6; 1 Timoteu 5:23). Peru yarpänantsikmi, alcoholpis y mana alläpa nanatsikuyänampaq utilizäyanqan jampikunapis viciuman chätsikunqanta. Tsëmi alliraq musyanantsik ima jampipis imachö alli kanqanta y imachö mana alli kanqanta, y nanatsikushqa doctor recetamanqantsik jampikunata utilizarpis cuidädum kanantsik (Proverbius 22:3).