2022 wata domingu 20 de noviembri junaqmi, Conferencia de las Naciones Unidas sobre el Cambio Climático (COP27) niyanqan reunion ushashqa. Tsë reunionman ëwaqkunaqa, alläpa achachämuptin peligruchö këkaq nacionkunata qellëwan yanapayänampaqmi decidiyarqan. Tsëta decidiyanqan alläpa alli kaptimpis, atskaqmi niyan alläpa achachämunampaq causaqkunataqa mana ushakätsinqanta.

•   “Alläpa achachämuptin sufreqkunata qellëwan yanapayänäpaq decidiyanqäpitam alläpa kushikü […]. Tsënö kaptimpis, musyayämi maskunataraq ruranantsikpaq kaqta […]. Patsaqa hospitalchö urgenti atiendiyänanta wanaq nunanömi këkan” (Naciönes Unïdas niyanqampa secretariun Antöniu Gutërres ninqan; 2022 wata 19 de noviembri junaq).

•   “Ichikllachönam Patsaqa alläpa mana alliman chanqa, y tsëqa llapan nunakunapaqmi mana alli kanqa” (Irlanda nacionchö unë presidenti y ONU niyanqanchö Alto Comisionado para los Derechos Humanos neq carguchö unë yanapakoq Mary Robinson ninqan; 2022 wata 20 de noviembri junaq).

 Masqa jövinkunam Patsa imachö ushanampaq kaqman yarpachakuyan. ¿Puëdiyanqatsuraq gobiernukuna, änikuyanqanta cumplir, Patsachö mana alläpa achachämunampaq imallatapis rurëta? ¿Ima nintan Bibliachö?

 Wakinqa Patsachö mana alläpa achachämunampaqmi, llapan shonqunkunawan imëkata rurayan. Peru Bibliachömi willakun, llapan rurëta munayanqanta mana logrëta puëdiyänampaq kaqta. Bibliachö ninqampita ishkëllata rikärishun:

•   “Wiksuna këkaqtaqa manam derechëta puëdintsiknatsu” (Eclesiastes 1:15).

   ¿Ima ninantan tsëqa? Nunakuna gobernanakuyänampaq mana kamashqa kayaptinmi, gobiernukunaqa llapan munayanqanta logrëta puëdiyantsu (Jeremïas 10:23). Gobiernukuna juntakëkur llapan puëdiyanqanta rurarpis, manam kë munduchö problëmakunataqa ushakätsita puëdiyanqatsu.

•   “Nunakunam kayanqa kikinkunallata kuyakoq, qellëta kuyaq [...], manam acuerduman chëta munayanqatsu” (2 Timoteu 3:2, 3).

   ¿Ima ninantan tsëqa? Bibliachöqa puntallapitanam willakurqan, nunakunaqa kikinkunallaman pensayänampaq kaqta y wakinkunapa biennimpaq imachö yanapakuytapis mana munayänampaq kaqta. ¿Manaku kananqa nunakuna tsënö kayanqanta rikantsik?

 Shamoq tiempuchö Patsa imanö kanqanqa, manam gobiernukuna änikuyanqampitatsu kanqa. Teyta Diosqa alli gobernëta puëdiptinmi, kë munduta gobernanampaq Jesucristuta churashqa. Bibliachömi pëpaq kënö willakun:

•   “Pëmi gobernanampaq autoridäta chaskinqa, y Yachëwan Consejakoq, Alläpa Puëdeq Dios, Mana Wanoq Teyta y Yamë Kawakuyta Apamoq Gobernaq nirmi reqiyanqa” (Isaïas 9:6).

 Ciëluchö këkaq Diospa Gobiernunchöqa Jesusmi gobernanti (Mateu 6:10). Pëqa poderyoq y yachaq karmi, Patsata y Patsachö kawaq nunakunata cuidamënintsikta munan (Salmus 72:12, 16). Pëpa cargunchö këkaq Diospa Gobiernunmi, “patsata ushakëkätseqkunata” ushakätsinqa y entëru Patsata alliyätsimunqa (Apocalipsis 11:18; Isaïas 35:1, 7).

 Alläpa achachë Patsata mana ushakätsinampaq, Teyta Dios imata ruramunampaq kaqpita masta musyëta munarqa, “¿Qué dice la Biblia sobre el cambio climático y nuestro futuro?” neqta leyiri.