Bibliapica Jesús ima punlla huacharishcataca mana ninchu. Cai catij ishqui librocunapipish Jesús ima punlla huacharishcataca mana pi yachashcatami nincuna:

•   Comentario Bíblico Moody nishca libropica: “Jesús ima punlla huacharishcataca mana yachanchijchu” ninmi.

•   Diccionario de historia de la Iglesia nishca libropica: “Jesús ima punlla, ima quilla huacharishcataca ima quillcashcapish mana ricurinchu” ninmi.

 Shinashpaca ¿Jesusca ima punllataj huacharirca? Bibliapi Jesús ima punlla huacharishcata mana nijpipish, Bibliapi ishqui yuyaicunata ricushpa achcacunaca 25 de diciembrepi mana huacharishcatami cuentata japishcacuna.

Jesusca tamia, razu quillacunapica mana huacharircachu

1.   Gobiernoca shuticunata quillcachichunmi mandarca. Jesús huacharina punllacunapaj ashalla faltajpica, mandaj César Augustoca tucuicunata paicunapaj propio llajtacunapi shuticunata quillcachichun mandarca. Chaita pajtachingapajca Josepish, Mariapish semana yallitajmi purina carca (Lucas 2:1-3). Cai mandashcataca impuestocunata cobrangapaj, cꞌaricunata soldadocuna tucuchun nishpa agllangapajmi churashcanga. Chaita yachashpaca gentecunaca pꞌiñarishcangami. Shinapish mandaj César Augustoca gentecuna ama ashtahuan pꞌiñarichunca achca chiri punllacunapi chai caruman richunca mana mandanmanchu carca.

2.   Canlla ovejacuna. Bibliapi nishca shinaca Jesús huacharishca quillapica michijcunaca “cada tutami paicunapaj ovejacunata cuidashpa canllapi pacarijcuna carca” (Lucas 2:8). La vida cotidiana en Palestina en tiempo de Jesús libropi nishca shinaca, michijcunaca “marzo tucuri quillapi manaraj Pascua punlla chayajllapitajmi canlla ovejacunata michingapaj llujchishpaca noviembre chaupi quillapi tigrajcuna carca. Tigrashca qꞌuipaca tamia, chiri punllacuna cashcamantami ovejacunaca huichcashca pasajcuna carca. Bibliapi nishca shinaca Jesús huacharishca punllapica michijcunaca ovejacunata cuidashpa canllapi pacarijcuna carca. Caita yachashpami Jesusca 25 de diciembrepi mana huacharishcatami intindinchij”.

Jesusca octubre callari quillapimi huacharirca

 Jesús ima punlla huacharishcata yachangapajca caipi yuyashun. Jesusca 14 de nisán, huata 33-pimi huañurca. 14 de nisán punllaca más o menos abril punta punllami carca (Juan 19:14-16). Jesusca huillai callarishpaca 30 huatacunatami charirca. Paica quimsa huatacuna chaupitami huillarca. Jesús huañushca punllamanta huashaman cuentashpami, huata 2-pi octubre callari punllacunapi Jesús huacharishcata yachanchij (Lucas 3:23).

 Jesús 25 de diciembreta mana huacharishca cajpipish ¿imamantataj chai punllapi Navidadta yuyarincuna? Enciclopedia de la Religión Católica nishca libropica: “Romanocunaca 25 de diciembretaca ‘inti huacharishca’ nishpami fiestata rurajcuna carca. Chaimantachari iglesiata pushajcunaca inti huacharishcata yuyarinapaj randica, Jesusmi 25 de diciembrepi huacharirca nishpa chai fiestallatataj rurashpa catircacuna” ninmi. Shinallataj The Encyclopedia Americana nishca libropica: “Achca yachaj runacuna nishca shinaca yanga Diosta adorajcuna Jesusta catij tucunata munachunmi Navidad fiestata callarichircacuna” ninmi.