Kë 24 de febrëru 2022 watam, Rusia nacion militarkuna Ucraniaman yëkuyarqan. Tsëmi vïdankunata salvayänanrëkur mëtsika nunakuna qeshpir mëtsëta ëwakuyashqa. a

 Ucraniachö Jarkov markapita Nataliam kënö nin: “Mëtsika bombakuna ishkimurmi pashtar qallëkurqan. Manam yarpätsu tsë höra imanö tikrakurinqäta. Trenkunaman lloqarkur mëtsikaq ëwakoqta rikarmi ‘noqantsikpis qeshpir ëwakushun’ niyarqä. Cada ünum takshalla mochïläkunaman llapan puëdiyanqäta winayarqä. Mas väleq kaq documentukunata, remediukunata, yakuta y mikuyänäpaq juk ishkë cösasta aparkurllam yarqayämurqä. Bombakuna mëchö tsëchö pashtakuykaptinmi trenman lloqarkur ëwakayämurqä”.

 Jarkov markapita Nadiam kënö nin: “Guërra qallëkunampaq kaqtaqa manam ni ichikllapis pensayarqätsu. Bombakuna pashtar qallëkuptinmi ventänakunapis mantsakëpaq kuyurqan. ‘Necesitänäpaq kaqkunallata aparkur jinan höra ëwakushaq’ nirmi pensarirqä. Las öchu de la mañänam wayïpita yarquskir juk trenman lloqarkur juk sitiuyaq shamurqä, y tsëpitanam juk buswan Polonia nacionyaq shamurqä”.

Këchöqa këkunatam yachakushun:

•  Rasumpa kaqchöqa, ¿imanirtan wayinkunata dejëkur pïmë ëwakuyan?

•  Wayinkunata dejëkur ëwakushqa kaqkunaqa, ¿mëchötan consuëluta tarita puëdiyan?

•  Wayimpita qeshpir ëwakoqkunataqa, ¿Bibliachö ninqan kanan tiempupis yanapëta puëdinku?

 Rasumpa kaqchöqa, ¿imanirtan wayinkunata dejëkur pïmë ëwakuyan?

 Awmi, Rusia nacion militarkuna Ucraniaman yëkushqa kayaptinmi wanuyta mantsar wayinkunata dejëkur pïmë ëwakuyashqa, peru manam tsërëkurllatsu. Bibliachömi willakun tsë llapan imanir pasëkanqanta.

•   Nunakunapa gobiernunqa manam ni imanöpapis puëdishqatsu llapan nunakuna alli kawakuyänampaq imatapis rurëta. Nunakunata yanapayänampa rantinmi imëka mana allita rurar mas sufritsiyan (Eclesiastes 4:1; 8:9).

•   Satanas Diablum “kë munduchö nunakunapa gobernaqnin”. Pëmi nunakunata imëka mana allita ruratsin. Tsëmi Bibliachö kënö nin: “Kë munduchö nunakunaqa Diablupa poderninchömi këkäyan” (Juan 14:30; 1 Juan 5:19, La Biblia. Traducción del Nuevo Mundo, [TNM]).

•   Nunakunaqa unë tiempupitanam imëka mana allipa pasayashqa, peru kananqa imëpitapis masmi imëka sufrimientuta rikantsik. ¿Imanirtaq tsënö? Bibliachömi 2 Timoteu 3:1 textuchö unëna kënö nishqa karqan: “Ushanan junaqkunachöqa alläpa mana alli tiempukunam kanqa, alläpa sasa [o aja] tiempukuna”. Awmi, ushanan tiempukunachönam këkantsik. Tsëmi imëpitapis mas guërrakuna, imëka desgraciakuna, mallaqë y imëka qeshya kan. Tsë llapan pasaptinmi pïmë nunakuna wayinkunata dejëkur juk sitiukunata ëwakuyan (Lücas 21:10, 11).

 Wayinkunata dejëkur ëwakushqa kaqkunaqa, ¿mëchötan consuëluta tarita puëdiyan?

