Diabloca tiyanmi. Paica shuj angelmi carca. Pero qꞌuipaca Diospaj contrami tucurca. Paimi cai pachataca mandacun (Juan 14:30; Efesios 6:11, 12). Bibliaca cai catij shuticunahuanmi Diablotaca shutichin:

•   Satanás shutica “Jarcaj” nisha ninmi (Job 1:6).

•   Diablo shutica “Llullacunata nij” nisha ninmi (Apocalipsis 12:9).

•   Culebra nishpapishmi shutichin. Chaica “Umachij” nisha ninmi (2 Corintios 11:3).

•   Pandachij (Mateo 4:3).

•   Llullaj (Juan 8:44).

Ñucanchij shungupi millaita rurana nishcaca mana canchu

 Huaquincunaca: “Diabloca gentecunapaj shungu ucupi millaita rurana yuyaimi can, cai millai yuyaipish Diospaj shungu ucupipish tiyanmi” nincunami. Pero mana shinachu can. Yaya Diosca jucha illaj, santomi can. Bibliapica shuj punllaca Diosca Diablohuanmi parlacurca nin. Chai punllaca Yaya Diosca Diablohuanmi parlacurca, mana paipaj shungu ucupi millai yuyaihuanchu parlacurca (Deuteronomio 32:4; Job 2:1-6). Jesuspish jucha illajmi carca. Paitapishmi Diabloca pandachisha nirca (Mateo 4:8-10; 1 Juan 3:5). Ima shina ricushcanchij Diabloca tiyanmi, mana millaita rurana yuyaillachu can.

 Achca gentecunaca Diabloca mana tiyanchu ninmi. Pero Bibliapica millai Diabloca tucui layata rurashpami gentecunataca pandachin nin (2 Tesalonicenses 2:9, 10). Gentecunata pandachingapajmi pai mana tiyashcata crichishca (2 Corintios 4:4).

Llulla: Diablotaca Lucifer nishpapishmi shutichin.

 Cierto: Huaquin Bibliacunapica Diablota churanapaj randica “Lucifer” nishpami churashcacuna. Shinapish hebreo rimaipica Luciferca “achij” nisha ninmi (Isaías 14:12). Bibliapica “achij” nishpaca Babiloniata mandajcunatami ricuchin. Yaya Diosca cai jatun tucushca mandajcunata pingaipi saquina cashcatami huillarca (Isaías 14:4, 13-20). Chaita rurashca qꞌuipa paicunamanta burlaringapajmi achij shimita utilizan.

Llulla: Diabloca Yaya Diospajmi trabajan.

 Cierto: Diabloca Yaya Diospajca mana trabajanchu, paipaj contrami can. Paica Diosta sirvijcunatapishmi achcata pꞌiñan. Chaimantami paicunata catirashpa, llullacunata nishpa llaquichin (1 Pedro 5:8; Apocalipsis 12:10).