Ari. Shungumanta mañajpi, pai munashca shina mañajpica Diosca uyangami. Ñaupa tiempopica huaquin runacunaca Diosman ayudahuai nishpami mañarca. Bibliapica cai runacunamanta yachashpaca mana nunca mañashca cashpapish Diosta mañanatami munangui.

•   “Mandaj Dios, ñuca Taita Dioslla, ayudahuayari. Quiquin llaquij cashca shinallataj quishpichihuayari” (Salmo 109:26).

•   “Ñucaca llaquichishcami cani. Ñucaca ima illajmi cani. Taita Dioslla, ñucapajman utca shamuyari. Quiquinca ñucata ayudajmi cangui” (Salmo 70:5).

 Cai versocunata quillcaj runaca Diospi tucui shunguhuanmi crirca. Pero ¿ñucanchijca mana pai shina cajpica? Shina cajpipish Diosca paita mashcajcunata, alli shungucuna cajcunatapishmi uyan. Bibliapica Mandaj Diosca shungupi, espiritupi llaquilla cajcunatapish uyanmi ninmi (Salmo 34:18).

 Huaquinpica Diosca ñucanchijmanta carupimi can, ñucanchij llaquicunamanta mana llaquirinchu nishpami yuyai tucunchij. Pero Bibliapica: “Mandaj Diosca tucuita yalli jatunmi. Chashna cashpapish mana jatun tucushca mañashcatami uyaracun. Ashtahuanpish jatun tucushcataca carumanta ricucunllami” ninmi (Salmo 138:6). Jesusca paita catijcunataca: “Cancunapaj uma ajchapish tucui yupashcami canguichij” nircami (Mateo 10:30). Ñucanchijca uma ajchata mana yupai tucunchijchu. Pero Jehová Diosca ñucanchijta cꞌuyashcamantami chaita rurashca. Chaita rurashca cashpaca ñucanchij llaquicunamanta paiman mañajpica ¿manachu uyanga? (1 Pedro 5:7).