Éxodo 12:1-51
12 Chai qꞌuipami Jehová Diosca Egipto llajtapi Moisestapish, Aarontapish cashna nirca:
2 “Cai quillami huatapaj callari quilla canga. Cai quillami cancunapajca callari quilla canga.
3 Tucui israelitacunapaj ñaupajpi parlashpa paicunataca cashna nichij: ‘Cai quillapaj chunga punllapica cada familiami shuj malta ovejata agllana can. Cada huasipi cajcunami shuj malta ovejata agllana can.
4 Pero malta ovejata tucui micungapaj maijan familiapi ashallacuna cashpaca vecinocunata huasiman cayashpami paicunahuan tandalla micuna can. Mashna gentecuna cashcata ricushpa, cada uno mashnata micugrijta ricushpami oveja aichataca chaupina can.
5 Malta carneroca shuj huatatami charina can. Shinallataj sano animalmi cana can. Malta ovejata cashpa o huahua chivota cashpami agllai tucunguichij.
6 Chai animaltaca cai quillapaj 14 punllacamami cuidana canguichij. Chai punllami israelitacunapaj tucui familiacunaca ña tutayacujpi chai animalta huañuchina canguichij.
7 Chai qꞌuipaca chai animalpaj aichata micugrishca huasipimi pungu ishqui lado caspicunapi, pungu umbralpipish asha yahuarta tsirapana* canguichij.
8 Aichataca chai tutallatajmi micuna canguichij. Chai aichataca ninapi cusashpami levadura illaj tandahuan, jayaj verduracunahuan micuna canguichij.
9 Aichataca ashallatapish chahuataca ama micunguichijchu. Yacupi tꞌimbuchishpa yanushcatapish ama micunguichijchu. Ashtahuanpish umandij, chaqui tullucunandij, chunllullicunandij tucuita ninapi cusaichij.
10 Cayandij tutamantapajca ima aichata ama huaquichinguichij. Caya tutamantapaj sobrajpica ninapimi rupachina canguichij.
11 Cancunaca cinturonta huatarishca, sandaliacunata churarishca, maquipi tauna caspita aisashcami micuna canguichij. Shinallataj utca utcami micuna canguichij. Caica Jehová Diospaj Pascua fiestami.
12 Cai tutaca tucui Egipto llajtata rishpami chaipi causaj gentecunapaj tucui punta churicunata huañuchisha. Shinallataj chaipi tiyaj punta huacharishca animalcunatami huañuchisha. Egiptopi tiyaj tucui dioscunatapishmi juzgashpa castigasha. Ñucaca Jehová Diosmi cani.
13 Yahuarca cancuna maipi cashca huasicunapica shuj señalmi canga. Yahuarta ricushpaca pasashpa rishallami. Egipciocunata castigashpaca cancunataca mana llaquichishachu.
14 Cancunaca cai punllataca Jehová Diospaj shuj fiestata rurashpami yuyarina canguichij. Cancunapaj huahua huahuacunapish huatantami cai fiestataca rurana can. Cai leytaca siempremi pajtachina canguichij.
15 Levadura illaj tandataca canchis punllacunatami micuna canguichij. Pꞌunguillishca masataca primer punllamantami cancunapaj huasimanta llujshichina canguichij. Maijanpish chai canchis punllacunapi imatapish levadurahuan chagrushcata micujca Israel llajtapica huañuchishcami canga.
16 Punta punllaca Diosta adorangapajmi tandanacuna canguichij. Canchis punllapish Diosta adorangapajmi cutin tandanacuna canguichij. Chai punllacunapica ima trabajota mana ruranachu canguichij. Cada uno imata micugrishcallatami preparai tucunguichij.
17 Chai punllami tucui cancunataca Egipto llajtamanta llujshichisha. Chaimantami cancunaca Levadura illaj tandata micuna fiestata rurana canguichij. Cancunapaj huahua huahuacunapish huatantami cai fiestataca rurana can. Cai leytaca siempremi pajtachina canguichij.
