Internet paginacunapica achca pornografiami tiyan. Hayley solteraca 17 huatacunatami charin. Paica: “Pornografiata mashcanaca mana minishtirinchu. Ñapishmi mana yuyashcapi ricurinlla” ninmi.

 Pornografiata mana nunca ricusha nijcunapish maipica ricuna tentaciontami charincuna. 18 huatacunata charij Greg shuti jovenca: “Pornografiata mana ricungapaj decididomi carcani. Pero shuj punllaca chai tentacionpimi urmarcani. Achca cuidadotami charina canchij” ninmi.

 Cunan punllapica pornografiataca maipipish ricunallami. Achca jovencunaca lluchulla cꞌaricunapaj huarmicunapaj fotota o videotami celularpi cachancunalla.

 Ama cungaringui: Ñucanchij yaya mama o abuelocunapaj tiempota yuyarishpaca cunan punllapica pornografiata ricunaca ashtahuan jahuallami. Pero, ¿pornografiata ricuna tentacionta vinci tucunguichu? (Salmo 97:10).

 Ari. Pero puntapica pornografía imamanta mana alli cashcatami alli yachana cangui. Cunanca pornografiamanta maijan yuyaicuna llulla cashcata ricushun.

 Llulla: Pornografiata ricushpaca mana ima llaqui tucushunchu.

 Verdad: Pornografiata ricunaca fumacushca layami can. Fumajpica pulmoncunami dañarin. Cutin pornografiata ricushpaca chayarinamanta mapa yuyaicunatami charingui. Diosca cusa huarmi cꞌuyanacushpa, paicunapura chayarinacushpa cushilla causachunmi rurarca (Génesis 2:24). Pornografiata ricushpaca mana allitaca alli cashcata layami ricui callaringui. Pornografiamanta estudiajcunaca: “Pornografiata ricuj achca cꞌaricunaca huarmicunata maltratanaca alli cashcata layami ricuncuna” ninmi.

Bibliapica ‘mana pingaj, cacharishcacuna tucushpa’ mapata ruraj gentecunamantami parlan (Efesios 4:19). Chai gentecunaca rumi shungu tucushpami mana allita rurashcacuna.

 Llulla: Pornografiata ricushpami chayarinamanta yachai tucunchij.

 Verdad: Pornografiata ricujcunaca chayarina mapa munaillahuanmi cꞌaricunatapish o huarmicunatapish ricuncuna. Shinallataj paicunapaj mapa munaicunata pajtachinallapimi yuyancuna. Cai problemamanta huaquin estudiajcunaca: “Pornografiata ricujcunaca cazarashpa cusahuan o huarmihuan chayarinacushpaca mana cushilla sintirinchu” nincunami.

  Bibliapica, “cancunapi tiyaj mana alli munaicunataca tucuita saquichij. Ama huainayanguichij, ama ima millaita ruranguichij” ninmi (Colosenses 3:5, Biblia en Quichua Chimborazo, 1989). Pornografiata ricushpaca chai millai munaicunatami charingui.

 Llulla: Nij tucushpallami maijancunaca “chayarinamanta parlana, pornografiatapish ricunaca mana allichu” nincuna.

 Verdad: Pornografiata mana ricujcunaca cusa huarmipuralla chayarina cashcatami yachancuna. Chaimantami paicunaca cazarashca huasha cusa huarmi chayarinacushpaca cushilla sintirincuna. Cutin pornografiata ricujcunaca mana chashna sintirincunachu.

  Bibliaca chayarinamantaca claritotami parlan. Cazarashca cꞌaricunataca: ‘Huambraraj cashpa cazarashca quiquin huarmillahuan cushicungui. Paipaj cꞌuyaihuanca pilluchishca shina cambaj tucui causaipi cushichichun’ ninmi (Proverbios 5:​18, 19).

 Pornografiata ricuna tentacionca maijancunapajca sinchimi can. Chaipica ¿imatataj rurai tucungui? “Cómo rechazar la pornografía” pꞌangapi ashtahuan yachai.

 Pornografiata ricuna tentaciontaca vinci tucunguimi. Pero ña chai viciopi urmashca cashpaca, chaitaca saqui tucunguimi.

 Calvin shutimanta parlashun. Paica 13 huatacunamantami pornografiata ricui callarirca. Paica cashnami nin: “Pornografiata ricuna mana alli cashcataca yacharcanimi. Pero chaita saquinaca sinchimi carca. Ricushca qꞌuipaca malmi sintirij carcani. Shuj punllaca ñuca yayami yachaj chayarca. Yachaj chayajpipish allimi sintirircani. Pai ñucata ayudachunmi minishticurcani” ninmi.

 Calvinca pornografiata saqui pudircami. Paica cashnapishmi nin: “Pornografiata mana ricui callarinachu carcani. Cunancamami huaquinpica chai fotocuna, videocunaca ñuca yuyaiman shamun. Maipicarin pornografiata ricuna yuyaicunami shamun. Pero chai ratomi Jehová Diosta cazucushpa, cushilla causacushcata yuyarini. Shinallataj shungu ucupipish allimi sintirini. Shamuj punllapica sumaj causaitami charisha”.