Tucui punllacunami televisionpi, tabletpi, computadorapi llaqui noticiacunata ricunchij, uyanchij. Huaquin noticiacunapica tucui imalla pasashcatami huillan.

 Chai noticiacunataca huahuacunapishmi ricun.

 ¿Llaqui noticiacunata ricushpa huahuacuna ama yallitaj mancharichunca yaya mamacunaca imatataj rurana can?

•  ¿Llaqui noticiacunata ricushpaca huahuacunaca ima shinataj sintirin?

•  ¿Huahuacuna ama yallitaj sustarichunca ima shinataj ayudai tucungui?

•  ¿Cambaj huahua shuj llaquita charishcamanta traumarishca saquirijpica ima shinataj ayudai tucungui?

•   Achca huahuacunaca llaqui noticiacunata ricushpami mancharincuna. Maijancunaca ima shina sintirishcata mana parlashpapish shungupi mancharishca, sustarishcami saquirincuna. a Paipaj yaya mamacuna preocupado cajpicarin ashtahuanmi mancharincuna.

•   Huahuacunaca llaqui noticiacunata ricushpaca panda yuyaicunatami charincuna. Por ejemplo, huaquin huahuacunaca llaqui noticiacunata ricushpaca paipaj familiapish chashnallatajmi tucunga nishpami yuyancuna. Y chai noticiacunata cutin cutin ricushpaca chai llaquicuna cada rato tiyashcatami yuyangacuna.

•   Huahuacunaca huaquin noticiacunapica exagerashpa parlacushcataca mana yachancunachu. Noticiacunata ricuchij empresacunaca negociollamanta o ashtahuan cullquita gananallamantami ima noticiacunatapish exagerashpa ricuchincuna. Chaitaca huahuacunaca mana yachancunachu.

•   Tucui noticiacunata ricuchunca mana saquinachu cangui. Huahuacuna noticiacunata yachachun alli cajpipish cutin cutin chai noticiacunata ricunaca mana allichu can.

   Mariaca: “Maipica ñucanchij huahuacunapaj ñaupajpimi llaqui noticiacunamanta parlanchij. Pero paicuna ima shina sintirishcapica mana yuyanchijchu” ninmi.

   Proverbios 12:25-pica: “Ima llaquimanta shungu pꞌaquirijpica, ima yuyaipish chingarinmi” ninmi.

•   Huahuacuna ima shina sintirishcata ricushpa pacienciahuan uyai. Maipica huahuacuna ima shina sintirishcata mana parlai tucunchu. Pero dibujashpachari ima shina sintirishcata ricuchincuna. Cambaj huahuacunahuan parlanacushpaca intindirinalla shimicunahuan parlai. Noticiacunapi tucui ima ricushcataca ama parlaichu.

   Sarahica: “Ñucanchij ushushihuan tiyarishpami pai ima shina sintirishcata parlajpi alli uyanchij. Chaimi paica alli sintirin. Cunan punllacunapica achca llaquicunami tiyan. Chai llaquicunahuan amañarishpa causana canchij nijpica mana alli sintirinchu” ninmi.

   Santiago 1:19-pica: “Imatapish uyanataca alli uyaichij. Manaraj alli yuyarishpaca ama rimaichijchu” ninmi.

•   Llaqui noticiacuna mana tucui ladopi pasacushcata intindichi. Por ejemplo, noticiacunapi gentecunata secuestrashcata uyashpaca huahuacunaca tucui ladopi chashna secuestrajcuna tiyashcatami yuyangacuna. Paicunata cuidacushcata yachachunca familia imata rurashcata parlai. Yuyari, shuj noticiata achcacuna yachaj chayajpica mana tucuichu cierto can.

   Lourdesca: “Maipica huahuacunaca imapi yuyacushcamantami cushilla o llaquilla sintiringacuna. Paicuna tranquilo sintirichunca cushichij yuyaicunapi yuyachun ayudai” ninmi.

   Proverbios 16:23-pica: “Yachaisapa runapaj shungumantaca, shimimanpish alli yuyaita cuj shimicunami llujshin. Paicuna rimashca shimicunaca, pipajpish uyanajllami” ninmi.