Éxodo 9:1-35
9 Chai qꞌuipami Jehová Diosca Moisestaca cashna mandarca: “Faraonmanca caita nigri: ‘Hebreocunapaj Jehová Diosca caitami nin: “Ñucata adorachun* ñuca pueblo llujshichun saqui.
2 Pero paicunata richun mana saquijpi, paicunata jarcashpa catijpica
3 Jehová Diospaj maquimi campopi caj cambaj animalcunata huañuchinga. Caballocunata, burrocunata, camellocunata, vacacunata, ovejacunataca huañuchij ungüimi japinga.
4 Pero Jehová Diosca israelitacunapaj animalcunataca cuidangami. Paicunapaj animalcunaca egipciocunapaj animalcuna shinaca shujllapish mana huañungachu” ninmi’ ningui” nircami.
5 Ashtahuanpish Jehová Diosca chai llaqui ima hora callarinatami huillarca. Paica: “Cayami Jehová Diosca cai llajtapica chaita ruranga” nircami.
6 Cayandij punllaca Jehová Diosca chaitatajmi rurarca. Chaimantami egipciocunapaj tucui laya animalcuna huañui callarirca. Pero israelitacunapaj animalcunaca shujllapish mana huañurcachu.
7 Faraonca paita sirvijcunatami ima tucushcata ricunaman cacharca. Chaipimi paicunaca israelitacunapaj animalcuna shujllapish mana huañushcata ricurcacuna. Chashna jahuapish faraonca rumi shungu tucushpami israelitacuna llujshichunca mana saquirca.
8 Chai qꞌuipami Jehová Diosca Moisesta, Aarontaca cashna nirca: “Hornomanta ushpata ishqui maquihuan japichij. Chai ushpatami Moisesca faraonpaj ñaupajpi huairaman shitana can.
9 Chai ushpami ñutujlla polvo tucushpa tucui Egipto llajtata tapanga. Chai polvomi tucui Egipto llajtapica gentecunapipish, animalcunapipish quiyayashca úlcera ungüi tucunga” nircami.
10 Chaimi paicunaca shuj hornomanta ushpata japishpa faraonpaj ñaupajpi shayarircacuna. Chai qꞌuipami Moisesca ushpataca huairaman shitarca. Chaimi gentecunapipish, animalcunapipish quiyayashca úlcera ungüi llujshirca.
11 Adivinaj sacerdotecunaca Moisespaj ñaupajpica mana ricuri pudircacunachu. Paicunatapish tucui egipciocunata shinallatajmi úlcera ungüi japishca carca.
12 Pero Jehová Diosca faraón cutinllataj rumi shungu tucuchunmi saquirca. Chaimantami faraonca Jehová Dios Moisesman nishca shinallataj paicunataca mana cazurca.
13 Chai qꞌuipami Jehová Diosca Moisestaca cashna nirca: “Cayaca utca jatarishpa faraonhuan tupanaman ringui. Paitaca cashna ningui: ‘Hebreocunapaj Jehová Diosca caitami nin: “Ñucata adorachun ñuca pueblo llujshichun saqui.
14 Cunanca cantapish, canta sirvijcunatapish, cambaj llajta gentecunatapish tucui laya llaquicunahuanmi castigagrini. Chashnami canca tucui allpapi ñuca laya Dios pi mana tiyashcata yachangui.
15 Ñucaca cantapish, cambaj llajta gentecunatapish ñuca maquita chutashpami huañuchij ungüihuan ña castigaiman carcani. Canca allpamantaca ñami chingaringuiman carcangui.
16 Shinapish ñuca poderta ricuchingapaj, tucui muyundij allpapi ñuca shutita rijsichingapajmi cantaca causashpa catichun saquishcani.
17 Pero canca jatun tucushpami catingui. Ñuca pueblo llujshichunpish mana saquinguichu.
18 Cayaca cai hora shinatami achcata runduchisha. Chashna laya rundutaca Egipto llajta tiyai callarishcamanta cunancama pi mana ricushcachu.
