1 Crónicas 28:1-21
28 Davidca Israel llajtapi tucui mandajcunatami Jerusalenpi tandachirca: Familiacunata mandajcunata, reyta sirvijcunamanta grupocunata pushajcunata, 1.000 gentecunata pushajcunata, 100 gentecunata pushajcunata, rey Davidpaj, paipaj churicunapaj tucui charishca cosascunata, huagracunata, ovejacunata cuidashpa pushajcunatami tandachirca. Shinallataj palaciopi achca autoridadta charijcunata, sinchi cꞌaricunata, tucui imatapish ruraj cꞌaricunatami tandachirca.
2 Chaimi rey Davidca shayarishpa cashna nirca:
“Ñuca huauquicuna, ñuca llajtapi causajcuna caita uyaichij. Jehová Dioshuan ari ninacushca arcata churangapajmi shuj huasita shayachinata ñuca shungupi munarcani. Ñucanchij Dios paipaj chaqui sarunata chaipi churachunpishmi chashna shayachisha nircani. Chai huasita shayachingapajca tucuitami allichishcani.
3 Shinapish Diosca ñucamanca: ‘Canca macanacuiman rij runa cashcamantami achca gentecunata huañuchishcangui.* Chaimantami canca ñuca shutita jatunyachingapajca shuj huasita mana shayachingui’ nircami.
4 Chashna cajpipish israelitacunapaj Jehová Diosca ñuca yayapaj huasi ucupuramantaca, ñucatami huiñai huiñaita Israel llajtata mandachunca agllarca. Diosca Judatami pushaj cachun agllarca. Judapaj familiapuramantaca ñuca yayapaj familiatami agllarca. Ñuca yayapaj churicunapuramantaca ñucatami tucui Israel llajtata mandachun agllarca.
5 Jehová Diosca achca huahuacunahuanmi ñucataca bendiciarca. Ñuca tucui huahuacunapuramantaca Salomontami agllarca. Paimi Jehová Diospaj mandanapi tiyarishpa tucui Israel llajtata mandanga.
6 Diosca cashnapishmi nirca: ‘Cambaj churi Salomonmi ñuca huasitapish, ñuca patiocunatapish ruranga. Paitami ñuca churi shina cachun agllashcani, ñucapish paipajca yayami casha.
7 Ñuca mandashcacunata, ñuca imallata rurachun nishcacunatapish cunan punllacama cazungapaj pai ari nishcata pajtachishpa catijpica paipaj mandanataca huiñai huiñaipajmi churasha’ nircami.
8 Cunanca Jehová Diosta tucui sirvijcunapaj ñaupajpi, ñucanchij Diospaj ñaupajpimi cashna nini: ñucanchij Jehová Diospaj tucui mandashcacunata rijsingapaj, tucuipi alli cazungapajpish esforzarichij. Chashna rurashpaca cancunaca cai allpapimi causanguichij. Allpatapish cancunapaj huahua huahuacunapajmi herenciata shina huiñai huiñaipaj saquinguichij.
9 Cunanca ñuca churi Salomón, canpish cambaj yayapaj Diosta rijsishpa, paita tucui shunguhuan, cushicuihuan* sirvi. Jehová Diosca tucuicunapaj shungu ima shina cashcatami ricun. Shinallataj Diosca imallata munashcata, imallata yuyashcatapish tucuitami yachan. Canca Diosta mashcashpaca japinguimi. Shinapish paimanta caruyajpica paica cantaca huiñaipajmi saquinga.
10 Caita yuyaipi chari. Jehová Diosmari paita adorachun shuj huasita* can rurachun agllashca. Chaimanta ama manchaichu, trabajashpa callarilla” nircami.
11 Qꞌuipaca Davidca paipaj churi Salomonmanca Diospaj huasiman yaicuna corredorpaj, chꞌican chꞌican cuartocunapaj* plano dibujocunatami curca. Shinallataj huaquichina cuartocunapaj, terrazapi tiyaj cuartocunapaj, ucuman tiyaj cuartocunapaj, Dioshuan alli tucuna cuartopaj* plano dibujocunatapishmi curca.