 Bibliachömi nin kamakoq Dios Yayantsik Jehoväqa, b wayinkunata dejëkur karu markakunata ëwakoqkunata alläpa kuyanqanta y llakipanqanta (Deuteronomiu 10:18). Pöcu tiempullachönam pëqa llapan sufrimientukunata ushakätsimunqa. ¿Imanötan tsëta ruramunqa? Ciëluchö patsakashqa Gobiernunwanmi. Tsë Gobiernuqa Patsachö llapan gobiernukunatam ushakätsinqa (Daniel 2:44; Mateu 6:10). Satanas Diablutapis ushakätsinqam (Romänus 16:20). Tsë Gobiernu gobernamuptinqa mananam kanannö nacionkunaman rakishqa kashunnatsu. Entëru munduchömi llapantsik juk familiallana kashun. Mananam ni pipis wayimpita qeshpir ëwakunqanatsu. Bibliachömi kënö nin: “Nunakuna mana mantsakushpana[m] kawakuyanqa. Üvas montipa y hïgus montipa chakinchö yamënam jamakuriyanqa. Llapanta mandaq TEYTA DIOSMI tsënö kananpaq kashqanta nin” (Miquëas 4:4).

 Diosnintsikpa Gobiernunllam llapan mana allikunata y imëka sufrimientuta ushakätsimuyta puëdin. Tsë Gobiernu gobernamuptinqa manam ni pipis wayinta dejëkur qeshpir karu markakunata ëwakunqanatsu. ¿Imakunatataq tsë Gobiernu ruramunqa?

•   Manam guërrakuna kanqanatsu. “[Jehovämi] patsachö guërrakunata ushakätsin” (Salmus 46:9, TNM). Guërrakunata Diosnintsik imanö ushakätsinampaq kaqta musyëta munarqa, “¿Cómo llegará a haber paz en la Tierra?” neqta leyi.

•   Manam chikinakuy ni wanutsinakuy kanqanatsu. “[Jehovämi] sufritseqninkunapita y maqaqninkunapita salvanqa” (Salmus 72:14, TNM). Nunakuna maqakoq y chikikoq këta imanö dejayanqanta yachakunëkipaq, “Ama chikikoq kashuntsu” neqta leyi.

•   Manam pipis waktsanatsu kanqa. “[Jehoväqa] waktsakuna rowakuptin yanapëkunqam” (Salmus 72:12). Waktsa këta Diosnintsik imanö ushakätsimunampaq kaqta musyanëkipaq, “¿Es realista esperar un sistema económico justo?” neqta leyi.

•   Manam ni pipis mikuyta faltapakunqanatsu. “Patsachöqa mëtsika gränu mikuymi kanqa” (Salmus 72:16, TNM). Ni pipis mikuyta mana faltapakunampaq Diosnintsik imata ruramunampaq kaqta musyanëkipaq, “¿Un mundo sin hambre?” neqta leyi.

 Wayimpita qeshpir ëwakoqkunataqa, ¿Bibliachö ninqan kanan tiempupis yanapëta puëdinku?

 Awmi. Allina kawakunapaq ichik tiempullana faltanqanta Bibliachö willakunqanqa alläpam yanapan wayimpita qeshpir ëwakoqkunata. Peru manam tsëllatsu, Bibliachö consëjukunaqa, kanan tiempupis yanapëta puëdinmi mana allikunapa pasar yamë këta tariyänampaq.

 Bibliachöqa kënömi nin: “Ama imapaqpis yarpachakur kayëtsu, sinöqa imëkachöpis mañakurnin y rogakurnin y jina agradecikurnin, yarpachakïnikikunata Diosta musyatsiyë; tsëqa imëka yarpachakïkuna janampa këkaq Diospa yamë këninmi, shonqïkikunata y pensënikikunata Cristu Jesusrëkur tsapanqa” (Filipensis 4:6, 7).

 ¿Imanötan tsëqa yanapakun? Ima mana allipa pasarpis, Diosnintsiktam mañakunantsik pensamientuntsikchö y shonquntsikchö yamë këta tarinapaq. “Filipenses 4:6, 7 | ‘No se inquieten por nada’” neqta leyi.