Éxodo 31:1-18
31 Chai qꞌuipaca Jehová Diosca Moisestaca cashnami nirca:
2 “Ricui, Judapaj familiamanta caj Bezaleltami agllashcani.* Paica Uripaj churimi can. Urí runaca Hurpaj churimi can.
3 Bezalelmanca ñuca espiritutami cusha. Chashnami paica alli yachaita, entendimientota, alli yuyaita charinga. Shinallataj tucui laya artesaniacunata ruranatami yachanga.
4 Paica sumaj dibujocunata ima shina ruranatami ricunga. Shinallataj orohuan, cullquihuan, cobrehuan trabajocunatami ruranga.
5 Rumicunatapish pꞌaquishpa, labrashpami alajata churanga. Maderahuanpish tucui laya cosascunatami ruranga.
6 Paita ayudachunca Danpaj familiamanta caj Ahisamacpaj churi Oholiabtami agllashcani. Shinallataj imatapish alli ruraj runacunapaj shungupimi ñuca alli yachaita churasha. Chashnami paicunaca canman tucui imalla mandashcata rurangacuna:
7 tandanacuna carpa huasita, Leyta huaquichina arcata, arca tapata, carpa huasipi tiyaj tucui cosascunata,
8 mesata, mesapi tiyaj tucui cosascunata, oro puro candelerota, candeleropaj tucui cosascunata, inciensota rupachina altarta,
9 rupachishca ofrendata cuna altarta, altarpaj tucui cosascunata, tanqueta, tanquepaj baseta,
10 sumajta ahuashca churanacunata, sacerdote Aarón churarina churanacunata, sacerdotecuna shina sirvingapaj Aaronpaj churicuna churarina churanacunata,
11 agllana aceiteta, Diospaj huasipi rupachina mishquijllata ashnacuj inciensotapishmi rurangacuna. Paicunaca canman tucui imalla mandashcatami rurangacuna” nircami.
12 Jehová Diosca Moisestaca cashnapishmi nirca:
13 “Israelitacunahuan parlashpaca cashna ningui: ‘Tucuimanta yallica ñucapaj agllashca sábado punllacunatami respetana canguichij. Cai punllacunaca cancunahuan ari ninacushcata ricuchij señalmi canga. Cai señalmi ñuca, Jehová Dios cancunata ñucapajlla chꞌicanyachishcata siempre yuyachinga.
14 Sábado punllaca ñucapajlla chꞌicanyachishca cashcamantami chai punllataca respetana canguichij. Maijanpish chai punllata yangapi churashpaca huañunami can. Maijanpish chai punllapi ima trabajota rurashpaca israelitacunapuramantaca huañuchishcami canga.
15 Cancunaca sujta punllacunatami trabajai tucunguichij. Pero séptimo punllaca sábado punlla, samarina jatun punllami can. Chai punllaca Jehová Diospajlla chꞌicanyachishcami can. Maijanpish sábado punllapi trabajashpaca huañunami can.
16 Israelitacunaca sábado punllataca respetanami can. Sábado punllataca siempremi yuyarina can. Cai ari ninacushcaca huiñaipajmi can.
17 Caica ñucahuan israelitacunahuan ari ninacushcata huiñaipaj ricuchij señalmi canga. Jehová Diosca cielotapish, allpatapish sujta punllacunapimi rurarca. Pero séptimo punllapica trabajanata saquishpami samarirca’ ningui” nircami.
18 Diosca Moiseshuan Sinaí urcupi parlashca qꞌuipaca Leyta quillcashca ishqui tablacunatami curca. Chaicunaca ishqui tabla rumicunami carca. Chai tablacunapimi Diosca paipaj dedohuan quillcarca.
Notacuna
^ Hebreo rimaipica: “paipaj shutipi cayashcani” ninmi.
