2022 wata juliu killaqa mëtsë nacionkunachömi nuna mayinkunata illapayashqa:

•   “Japon nacionchö juk reqishqa polïticu nunata wanuratsiyaptinmi, tsë nacionchö y entëru munduchö nunakuna mantsakäyashqa. Tsë nacionchöqa manam wanutsinakuyanllatsu y armakunata katsiyänantapis allim controlayan, tsënö këkaptinmi tsë nunata wanuratsiyashqa [pëqa Shinzo Abe nunam karqan y primer ministrum kashqa karqan]” (10 de juliu de 2022, The Japan Times).

•   “Dinamarca nacionchömi Copenhague nir reqiyanqan jatun tiendachö juk nuna, kimaq nunakunata illapar wanutsiptin mëtsikaq nunakuna mantsakäyashqa” (4 de juliu de 2022, Reuters).

•   “Sudafricachömi, Sowetu niyanqan cantïnachö juk nuna, 15 nunakunata illapar wanutsishqa” (10 de juliu de 2022, The Guardian).

•   “Estädus Unïdus nacionchömi 4 de juliu rurayanqan fiestachö, 220 nunakunata illapar wanutsiyashqa” (5 de juliu de 2022, CBS News).

 ¿Imëllapis tsënö wanutsinakuykuna ushakanqatsuraq? ¿Ima nintan Bibliachö?

 Diospa Palabranmi nimantsik ‘ushanan tiempuchö’ kawëkanqantsikta y nunakuna alläpa mana alli y mantsëpaq kayanqanta (2 Timoteu 3:1, 3). Tsënö imëka mana allikunata rurayaptinmi nunakuna mantsakäyan (Lücas 21:11). Peru Bibliachömi nimantsik tsë mana allikunaqa ushakänampaq kaqta, y nunakunaqa tranquïlu sitiuchönam “kawayanqa, wayinkunapis segürum kanqa, tsë sitiukunachöqa imatapis mana mantsashpam kawayanqa” (Isaïas 32:18). Peru ¿imanöraq mana allikunaqa ushakanqa?

 Diosnintsikmi llapan mana alli nunakunata y armakunatapis ushakätsinqa.

•   “Mana allita ruraq nunakunaqa ushakäyanqam” (Proverbius 2:22).

•   “[Diosmi] patsachö guërrakunata ushakätsin, flechakunata y lanzatapis pakirmi ushakätsin. Soldädukunapa carrëtankunatapis ninawanmi ushakätsin” (Salmus 46:9).

 Diosnintsikmi nunakunata yachatsinqa alli kawakuyänampaq, tsëmi nuna mayinkunata chikiyanqanatsu.

•   “Akranqä sagrädu jirkachöqa, manam ni ima mana allita rurayanqatsu ni imata ushakätsiyanqatsu. Lamarchö yaku junta kanqannömi, patsachö nunakunaqa Teyta Jehovä pï kanqanta musyayanqa” (Isaïas 11:9).

•   Kanan witsampis, Diosqa nunakunatam yachëkätsin mana pelyayänampaq y armakunata mana utilizäyänampaq. Tsëpa rantinqa, ‘espädankunapita takllapa puntanta o planchanta’ rurayänampaq y ‘lanzankunapitana ösikunata’ rurayänampaqmi yachëkätsin (Miquëas 4:3).

 Mana mantsapakuypa tranquïlu kawakunapaq Biblia willakunqanta maslla musyëta munarqa, leyi “¿Es posible librarse del miedo?” neq yachatsikuyta.

 Imëka mana allikuna ushakänampaq kaqta musyëta munarqan, leyi “¡Por fin paz en la Tierra!” neq yachatsikuyta.