18 Punta quillapica levadura illaj tandatami micuna canguichij. 14 punlla chishimanta callarishpaca 21 punlla chishicamami micuna canguichij.
19 Canchis punllacunataca pꞌunguillishca masaca cancunapaj huasipica mana tiyanachu can. Maijanpish shujtaj llajtamanta cashpa o cai llajtallamantataj cashpa imatapish levadurahuan chagrushcata micujca Israel llajtapica huañuchishcami canga.
20 Levadurahuan* rurashcataca imatapish ama micuichijchu. Tucui cancunapaj huasicunapimi levadura illaj tandata micuna canguichij’ nichij” nircami.
21 Chaimi Moisesca chai rato israelitacunata tucui pushajcunata* cayashpaca cashna nirca: “Richij, cada uno shuj malta ovejata o huahua chivota cancunapaj familiapaj agllaichij. Chaitaca Pascua fiestata rurangapaj huañuchichij.
22 Chai qꞌuipaca lutsai hisopota* japishpa matepi tandashca yahuarpi pambaichij. Chaihuanca pungu ishqui lado caspicunapi, pungu umbralpipish llihuichij. Huasimantaca cayandij punllacama ni pi mana llujshinachu can.
23 Jehová Diosca egipciocunata castigangapajmi shamunga. Chashna shamushpaca pungu ishqui lado caspicunapi, pungu umbralpipish yahuarta ricushpaca Jehová Diosca pasashpa ringallami. Paica cancunapaj huasipi cajcunataca ni maijanta mana huañuchingachu.
24 Cancunaca cai fiestatami rurana canguichij. Cai leytaca cancunapish, cancunapaj huahuacunapishmi siempre pajtachina canguichij.
25 Jehová Dios cancunaman cushami nishpa jurashca allpaman yaicushpaca cai punlla fiestatami rurashpa catina canguichij.
26 Cancunapaj huahuacuna ‘¿Imamantataj cai fiestataca ruranguichij?’ nishpa tapujpica
27 cancunaca ‘Cai sacrificioca Jehová Diospaj Pascua* fiestata rurangapajmi can. Diosca Egipto llajtapica israelitacunapaj huasicunataca pasashpa rircallami. Paica egipciocunata castigashpaca ñucanchij familiacunataca quishpichircami’ nishpami cutichina canguichij” nircami.
Chaimi israelitacunaca cungurishpa cumurircacuna.
28 Chashnami israelitacunaca Jehová Dios Moisesman, Aaronman mandashca shinallataj rurarcacuna. Paicunaca Dios mandashca shinatajmi rurarcacuna.
29 Ña chaupi tuta cajpimi Jehová Diosca Egipto llajtapica tucui punta churicunata huañuchirca. Jatun tiyarinapi tiyacuj faraonpaj punta churimanta callarishpaca prezupi tiyacuj runapaj punta churicamami huañuchirca. Shinallataj tucui punta huacharishca animalcunatami huañuchirca.
30 Chai tutaca faraonpish, faraonta sirvijcunapish, tucui caishuj egipciocunapishmi jatarircacuna. Tucui huasicunapi huañui tiyashcamantami tucui Egipto llajtapica sinchita caparishpa huacashca uyarirca.
31 Chai tutallatajmi faraonca Moisesta, Aaronta chai rato cayashpaca cashna nirca: “¡Cai rato richij! Cancunapish, caishuj israelitacunapish ñuca pueblomanta caruyaichij. Cancuna nishca shinallataj Jehová Diosta adoranaman richij.
32 Cancuna nishca shinallataj cancunapaj ovejacunatapish, vacacunatapish pushaichij. Shinallataj ñucata bendiciachun Diosta mañaichij” nircami.
33 Chaimi egipciocunaca israelitacunataca chai llajtamanta utca richun mañarcacuna. Paicunaca: “¡Paicuna mana rijpica tucuicunami huañushun!” nishpami yuyarcacuna.
34 Israelitacunaca paicunapaj jahua churanacunapi pilluchishca levadura illaj masatapish, masata rurana bateacunatapish japishpami rigra jahuapi aparircacuna.
