2024 wataqa, mëtsë nacionchömi eleccionkuna kanqa, y manam imëpis tsënöqa juk watallachö kashqatsu. Tsënö kaptimpis, manam polïticukunaman nunakuna confiakuyannatsu.

•   Estädus Unïdus nacionchömi mëtsikaq nunakunata polïticukunapaq imata pensayanqanta tapuyarqan y pëkunam kënö niyarqan: “cäsi llapan polïticukunam kikinkunapa munëninllata ashiyan”, y manam jukkunapaqa yarpachakuyantsu (centro de investigación Pew Research Center, 19 de setiembri de 2023). a

 Jövinkunapis manam polïticukunaman alläpa confiakuyannatsu.

•   “Kanan tiempu jövinkunaqa imëka problëmakunatam altsëta munayan, peru polïticukuna problëmakunata altsayänampaq imatapis mana rurayanqantam niyan” (The New York Times, 29 de enëru de 2024).

•   “Jövinkunaqa niyan polïticukunaman confiakuyänampa rantin Internetchö videukunaman mas confiakuyanqantam” (The Korea Times, 22 de enëru de 2024).

 Tsëqa, ¿polïticukuna warë warätin alli kanampaq yanapakuyanqatsuraq? ¿Pimantan confiakushwan?

 Pimampis confiakurqa alliran pensanantsik. Bibliachömi kënö nin: “Pensëta mana yachaq nunaqa, imata niyaptimpis llapantam creikurkun, peru pensëta yachaq nunaqa, imata ruranampaqpis alliran pensan” (Proverbius 14:15).

•   Rasumpa o mana rasumpa kaqta willakayämunqanta musyëta munarqa, leyi “Cómo protegerse de la información falsa” neqchö willakunqanta.

 Honrädu y alli kaqta rurëta munaq polïticukunapis manam llapan rurëta munayanqanta logrëta puëdiyantsu. Tsëmi Bibliachö kënö nin:

•   “Ama mandakoqkunaman ni pï nunakunamampis confiakuyëtsu. Pëkunaqa manam salvayäshuynikita puëdiyantsu” (Salmus 146:3).

 Bibliachömi nin Teyta Diosqa confiakuypaq gobernantita churanqanta, tsë gobernantiqa Jesucristum (Lücas 1:32, 33). Jesusqa Diospa Gobiernunchö gobernantim y tsë gobiernuqa ciëluchömi këkan (Mateu 6:10).

•   Imanir Jesusman confiakunëkipaq kaqta y pë problëmakunata imanö ushakätsimunampaq kaqta musyanëkipaqqa. Leyi “¿Pitatan Diosqa churashqa Gobiernunchö gobernanampaq?” y “¿Imakunataraq Diospa Gobiernunqa ruramunqa?” neqchö willakunqanta.