Grüpu Bancu Mundial niyanqampa presidentinmi 2022 wata juniu killachö kënö nirqan: “Kananqa yapëmi imëkapis sasa o aja tarinan kanqa. Imëkapis mas chaniyoqmi kanqa y ganayanqanqa pöcum kanqa”.

 Fondu Monetariu Internacional niyanqampitanam kënö niyarqan: “Combustiblikunapa y mikuykunapa preciunqa rasllam o sasllam subirishqa, y qellëta sasa o aja tariyänan nacionkunachö waktsa nunanam masqa sufrikäyan”.

 Bibliachömi willamantsik, kë tiempukunachö imëkapapis preciun imanir alläpa subinqanta, imata ruranapaq kaqta y shamoq tiempuchö imëkapis alli kanampaq kaqta.

•   Kë kawëkanqantsik tiempupaqqa, ‘ushanan junaqkuna’ kanqantam Bibliachö nin (2 Timoteu 3:1).

•   Jesusqa nirqan kë tiempukunachöqa, ‘espantëpaqkuna’ o mantsakëpaqkuna pasanampaq kaqtam (Lücas 21:11). Imëkapapis preciun alläpa subinqanqa mantsakëpaqmi. Nunakunaqa alläpam yarpachakuyan warë warätin imanö kayänampaq kaqta y familiankunata mantenita mana puëdiyänampaq kaqta.

•   Apocalipsis libruchömi willakurqanna kë ushanan tiempukunachö mikuypa preciun alläpa chaniyoq kanampaq kaqta, kënömi nin: “Juk kïlu trïgullatam rantiyanqa juk junaq jornalninkunawan, y kima kïlu cebädallatam rantiyanqa juk junaq ganayanqanwan” (Apocalipsis 6:6, Teyta Diospa Willakïnin).

 Ushanan tiempukunapaq maslla musyanëkipaqqa, Apocalipsis libru willakunqankunata yachakuy, y rikë 1914 watapitaqa imëkam pasakuykan neq videuta y leyi “Imatataq musyatsikun bestian montashqakunaqa” neqta Täpakoq revistachö.

•   “Wayinkuna sharkatsirmi kuyashqä nunakuna tsëchö täräyanqa. Üvasta plantakurmi wayïninta mikukurnin kawakuyanqa. Wayita sharkatsiyashqanchöpis manam juk nunakunatsu täräyanqa, sinöqa kikinkunam täräyanqa. Üvasta plantakuyashqantapis manam juk nunakunatsu pallakur apakuyanqa, sinöqa kikinkunam pallakuyanqa” (Isaïas 65:21, 22).

•   “Mandakushqan nacionchö trïgu shumaq wayïkullätsun. Llapan jirkakunapis trïgupa qatashqa këkullätsun” (Salmus 72:16).

•   “Tsëmi Teyta Dios nin: ‘Waktsakunatam y humildikunatam allqutsar alläpa jipëkätsiyan. Jipatsiyaptinmi alläpa waqëkäyan. Tsëmi pëkunata jinallachö yanapashaq’” (Salmus 12:5).

 Diosnintsikqa manam permitinqanatsu nunakuna pishipakur mallaqar kawayänanta, y entëru Patsachö nunakunapa imëkankuna kanantam permitinqa. Tsëpita masllata musyanëkipaq leyi “¿Es realista esperar un sistema económico justo?” neqta.

 Bibliachö këkaq consëjukunaqa, kanan witsampis yanapamantsikmi, tarinqantsikkuna wallkalla kaptimpis y imëka chaniyoq kaptimpis yachëllapa gastar tinkutsinapaq (Proverbius 23:4, 5; Eclesiastes 7:12). Maslla musyanëkipaqqa leyi “Cuide su economia” y “Cómo vivir con menos” neqta.