35 Shinallataj israelitacunaca Moisés nishcatami rurarcacuna. Paicunaca cullquihuan, orohuan rurashca cosascunata, ropatapishmi egipciocunata mañarcacuna.
36 Jehová Diosca israelitacunataca egipciocunapaj ñaupajpi alli ricurichunmi saquirca. Chaimi paicuna imata mañashcata curcacuna. Israelitacunaca egipciocuna charishca cosascunatami quichurcacuna.
37 Chai qꞌuipaca israelitacunaca Ramesesmanta llujshishpaca Sucot ladomanmi rircacuna. Paicunaca casi 600.000 cꞌaricunami* carca. Shinapish huahuacunataca mana cuentashcacunachu carca.
38 Israelitacunahuanca tucui laya achca gentecunami* rircacuna. Shinallataj israelitacunaca ovejacunata, vacacunata, achca animalcunatami pushashpa rircacuna.
39 Paicunaca Egiptomanta apashca masahuanmi levadura illaj redondo tandata rurarcacuna. Paicunata Egiptomanta rato llujshichishpa cachajpimi micunata preparangapajca tiempota mana charircacuna. Chaimantami tandaca levadura illaj carca.
40 Israelitacunaca Egipto llajtapica 430 huatacunatami causashcacuna carca.
41 Ña 430 huatacuna pajtai punllami Jehová Diospaj puebloca Egipto llajtamanta llujshirca.
42 Jehová Diosca israelitacunataca chai tutami Egipto llajtamanta llujshichirca. Chaimantami israelitacunaca chai tutata yuyarishpa Jehová Diosta jatunyachingapaj shuj fiestata rurana can. Chaitaca paicunapaj huahua huahuacunapishmi huashan huashan rurana can.
43 Chai qꞌuipami Jehová Diosca Moisesta, Aarontaca cashna nirca: “Pascua fiestapaj leyca caimi can. Shujtaj llajtamanta runacunaca Pascua micuitaca ni pi mana micui tucunchu.
44 Maijanpish cullquihuan randishca esclavota charishpaca circuncisiontami rurachina can. Chashna rurajllapimi chai esclavoca Pascua micuita micui tucunga.
45 Caru llajtamanta shamushca runacunapish, cullqui jahua trabajaj runacunapish Pascua micuitaca mana micui tucuncunachu.
46 Malta ovejapaj aichataca shuj huasillapimi micuna can. Chai aichataca ashallatapish huasimantaca mana llujshichinachu can. Shuj tullullatapish mana pꞌaquinachu can.
47 Pascua fiestataca tucui israelitacunami rurana can.
48 Shujtaj llajtamanta runa cancunahuan causacushpa Jehová Diospaj Pascua fiestata rurasha nishpaca paipaj huasipi caj tucui cꞌaricunatami circuncisionta rurachina can. Chashna rurashpallami Pascua fiestataca rurai tucunga. Paica shuj israelita shinallatajmi tucunga. Circuncisionta mana rurachishca runaca Pascua micuitaca mana micui tucungachu.
49 Israelitacunapish, cancunapurapi causacuj shujtaj llajtamanta runapish chai leyllatatajmi pajtachina can” nircami.
50 Israelitacunaca tucuicunami Moisesman, Aaronman Jehová Dios mandashca shinallataj rurarcacuna. Paicunaca Dios imata nishcatami rurarcacuna.
51 Chai punllallatajmi Jehová Diosca Egipto llajtamantaca tucui israelitacunata llujshichirca.
Notacuna
^ O “chirapana”.
^ “Levadura” shimita huasha diccionariopi ricui.
^ Hebreo rimaipica: “ancianocuna” ninmi.
^ “Hisopo” shimita huasha diccionariopi ricui.
^ “Pascua” shimita huasha diccionariopi ricui.
^ Hebreo rimaipica: “chaquihuan purij cꞌaricunami” ninmi. Cai cꞌaricunaca macanacungapaj allichirishcacunami carca.
^ Caipica huaquin egipciocunamanta, mana israelita caj achca gentecunamantapishmi parlacun.
