Mëtsëchömi gobiernuchö trabajaqkunaqa qellëta suwakuyan, y pëkunapa culpanrëkurmi mëtsikaq nunakuna sufriyan. a COVID-19 qeshya witsan nunakunata yanapayänampaq atska qellëta chaskiyanqanta suwakurnin rïcuyäyanqampitam mëtsikaq autoridäkunata denunciayashqa. Hospitalkunachö necesitäyanqanta rantiyänampaq qellë mana kaptin qeshyëkaqkunata mana ras o sas atiendiyaptinmi pïmë alläpa sufriyashqa y wakinqa wanuyashqa o wañuyashqa.

 Mëtsë nacionkunachömi autoridäkunaqa qellëta suwakuyan. Reinu Unïdu nacionchö primer ministru kashqa David Camerunmi kënö nirqan: “Tsë problëmaqa pachkapa [o aräñapa] llikannömi, y mëtsë nacionkunachömi tsë problëmaqa kan”.

 Tsënö kaptimpis, suwakoq gobiernukunaqa ichikllachönam ushakäyanqa. ¿Imanötan tsëta musyantsik? Diosnintsik imata ruranampaq kaqta Palabran Bibliachö rikärishun.

 Bibliachömi nin Diosnintsik Jehoväqa alli kaq rurëta kuyanqanta, peru mana alli rurëta y suwakuytaqa chikinqanta (Isaïas 61:8). b Autoridäkuna qellëta suwakuyanqampita pipis sufriptinqa, Teyta Diosqa musyanmi (Proverbius 14:31). Tsëmi kënö änimantsik: “Humildi nunakunata y waktsa nunakunatam sufrikätsiyan […]. Despreciar sufritsiyänantaqa manam dejashaqnatsu, ëwëkurmi salvamushaq” (Salmus 12:5).

 ¿Imatataq Diosnintsik ruranqa? Manam kë Patsachö gobiernukuna kananta permitinqanatsu. Pëqa juk alli gobiernutam ciëluchö patsätsishqana. Tsë gobiernupaqmi Bibliachöqa “Diospa Gobiernun” nin (Marcus 1:14, 15; Mateu 6:10). Y kënömi nin: “Tsë gobiernukuna gobernëkäyanqan witsanmi, ciëluchö Teyta Diosqa juk gobiernuta churamunqa. […] Tsë gobiernuqa, wakin gobiernukunatam llapanta ushakätsinqa y pëllam imëyaqpis gobernanqa” (Daniel 2:44). Tsënömi Diosqa suwakoq gobiernukunata llapanta ushakätsinqa.

 ¿Imanötan musyantsik Diospa Gobiernunchö mandakoqqa mana allita mana ruranampaq kaqta? Këman pensarishun:

1.  1.¿Pipitataq imëkata ruranampaq poderta chaskin? Diospa Gobiernunchö mandakoqqa Llapanta Puëdeq Diospitam imëkata ruranampaq poderta chaskin (Apocalipsis 11:15).

    ¿Imanirtan tsëqa alli? Kanan tiempu gobiernukunaqa qellëwanran imëkatapis rurëta puëdiyan, tsëmi nunakuna qellëta churayänanta necesitäyan. Tsënö kaptinmi mas fäcil qellëta chaskipakuyänampaq, suwakuyänampaq y jukkunata dominayänampaq. Peru Diospa Gobiernunchö mandakoqqa manam qellëta necesitantsu. Pëqa Teyta Diospitam poderta chaskishqa, tsëmi nunakuna alli kawakuyänampaq tsë poderwan imëkata rurëta puëdin (Salmus 145:16).

2.  2.¿Pitan Diospa Gobiernunchö mandakoq? Teyta Diosqa Jesucristutam Gobiernunchö mandakoq kanampaq churashqa (Daniel 7:13, 14).

    ¿Imanirtan tsëqa alli? Kanan tiempu gobiernukunachö mandakoqkunaqa allita rurëta munarpis, jukkuna rurayanqanta rikar y niyanqanta cäsukurmi suwakuyan y imëka mana allikunata rurayan (Eclesiastes 7:20). Peru Señor Jesusqa manam qellëta chaskipakurqantsu ni mana allita rurarqantsu (Mateu 4:8-11). Tsëmi pëqa nunakunata rasumpa kuyarnin alli kawakuyänampaq imëkata ruramunqa (Salmus 72:12-14).

3.  3.¿Ima leykunatataq respetatsinqa? Diospa Gobiernunqa Diosnintsik mandakunqan leykunatam respetatsinqa. Tsë leykunaqa llapampis allim. Tsë leykunata cäsukoq kaqkunaqa kushishqam kawakuyan (Salmus 19:7, 8).

    ¿Imanirtan tsëqa alli? Kanan tiempu gobiernukuna mandakuyanqan leykunaqa entiendita y cumplita mana puëdipaqnömi, y manam cumplitsita puëdiyantsu. Tsë leykunata lluta välitsirmi gobernantikunaqa qellëta suwakuyan. Peru Diospa leyninkunaqa fäcil cumplinanmi y kikintsikpa biennintsikpaqmi (Isaïas 48:17, 18). Y manam tsëllatsu, Diospa leyninkunaqa manam allikunata ruranallapaqtsu yanapamantsik, sinöqa shonquntsikchö y yarpënintsikchöpis alli kanapaqmi yanapamantsik (Mateu 22:37, 39). Musyanqantsiknöpis, Teyta Diosqa musyanmi nunakuna shonqunkunachö imata pensayanqanta, y leyninkunata imanö cumplitsinqanchöqa ankupäkoq o llakipäkoq kanqantam rikätsikun (Jeremïas 17:10).

 Bibliachöqa clärum nin mana allikunata ruraq y qellëta suwakoq gobiernukunaqa ushakänampaqna kaqta. Tsëkunata maslla yachakuri.

•   Diospa Gobiernun alläpa alli gobiernu kanqanta yachakunëkipaqqa, “El Reino de Dios, un gobierno sin corrupción” neqta leyi.

•   Diospa Gobiernun imanö kanqanta y imakunata ruramunampaq yachakunëkipaq, ¿Imatan Diospa Gobiernun? neq videuta rikë.

•   Këchö rikë Bibliapita imanö yachatsikuyanqäta y Diosnintsik änikunqankuna imanö yanapashunëkipaq kaqta yachakuy.