Jesusga, pibish cristiano tucusha nishaga bautizarina gashcadami yachachirca (Mateo 28:19, 20-da liyi). ¿Pero bautismoga imadi gan? ¿Bautizarina metada fajtachingabuga imadadi rrurrana gangui?

1. ¿Bautizarinaga imadi gan?

Bautizarina palabraga griego shimibiga “pambarina” nisha ninmi, chaiga yacubi pambarinami gan. Jesús bautizarishaga, Jordán yacubimi pambarirca, chai jipami “yacumunda llujshirca” (Marcos 1:9, 10). Shinalladi verdadero cristianoguna bautizarishaga, cuerpo enteromi yacubi pambarina gan.

2. ¿Majinbish bautizarishaga imadadi rricuchin?

Majinbish bautizarishaga, Jehová Diosmun mingarishcadami rricuchin. ¿Jehová Diosmun mingaringabuga imadadi rrurrana ganchi? Jehová Diosllada sirvisha nishmi shungumunda shuj oracionda rrurrana ganchi. ¿Chai oracionga imashinadi gan? Chai oracionda rrurrashmi paibu causaibi Jehová Diosda adorangabu munashcada, shinalladi paibu munaida siempre fajtachingabu munashcada rricuchin. Shinalladi Jesusbu ejemploda, yachachishcagunadashmi catisha nin. Jesusga nirca: “Majinbish ñucada catisha nishaga, pai munashca shinaga ña na causanallu gan, [...] llaquigunada aguantash ñucada catiraichi” (Mateo 16:24). Mingarish bautizarij personaga, Diosda sirvijgunaun y Jehová Diosunmi alli apanajui callarin.

3. ¿Bautizarisha nishaga imadadi rrurrana gangui?

Can bautizarisha nishaga, puntaga Jehová Diosmundami yachana gangui, jipaga paibimi ashtaun feda churash catina gangui (Hebreos 11:6-da liyi). Jehová Diosda rrijsishmi paibi feda churash ashtaun juyangui. Shina rrurrashmi canga ashtaun predicanada, Jehová Dios munashca shina causanada munangui (2 Timoteo 4:2; 1 Juan 5:3). Can “Jehová Dios munashca shina alli causashaga” mingarishmi bautizari pudingui (Colosenses 1:9, 10). a

 CAI TEMAMUNDA MÁS YACHASHUNCHI

4. Jesusbu bautismoga imadadi yachachin

Jesusbu bautismomunda ashtaun yachangabuga, Mateo 3:13-17-da liyi. Jipaga chaimunda parrlaichi:

• ¿Jesusdaga llullu huahua gajpillu bautizarca?

• ¿Jesusdaga ashalla yacuda umabi jichashllu bautizarca? Shinaga, ¿imashinadi bautizarirca?

Jesús bautizarishmi, Jehová Dios mingashca trabajoda fajtachi callarirca. Lucas 3:21-23 y Juan 6:38-da liyish, chaimunda parrlaichi:

• Bautizarishca jipaga, Jesusbuga ¿ima trabajodi más importante garca?

5. Tucuigunami bautizari pudinchi

Callaribiga mingarish, bautizarinadaga manchanguillari. Pero, Jehová Diosmunda ashtaun yachash, Paida rrijsish catijpi chai decisionda japinaga jahuallami ganga. Huaquinguna shina rrurrashcada yachangabuga cai VIDEODA rricui.

Juan 17:3 y Santiago 1:5-da liyish, chaimunda parrlaichi:

• Majinbish bautizarisha nishaga ¿imadadi rrurrana gan?

1. Para siempre Jehová Diosda sirvisha nishmi mingarinchi.

2. Bautizarishmi Jehová Diosmun mingarishcada tucui gentegunamun rricuchinchi.

 6. Bautizarishmi Jehová Diosbu familia tucunchi

Bautizarishaga, mundo enterobimi huauquipanigunaun shuj familia shina tucunchi. Maimunda gashash, ima laya causaida charishash, tucuigunami chailladadi crinchi y Biblia yachachishca shinami causanchi. Salmo 25:14 y 1 Pedro 2:17-da liyish, chaimunda parrlaichi:

• Cai versiculogunabi yachachishca shinaga, ¿bautizarinaga imashinadi ayudan?

 RESUMEN

Jesusga cristiano tucungabuga bautizarinami ganguichi nirca. Chaida fajtachingabuga, Jehová Diosbi crishmi shinchi feda charina ganchi y pai mandashca shina causashmi mingarina ganchi.

Repaso

• ¿Bautizarinaga imadi gan? ¿Imamundadi importante gan?

• ¿Bautizarina y Diosmun mingarinaga imadi gan?

• ¿Pish bautizaringabu munashaga imadadi rrurrana gan?