Noticiakunachömi willakayämun nunakuna chikinakur ninakuyanqanta, mana allipa rikänakur rurayanqanta, juk nacionpita nunakunata atacayanqanta y guërrakuna kanqanta.

•   “Israelwan Gäza guërrachö kayaptin y atska grüpukuna nunakunata chikinakatsiyaptinmi, Internetchöqa imëpitapis masraq chikinakur imëkata ninakuyan” (The New York Times, 15 de noviembri de 2023).

•   “Masqa 7 de octubripitam, nunakuna chikinakuyanqanta, chikinakur ninakuyanqanta y chikinakur imëkata rurayanqanta rikarquntsik” (Asamblëa General de las Naciönes Unïdas niyanqampa presidentin Dennis Francis, 3 de noviembri de 2023).

 Nunakuna chikinakur ninakuyanqanta, cölerar imëkata rurayanqanta y guërrakunataqa, manam kananllaraqtsu rikantsik. Bibliachömi willakun guërra rurëta munaq nunakunapaq, y parlar niyanqankuna fïlu espädanö kanqanta (Salmus 64:3; 120:7; 140:1). Manam tsëllatsu, Bibliachöqa nunakuna chikinakuyanqan imata rikätsikunqantapis willakunmi.

 Bibliachömi willakun nunakuna imanir chikinakuyanqanta.

1.  1. Bibliachöqa willakurqannam ushanan tiempuchöqa, cäsi llapan nunakunapis mana kuyakoq kayänampaq kaqta (Mateu 24:12). Tsëmi nunakunaqa jukkunata kuyëpa tratayänampa rantin, imanö portakuyanqanwan chikinakatsiyan (2 Timoteu 3:1-5).

2.  2. Bibliachömi kënö willakun: “Kë munduchö nunakunaqa Diablupa poderninchömi këkäyan” (1 Juan 5:19; Apocalipsis 12:9, 12). Nunakuna alläpa chikinakuyanqanmi rikätsikun, alläpa mana alli y mana llakipäkoq Diablupa poderninchö këkäyanqanta.

 Bibliachömi willakun Teyta Diosqa ichikllachöna chikinakuyta ushakätsinampaq kaqta. Manam tsëllatsu, chikinakuy kanqanrëkur sufrikaqkunatapis yanapanqam. Bibliachömi kënö willakun:

•   “Nawinkunapitam llapan weqita limpianqa, y nunakunaqa manam wanuyanqanatsu o wañuyanqanatsu, llakikuyanqannatsu, waqayanqanatsu ni nanatsikuyanqanatsu. ¡Teyta Diosmi llapan sufritsimanqantsik kaqkunata ushakätsinqa!” (Apocalipsis 21:4).