19 Chaimanta tucui cambaj animalcunata, campopi tucui can imalla charishcacunata huaquichichun cachai. Mana miticushpa campopi saquirij runapish, animalpish rundu urmajpica huañungacunami” ninmi’ ningui” nircami.
20 Faraonta sirvijcunamanta Jehová Dios ima nishcata tucui cazujcunaca chai ratomi paicunata sirvijcunataca huasiman yaicuchircacuna. Paicunapaj animalcunatapishmi huaquichircacuna.
21 Jehová Dios ima nishcata mana cazujcunaca paicunata sirvijcunatapish, paicunapaj animalcunatapish campopimi saquircacuna.
22 Chaimantaca Jehová Diosca Moisestaca: “Cambaj maquita huichiman chutai. Chashna rurajpimi tucui Egipto llajtapi rundu urmanga. Chai runduca tucui Egipto llajtapimi gentecunapaj jahuapi, animalcunapaj jahuapi, campopi huiñashca plantacuna jahuapi urmanga” nircami.
23 Shina nijpimi Moisesca paipaj varata huichilla chutarca. Jehová Diosca cꞌulun nichishpami runduchirca, ninapishmi* allpamanca urmarca. Jehová Diosca Egipto llajtapica runduchishpami catirca.
24 Runduca yallitajmi urmarca. Chai rundu chaupipipish ninami achijnicurca. Egipto llajta tiyai callarishcamantaca mana nunca chashna rundushcachu carca.
25 Runduca Egipto allpacunapi tucui imalla tiyashcatami tucuchirca. Gentecunatapish, animalcunatapishmi tucuchirca. Shinallataj tucui plantacunata, tucui yuracunatami ñuturca.
26 Israelitacuna causacushca Gosén allpallapimi mana rundurca.
27 Chaimi faraonca Moisesta, Aaronta cayanaman cachashpaca cashna nirca: “Cunanca juchata rurashcatami cuentata cuni. Jehová Diosca cashcata rurajmi. Pero ñucapish, ñuca pueblopish mana allitami rurashcanchij.
28 Cꞌulun nicushcapish, rundupish parachichun Jehová Diosta rogapaichij. Chai qꞌuipami cancunataca richun saquishalla. Caipica ña mana ashtahuan saquiringuichijchu” nircami.
29 Shina nijpimi Moisesca cashna nirca: “Cai llajtamanta llujshishpaca chai ratomi Jehová Diospaj ñaupajpi ñuca maquicunata chutasha. Cai allpa pacha Jehová Diospaj cashcata can yachachunmi cꞌulun nicushcapish, rundupish pararinga.
30 Chashna jahuapish canta sirvijcunapish, canpish Jehová Diosta mana manchana cashcataca ñucaca ñami yachani” nircami.
31 Chai tiempopajca cebadaca ñami quilluyacurca, linopish ñami sisacurca. Chaimantami linopish, cebadapish chingarirca.
32 Pero trigopish, espeltapish* llulluraj cashcamantami mana chingarirca.
33 Moisesca faraón maipi cashca llajtamanta llujshishpaca Jehová Diospaj ñaupajpimi maquicunata chutarca. Chaimi cꞌulun nicushcapish, rundupish pararirca, tamyapish ña mana urmarcachu.
34 Tamyapish, rundupish ña pasajpi, cꞌulun nicushcapish pararijpimi faraonca rumi shungu tucushpa cutinllataj juchata rurarca. Paita sirvijcunapish chashnallatajmi rurarcacuna.
35 Faraonca rumi shungu tucushpami catirca. Chaimi paica Jehová Dios Moisesman nishca shinallataj israelitacuna llujshichunca mana saquirca.
Notacuna
^ Hebreo rimaipica: “sirvichun” ninmi.
^ Caipica sinchi rayocuna urmacushcatami nicuj yuyachin.
^ “Espelta” shimita huasha diccionariopi ricui.
