24 de enero de 2021-tami La Biblia: el Evangelio según Mateo libro zimbabuense shimipi llujshishcata huillarcacuna. Zimbabue llajta Comité de Sucursalpi sirvij huauqui Taurai Mazarurami cai libro llujshishcata shuj grabashca programapi huillarca.

Zimbabuense señas shimipi sirvij 401 huauqui panicunami cai Mateo librota chasquishpaca achcata cushicurcacuna. Paicunaca ñami cai librohuan estudianata, predicanata munancuna.

Pandemia tiyashcamantami traducishpa ayudaj huauqui panicunapajca sinchi carca. Paicunaca sordo gentecunahuan ñahui parlashpami paicuna utilizashca señascunata traduccionpipish utilizajcuna carca. Pero COVID-19 ungüi tiyashcamantami ña mana chaita rurai tucurcacuna. ¿Ima shinataj chai jarcaicunata chimbapurarcacuna? Paicunaca Internetpi videollamadata rurashpami sordocunahuan parlai tucurcacuna. Chashna rurashcamantami Zimbabue llajtapi causaj tucui sordocuna cai llujshishca traducciontaca alli intindi tucurcacuna.

Zimbabue llajta Comité de Sucursalpi sirvij John Hunguka huauquica: “Mateo librota llujchinaca shuj jatun proyectopaj callarillami can. Zimbabue señas shimipi tucui Bibliata traducingapajca unos 10 huatacunami minishtiringa” nircami.

Cai proyectomi Jehová Dios tucuicunata cꞌuyashcata ricuchin. Paica ñucanchijtaca achcatami bendiciashca. Chaimantami ñucanchijca ‘tucui llajtacunaman, chꞌican chꞌican aillucunaman, chꞌican chꞌican rimaicunaman, tucui pueblocunaman huiñaipaj alli huillaicunata’ huillashpa catishun (Apocalipsis 14:6).