Mëtsëchömi polïtica asuntu imëka mana allikunata rurëkäyan.

•   2023 watapita 2024 watayaq presidenti këta munaqkuna campänata rurayanqanchömi, Mëxicu nacionchöqa 39 candidätukunata wanutsiyashqa y imëka mana allikunata rurayashqa. Tsënöqa mana imëpis pasashqatsu.

•   Euröpa kinrëchöpis polïtica asuntum imëka mana allikunata rurayashqa. 2024 wata 15 de mäyu junaqmi Eslovaquia nacionchö primer ministrutapis wanutsita munayarqan.

•   2024 wata 13 de juliu junaqmi Estädus Unïduschö unë presidenti Donald Trumptapis wanutsita munashqa, tsëmi nunakunaqa alläpa mantsakäyashqa.

 ¿Imanirtan polïtica asuntu imëka mana allikunata rurayan? ¿Imëllapis tsëkuna ushakanqatsuraq? ¿Ima nintan Bibliachö?

 Bibliachöqa willakurqannam kawëkanqantsik “ushanan tiempuchöqa”, nunakuna mantsëpaq kayänampaq kaqta y ima acuerdumampis chëta mana munayänampaq kaqta.

•   2 Timoteu 3:1 a 4 textuchömi kënö willakun: “Ushanan tiempuchöqa alläpa mana alli y mana aguantëpaqnö tiempukunam kanqa. Nunakunam kayanqa kikinkunallata kuyakoq, [...] mana agradecikoq y jukkunata dejaq, [...] manam acuerduman chëta munayanqatsu, [...] mantsëpaqmi kayanqa, [...] traicionakoqmi kayanqa y manam ima niyanqantapis cäsukuyanqatsu, alläpa orgullösum kayanqa”.

 Bibliachöqa willakurqannam gobiernukunapa contran kayänampaq kaqta y nunakunapis desordinta rurayänampaq kaqta (Lücas 21:9, nöta). Peru tsë imëka mana allikuna y polïtica asuntuchö mana acuerdu kayanqanqa ichikllachönam ushakanqa.

 Bibliachömi willakun ichikllachöna nunakunapa gobiernumpa rantin Diospa Gobiernunna gobernamunampaq kaqta.

•   Daniel 2:44 textuchömi kënö willakun: “Gobiernukuna gobernëkäyanqan witsanmi, ciëluchö Teyta Diosqa juk gobiernuta churamunqa. [...] Tsë gobiernuqa, wakin gobiernukunatam llapanta ushakätsinqa y pëllam imëyaqpis gobernanqa”.

 Diospa Gobiernun gobernamuptinqa, entëru Patsachömi yamë y unïdu kashun.

•   Diospa Gobiernunchöqa Jesucristum gobernamunqa, pëpaqmi Bibliachö willakun “Yamë Kawakuyta Apamoq Gobernaq” kanqanta. Pëpa gobiernunchöqa imëpis yamëmi kawakushun (Isaïas 9:6, 7).

•   Kanan tiempupitanam Diospa Gobiernunta yanapaqkunaqa yamë kawakuyta yachakuykäyan. Pëkunapaqmi Bibliachö kënö willakun: “Espädankunapitam takllapa puntanta o planchanta rurayanqa y lanzankunapitam ösikunata rurayanqa. Manam juk nacion nunakuna juk nacion nunakunawan pelyayänampaq espädankunata aptayanqanatsu, y manam guërrachö pelyayänampaq yachakuyanqanatsu” (Isaïas 2:3, 4).

 Tsëpita maslla musyanëkipaqqa, leyiri “¿Qué cosas logrará el Reino de Dios?” neqchö willakunqanta y rikäri ¿Imataq Diospa Gobiernun? neq videuta.