¿Imëllapis llapantsik igual kawashuntsuraq?
Llapankunapaq imapis mana igual kaptinmi, nunakunaqa mëtsëchö huelgakunata rurayan. Y CÖVID-19 qeshya kaptinmi imëkapis masraq peorashqa. Wayinkunachö quedakuyänan kaptin, qellëninkuna faltaptin y qeshyarpis jampita rantita mana puëdirmi waktsakunaqa rïcukunapitapis mas sufriyan.
Qellëta faltapakurmi mëtsikaq nunakuna sufriyan, ¿imëllapis tsë problëma ushakanqatsuraq? Awmi. Bibliachömi willakun ichikllachöna imëka problëmakunata Diosnintsik ushakätsimunampaq kaqta.
¿Ima problëmakunatataq Diosnintsik ushakätsimunqa?
Problëma: Nunakunaqa manam wanayanqanta tariyänampaq nuna mayinkunata yanapëta puëdiyantsu.
¿Imatataq Diosnintsik ruramunqa? Diosnintsikqa llapan gobiernukunata ushakäratsirmi kikimpa Gobiernuntana churamunqa. Tsë gobiernuqa ciëlupitam entëru Patsata gobernamunqa (Daniel 2:44; Mateu 6:10).
¿Imanönatan kawashun? Diosnintsikpa Gobiernunqa entëru Patsatam shumaq gobernamunqa. Tsëmi nunakunaqa waktsanatsu kayanqa ni sufriyanqanatsu ni qellë asuntupaq yarpachakuyanqanatsu (Salmus 9:7-9, 18). Trabajar tariyanqampis kikinkunapaqmi kanqa y familiankunawanmi kushishqa kawayanqa. Bibliachömi kënö willakun: “Kikinkunapaqmi wayikunata rurayanqa, y kikinkuna mikuyänampaqmi üvastapis plantayanqa. Rurayanqan wayikunaqa manam jukkunapaqtsu kanqa. Y plantayanqan üvaskunapis manam jukkunapaqtsu kanqa” (Isaïas 65:21, 22).
Problëma: Nunakunaqa manam sufrikaqkunata wanayanqanwan yanapëta puëdiyantsu.
¿Imatataq Diosnintsik ruramunqa? Diospa Gobiernun gobernamuptinqa nunakunaqa manam imatapis mantsayanqanatsu y segürunam kawakuyanqa.
¿Imanönatan kawashun? Diospa Gobiernunchöqa manam guërrakuna kanqanatsu, mikuypis manam pishinqanatsu y muyakoq qeshyakunapis manam kanqanatsu, tsëmi nunakunaqa imatapis faltapakuyanqatsu (Salmus 46:9; 72:16; Isaïas 33:24). Diosnintsikmi kënö nin: “Sirwimaqnïkunaqa tranquïlu sitiuchömi kawayanqa, wayinkunapis segürum kanqa, tsë sitiukunachöqa imatapis mana mantsashpam kawayanqa” (Isaïas 32:18).
Problëma: Kikinkunallapaq imatapis munaq nunakunaqa wakinkunapitam provechakuyan.
¿Imatataq Diosnintsik ruramunqa? Diospa Gobiernunchö kawaqkunaqa kikinkunallaman pensayänampa rantinmi wakinkunapaq mas yarpachakuyanqa (Mateu 22:37-39).
¿Imanönatan kawashun? Diospa Gobiernun gobernamuptinqa llapan nunakunam Diosnintsiknö kuyakoq kayanqa. Kuyakoq nunaqa “manam kikin munanqanllatatsu ashin” (1 Corintius 13:4, 5). Bibliachömi kënö willakun: “Akranqä sagrädu jirkachöqa, manam ni ima mana allita rurayanqatsu ni imata ushakätsiyanqatsu. Lamarchö yaku junta kanqannömi, patsachö nunakunaqa Teyta Jehovä a pï kanqanta musyayanqa” (Isaïas 11:9).
Bibliachömi willakun ushanan tiempuchöna kawëkanqantsikta y ichikllachöna änikunqankunata Diosnintsik cumplimunampaq kaqta, tsëqa manam qellë asuntupaq yarpachakushunnatsu (Salmus 12:5). b Tsëyaqqa Bibliachö consëjukunam yanapamäshun qellë asuntuchö imata ruranapaq kaqta musyanapaq. Tsëta maslla musyanëkipaqqa, leyiri “Cómo vivir con menos” y “Una opinión realista del dinero” neqchö willakunqanta.
a Bibliachömi willakun Diospa jutin Jehovä kanqanta (Salmus 83:18).
b Bibliaman imanir confiakunëkipaq kaqta musyanëkipaqqa, leyiri “Bibliaqa Diospa Palabranmi” neqchö willakunqanta.
Capaz këkunapis gustashunki
TÄPAKOQ
¿Imakunataraq Diospa Gobiernunqa ruramunqa?
Jesusqa musyarqanmi Diospa Gobiernunlla kë Patsachö problëmakunata altsanampaq kaqta. ¿Imatataq tsë Gobiernuqa ruramushqa noqantsik confiakunapaq?
TÄPAKOQ
¿Entëru Patsachö waktsayëta piraq ushakätsita puëdinqa?
¿Piraq waktsayëta ushakätsita puëdinqa?
