Ucrania nacionchö guërra kaptin, mëtsëchö alläpa usyaptin y alläpa tamyaptinmi mikuy ushakëkan. Y tsëqa mas afectashqa waktsalla kaq nacionkunachö këkaqkunatam, tsëkunachöqa mikuytapis alläpam pishipakuyan.

•   “Guërra kaptin, alläpa usyaptin, tamyaptin y imëkapis alläpa chaniyoq kaptinmi alläpa murupakuyannatsu y tsënöpam mikuy më tsëchöpis ushakëkan” (Antoniu Guterres, Naciönes Unïdaschö secretariu general, 17 de juliu 2023).

•   “Tsë asuntupaq estudiashqakunam nikäyan, gränukunata Rusia nacion më tsëman apatsita manana munaptinqa, mëtsëchö mikuy pishinampaq kaqta y mas chaniyoq kanampaq kaqta, y mas sufreq kaqqash kayanman Africa y Orienti Mediu Nacionkunachö täraqkuna” (Atalayar.com, 23 de juliu 2023).

 Mallaqë kanampaq y shamoq tiempuchö imakuna pasakunampaq kaqta Bibliachö willakunqanta rikäri.

•   Jesusmi këkuna pasanampaq kaqta willakurqan: “Juk nacionmi juk nacionwan guërrata ruranqa, juk gobiernum juk gobiernuwan pelyanqa, y wakchö këchömi mallaqë” kanqa (Mateu 24:7).

•   Bibliachömi Apocalipsis libruchö chuskoq bestian montashqakunapaq parlan. Tsë chuskumpita jukninmi guërrakuna kanampaq kaqta rikätsikun, y qepanta ëwaq kaqnam mallaqë kanampaq kaqta rikätsikun. Tsëpitam willakun mikuy më tsëchö ushakänampaq y alläpa chaniyoq kanampaq kaqta. Kënömi nin: “Yana cawallu yarqaramuqta rikarqä. Montaraqninnam balanzan tsarashqa këkarqan. Tsënam [...] kënö nimuqta wiyarqä: ‘[...] Juk kïlu trïgullatam rantiyanqa juk junaq jornalninkunawan, y kima kïlu cebädallatam rantiyanqa juk junaq ganayanqanwan’” (Apocalipsis 6:5, 6, Teyta Diospa Willakïnin).

 Bibliachö tsënö ninqanqa kanan tiempum cumplikëkan y kanan tiempukunapaqmi ‘ushanan tiempu’ nin (2 Timoteu 3:1). Ushanan tiempupaq Bibliachö willakunqanta y chuskun bestian montashqakuna ima ninan kanqanta masta yachakuyta munarqa,1914 watapitaqa imëkam pasakuykan neq videuta rikë y “¿Imatataq musyatsikun bestian montashqakunaqa?” neqta leyi.

•   Bibliachöqa, mikuykuna alläpa chaniyoq kaptin o mikuy mana kaptin imata ruranapaq kaqta willakoq alli consëjukunam kan. Wakin kaq consëjukunataqa tarinki “Cómo vivir con menos” neqchömi.

•   Bibliachöqa alli noticiakunatapis tarintsikmi, tsëchömi willakun mas allina y mas kushishqana kawakunapaq kaqta, tsëchömi nin ‘Patsachöqa mëtsika gränu’ kanampaq kaqta y ni pipis manana mallaqänampaq kaqta. (Salmus 72:16). Bibliachö kë shumaq noticiapita maslla musyëta munar y imanir tsëkuna confiakuypaq kanqanta musyëta munarqa “La esperanza real de un mañana mejor” neqta leyi.