Ari. Bibliapica Dios de verdad tiyashcatami claritota yachachin. Diospi feta charingapajca rijsishca religioncuna yachachishcacunallata crishpaca mana saquirinachu canchij. Chaipaj randica ñucanchijllatajmi tucui imalla yachachishcacuna alli cashcata, mana alli cashcata alli yuyashpa ricuna canchij (1 Tesalonicenses 5:21; 1 Juan 5:20). Dios de verdad tiyashcata ricuchij huaquin versocunata ricushun:

•   Jahua pachacunapi, cai Allpapi tucui rurashcacuna ordenpi cashcata ricushpa, causai tiyashcata ricushpami shuj huiñachij tiyashcata intindinchij. Bibliapica: “Tucui huasicunaca gentecuna rurashcallami. Ashtahuanpish tucui imalla tiyajcunata rurajca Diosmi” ninmi (Hebreos 3:4). Cai yuyaita intindinaca jahuallami can. Achca yachaj gentecunami cai yuyaita intindishpa Dios de verdad tiyashcata crincuna. a

•   Ñucanchijca imamanta causashcatami yachanata munanchij. Chaita mana yachashpaca yangamanta causacushcatami sintishun. Causangapaj imalla minishtirishcacunata charishpapish Bibliapi nishca shinaca espiritupica huajchacuna shinami sintiri tucunchij. “Espiritupi huajcha” cana nishpaca Diosta rijsina, paita adorana munaimantami parlacun (Mateo 5:3; Apocalipsis 4:11). Yayitu Diosca paita rijsishpa cushilla sintirichunmi ñucanchijta rurashca. Chaimantami Diosta rijsina munaita charishpaca shuj cꞌuyaj Dios tiyashcata intindinchij (Mateo 4:4).

•   Bibliapi tiyaj profeciacunaca achca huatacuna huashaman escribishca cashpapish tucuimi pajtarishca. Cai profeciacuna pajtarijta ricushpami caicunaca mana gentecuna nishcalla cashcata intindinchij (2 Pedro 1:21).

•   Bibliata escribijcunaca cienciamanta valishca yuyaicunatami yacharca. Pero chai tiempollapitaj causaj shujtaj gentecunaca chaitaca mana yacharcacunachu. Chai punllacunapica gentecunaca cai Allpaca shuj elefantepaj jahuapi, shuj jabalipaj jahuapi, shuj toropaj o shujtaj animalpaj jahuapi cashcatami yuyajcuna carca. Pero Bibliapica: ‘Diosca cai pachataca imapi mana huarcurcachu’ ninmi (Job 26:7). Shinallataj cai Allpa ima shina cashcata parlangapajca cai pachaca ‘muyunchishca’ o shuj círculo shinami can ninmi (Isaías 40:22). Achca gentecunami Bibliata escribijcuna chashna yuyaicunata charichunca Diosllatajmi yuyaita cushcanga nincuna.

•   Bibliapica Diospi mana crij gentecuna rurashca tapuicunapaj respuestacunatami tari tucunchij. Por ejemplo, huaquin gentecunaca: Diosca cꞌuyaj, tucuita ruraj Dios cashpaca, ¿imamantataj millai ruraicuna, llaquicuna tiyachun saquin? ¿Religioncunaca imamantataj achca problemacunata apamun? nishpami tapurishcacuna (Tito 1:16). Cai tapuicunapaj, shujtaj tapuicunapaj respuestacunata Bibliapi liyishpami Diospi cri tucungui.