12 Davidca Yaya Dios paipaj espíritu santohuan ricuchishca plano dibujocunatami Salomonmanca curca. Chai plano dibujocunapica Jehová Diospaj huasi patiocuna, chai huasi muyundijpi cuartocuna, Diospaj huasipi achca valij cosascunata huaquichina cuartocuna, Diospajlla chꞌicanyachishca achca valij cosascunata huaquichina cuartocunami tiyarca.
13 Shinallataj Salomonmanca sacerdotecunapaj grupocunata, levitacunapaj grupocunata ima shina organizana cashcatami huillarca. Paicuna Jehová Diospaj huasipi ima trabajocunata rurana cashcatapishmi huillarca. Jehová Diospaj huasipi tiyashca cosascunatapish ima shina utilizanatami yachachirca.
14 Davidca oromanta rurashca cosascunapajpish oro mashnata pesana cashcatami ricuchirca (chai oroca tucui laya cosascunata rurangapajmi carca, chai cosascunaca chꞌican chꞌican trabajocunapajmi carca). Cullquimanta rurashca cosascunapajpish cullqui mashnata pesana cashcatami ricuchirca. Chai cullquica tucui laya cosascunata rurangapajmi carca. Chai cosascunaca chꞌican chꞌican trabajocunapajmi carca.
15 Paica chꞌican chꞌican oro candelerocunapaj, oro lamparacunapajpish oro mashna pesana cashcatami ricuchirca. Shinallataj chꞌican chꞌican cullqui candelerocunapaj, cullqui lamparacunapaj cullqui mashna pesana cashcatami ricuchirca.
16 Davidca montonashca tandacunapaj* cada mesata rurangapajca oro mashnata pesana cashcatami paipaj churi Salomonmanca ricuchirca. Cullquimanta rurashca mesacunapajpish cada unopaj cullqui mashnata pesana cashcatami ricuchirca.
17 Oro puromanta rurashca jatun trinchecunapaj, tazoncunapaj, jarracunapaj oro mashnata pesana cashcatami ricuchirca. Shinallataj cada uchilla oro tazoncunata rurangapaj oro mashnata pesana cashcatami ricuchirca. Cada uchilla cullqui tazoncunata rurangapajpish cullqui mashnata pesana cashcatami ricuchirca.
18 Inciensota rupachina altartapish, Diospaj carretata ricuchijtapish rurangapaj chuyayachishca oro mashnata pesana cashcatami ricuchirca. Diospaj carretata ricuchijca orohuan rurashca querubincunami carca. Chai oromanta rurashca querubincunaca paicunapaj chutashca alascunahuanmi Jehová Dioshuan ari ninacushca arcata llanducurcacuna.
19 Davidca: “Jehová Dios ñucaman alli yachaita cujpimi imallata rurana cashcata intindircani. Chaimantami chai plano dibujocunapi tucui caicunataca quillcashpa churarcani” nircami.
20 Chaimi Davidca paipaj churi Salomontaca: “Sinchi cai, ama manchaichu, trabajashpa callari. Imatapish ama manchaichu, ama chujchuichu, ñucanchij Jehová Diosca canhuanmi canga. Paica cantaca manataj saquingachu, manataj shitangachu. Jehová Diospaj huasita tucuchingacamami paica canhuan canga.
21 Sacerdotecunapaj grupocunapish, levitacunapaj grupocunapish Diospaj huasipi sirvingapajmi caipi can. Canca tucui shunguhuan trabajaj runacunatapish, tucui laya trabajocunata alli rurajcunatapishmi charingui. Shinallataj mandajcunapish, tucui cai pueblopi causajcunapish can tucui mandashcacunatami catingacuna” nircami.
Notacuna
^ Hebreo rimaipica: “yahuarta jichashcangui” ninmi.
^ O “ama qꞌuillanayachishpa”.
^ Hebreo rimaipica: “Diospaj huasi ucuta” ninmi. “Diospaj huasi ucu” shimita huasha diccionariopi ricui.
^ Hebreo rimaipica: “huasicunapaj” ninmi.
^ O “arca tapata churana cuartopaj”.
^ Caipica Diosman cushca tandamantami parlacun.
