1 Crónicas 19:1-19
19 Chai qꞌuipaca ammonitacunapaj rey Nahasmi huañurca. Pai huañujpica paipaj churimi mushuj rey tucurca.
2 Chaimi Davidca cashna nirca: “Nahasca ñucamanca mana tucurij cꞌuyaitami ricuchirca. Chaimantami ñucapish paipaj churi Hanunmanca mana tucurij cꞌuyaita ricuchisha” nirca. Chaimi Davidca Hanunpaj yaya huañushcamanta paita cushichichun huillajcunata cacharca. Chashnami Davidta sirvijcunaca Hanunta cushichingapaj ammonitacunapaj llajtaman chayarcacuna.
3 Ammonitacunata mandajcunaca Hanuntaca: “¿Davidca canta cushichingapaj paita sirvijcunata cachashpaca cambaj yayata respetacushcatachu yuyangui? ¿Manachu paicunaca ñucanchijta pacalla ricunaman, cai llajta ima shina cashcata yachashpa tucuchinaman shamushcanga?” nircacunami.
4 Shina nijpimi Hanunca Davidpaj sirvijcunata japishpaca shuj lado barbatapish tucui rasurashpa,* churanacunatapish siqui patacama utushpa paicunata tigrachishpa cacharca.
5 Cai runacunata yallitaj pingaipi churashpa paicunata llaquichishcatami Davidman huillarcacuna. Chaimi Davidca chai sirvijcunata shujtaj runacuna tupanaman richun cachashpaca: “Cancunapaj barbacuna huiñangacama Jericó llajtapi saquirichij. Chai qꞌuipaca tigranguichijlla” nirca.
6 Tiempo qꞌuipaca ammonitacunaca David paicunata pꞌiñashcatami* cuentata curcacuna. Chaimi Hanunpish, ammonitacunapish Mesopotamiamanta,* Aram-Maacamanta, Zobamantaca carretacunata, caballopi purijcunata contratachun 1.000 talento* cullquita cacharcacuna.
7 Shinallataj 32.000 carretacunata, Maacá llajtamanta reyta, paipaj soldadocunatapishmi contratarcacuna. Chashnami Maacá llajtamanta reypish, paipaj soldadocunapish Medebá llajta chꞌimba ladoman chayashpa chaipi carpa huasicunapi saquirircacuna. Ammonitacunaca paicunapaj llajtamanta llujshishpami macanacungapaj tandanacurcacuna.
8 Chaita yachaj chayashpami Davidca Joabtapish, tucui soldadocunatapish, macanacungapaj ashtahuan sinchi soldadocunatapish cacharca.
9 Ammonitacuna llujshishpaca chai llajta pungu yaicunpimi macanacungapaj allichirishca shayarircacuna. Cutin paicunahuan shamuj reycunaca caishuj lado pambapimi carcacuna.
10 Joabca ñaupaj ladomanta, huasha ladomanta contra soldadocuna paicunata llaquichinaman shamucujtami ricurca. Chaimi Joabca Israelmanta ashtahuan alli macanacuj soldadocunata agllarca. Shinallataj paicunataca siriocunahuan macanacuchunmi macanacungapaj allichirishca cachun churarca.
11 Cutin caishuj soldadocuna macanacungapaj allichirishca cachun, ammonitacunahuanpish macanacuchunmi paicunataca paipaj huauqui Abisái mandachun churarca.
12 Shinapish paica: “Siriocuna ñucata yalli sinchi cajpica, can ñucata ayudanaman shamungui. Cutin ammonitacuna canta yalli sinchi cajpica ñucami canta ayudanaman risha.
13 Ñucanchij gentecunamanta, ñucanchij Diospaj llajtacunamantami ñucanchijca sinchi, mana manchajcuna cana canchij. Chashna rurajpica Jehová Diospish pai munashca shinami* ruranga” nircami.
14 Joabpish, paipaj soldadocunapish siriocunahuanmi macanacurcacuna. Chaimi siriocunaca Joabmanta miticushpa rircacuna.
15 Ammonitacunaca siriocuna miticushpa rishcata yachaj chayashpami, paicunapish Joabpaj huauqui Abisaimanta miticushpa rircacuna. Chashnami paicunapaj llajtaman yaicurcacuna. Chai qꞌuipami Joabca Jerusalenman tigrarca.
16 Siriocunaca israelitacuna paicunata mishajta ricushpami Éufrates jatun yacu ladocunapi caj siriocunata tandanacuchun huillajcunata cacharca. Chaipi causajcunataca Sofacmi pushaj carca. Paica Hadadezerpaj soldadocunata mandajmi carca.
17 Davidman ima tucushcata huillajpimi paica chai rato Israelmanta tucui soldadocunata tandachirca. Chashnami Davidca Jordán jatun yacuta chꞌimbashpa paipaj contracunapajman chayarca. Chaipimi macanacuiman ringapaj allichirishca caj soldadocunata tandachirca. David siriocunapaj contra macanacunaman llujshijpimi paicunapish Davidhuan macanacurca.
18 Shinapish siriocunaca israelitacunamanta miticushpami rircacuna. Davidca 7.000 carretata manejajcunatami huañuchirca. Shinallataj 40.000 chaquillahuan purij sirio soldadocunatapish, Sofactapishmi huañuchirca. Sofacca soldadocunata mandajmi carca.
19 Hadadezerta sirvijcunaca israelitacuna mishashcata ricushpami Davidhuan utca alli tucurcacuna. Paicunaca Davidpaj sirvijcunapishmi tucurca. Shinallataj Siria llajtaca ammonitacunataca ña mana ashtahuan ayudasha nircachu.
Notacuna
^ O “tucui rasparishpa”.
^ O “millanayachishcatami”.
^ Hebreo rimaipica: “Aram-Naharaimmanta” ninmi.
^ Shuj talentoca 34.2 kilogramocunatami charirca. Ayuda B14-ta ricui.
^ O “paipaj ñuahuipi alli ricurishca shinami”.
