Mana allita ruraq nunakuna juntakëkurmi Haitï nacionchöqa imëka mana allikunata rurayan. Tsënöllam Sudafrica, Mëxicu y juk nacionkunachöpis imëka mana allikunata rurayan. Mana allita ruraq nunakuna mënusna kanqan sitiukunachöpis, suwakuyanqanta, mana allikunata rurayanqanta y maskunata wiyarmi nunakunaqa yamëtsu ni tranquïlutsu kawakuyan.

 ¿Ima nintan Bibliachö mana allita ruraq nunakuna masraq mirayanqampaq?

 Bibliachöqa unëpitanam willakurqan ‘ushanan tiempuchöqa’ mana allita ruraq nunakuna y mana alli rurëkuna masraq kanampaq kaqta (Mateu 24:3). Tsë tiempupaq parlarmi Jesucristuqa kënö nirqan:

•   “Imëpitapis mas mana alli rurëkuna kaptinmi cäsi llapan nunakunapis kuyakoqnatsu kayanqa” (Mateu 24:12).

 ‘Ushanan tiempuchö’ nunakuna imanö kayänampaq kaqtapis Bibliachöqa willakurqannam. Kënömi willakurqan: “Manam controlakuyta yachayanqatsu, mantsëpaqmi kayanqa, manam alli kaqta kuyayanqatsu” (2 Timoteu 3:1-5). Tsënö karmi nunakunaqa leykunatapis respetayannatsu.

 Tsënö kaptimpis, Bibliachömi willakun mana alli rurëkuna y mana allita ruraq nunakunaqa ichikllachöna ushakäyänampaq kaqta.

•   Salmus 37:10 y 11 textuchömi kënö nin: “Ichikllanam faltan mana alli nunakuna ushakäyänampaq, pëkuna kayanqan kaqman rikachakurpis manam rikankinatsu. Alli shonquyoq nunakunapaqmi kë patsa herenciankuna kanqa. Tsëchömi imëpis yamë y tranquïlu kawakuyanqa”.

 ¿Shamoq tiempuchö imanö kawanapaq kaqtataq Bibliachö willakun? ¿Imatan yanapashunki Bibliachö willakunqan kanan tiempu cumplikëkanqanta següru kanëkipaq? Tsëpaqqa këkunachö willakunqanta leyiri:

 La esperanza real de un mañana mejor

 ¿Cuál es la señal de “los últimos días” o “los tiempos finales”?

 ¿Kanan tiempu nunakuna imanö kayänampaq kaqta Bibliachö willakurqanku?