Papúa Nueva Guinea Comité de Sucursalpi sirvij huauqui Kegawale Biyamami hiri motu shimipi Traducción del Nuevo Mundo Biblia llujshishcata huillarca. Chai Biblia llujshishcata huillangapaj programataca Port Moresbypi saquirij testigo de Jehovacunapaj sucursalpimi ñaupaman ña grabashcacuna carca. Chai programataca 7.000 yalli gentecunami 28 de noviembre de 2020-ta ricurcacuna.

Muyundij Allpapi tiyaj llajtacunamantaca Papúa Nueva Guinea llajtapimi gentecunaca ashtahuantaj chꞌican chꞌican shimicunata parlancuna. Chai llajtapica más o menos 840 chꞌican chꞌican shimicunatami parlancuna. Pero quimsa principal shimicunami tiyan, y shujca hiri motu shimimi can. Chai shimitaca casi 140.000 gentecunami parlancuna.

Comité de Sucursalpi sirvij huauqui Kukuna Jackca: “Cai shimita parlajcunaca cai Biblia llujshichunca achca tiempotami shuyacushcacuna. Traducción del Nuevo Mundo Biblia intidirinalla cashcamantami huauqui panicunaca achcata valorangacuna” ninmi.

Sujta huauqui panicunami 10 huatacunapi cai Bibliata traducircacuna. Traducishpa ayudaj shuj panica: “Bibliapi Genesismanta Apocalipsiscama Diospaj shuti tiyajta ricushpaca turi ñañacunaca achcatami cushicungacuna. Cai sumaj regalota cushcamantami Jehová Diostaca pagui ninchij” ninmi.

Cai mushuj Bibliata traducingapaj huauqui panicuna achcata esforzarishcata yuyarishpaca profeta Isaías shinami sintirinchij. Paica “Mandaj Dioslla, quiquinmi ñucanchijmanca sumaj causaita cungui. Tucui imata ñucanchij rurajpipish quiquinmi rurachishcangui” nircami (Isaías 26:12).