1 Crónicas 4:1-43
4 Judapaj churicunaca Pérez, Hezrón, Carmí, Hur, Sobalpishmi carca.
2 Sobalpaj churi Reayaca Jahatpaj yayami carca. Jahatca Ahumaipaj, Lahadpaj yayami carca. Paicunamantami zoratitapaj familiacunaca shamurcacuna.
3 Etampaj yayapaj churicunaca caicunami carca: Jezreel, Ismá, Idbaspishmi carca. (Paicunapaj panica Hazelelponí shutimi carca).
4 Penuelca Guedorpaj yayami carca. Ezerca Husapaj yayami carca. Caicunami Hurpaj churicuna carca. Efratapaj punta churi Hurca Belenpaj yayami carca.
5 Tecoapaj yaya Asjurca ishqui huarmicunatami charirca. Paicunaca Helá, Naarami carcacuna.
6 Naaraca Asjurhuanca Ahuzam, Héfer, Temení, Haahastaritapishmi charirca. Cai churicunatami Naaraca charirca.
7 Helapaj churicunaca Zéret, Izhar, Etnanpishmi carca.
8 Cozca Anubpaj, Zobebapaj yayami carca. Shinallataj Cozca Harumpaj churi Aharhelpaj huahua huahuapaj yayami carca.
9 Jabezca paipaj huauquicunapuramantaca paimi ashtahuan alli nishca carca. Paipaj mamaca: “Nanaihuanmi huachashcani” nishpami Jabez* shutita shutichirca.
10 Jabezca israelitacunapaj Diostami mañarca. Paica: “Ñucata bendiciahuai. Ñuca llajtapish mirarishpa catichun. Canca siempremi ñucahuan cangui. Ima llaquicunapish, ima mana allicunapish ama ñuca jahua shamuchun ñucata cuidangui” nircami. Diosca cai mañashcataca cutichircami.
11 Suhapaj huauqui Kelubca Mehirpaj yayami carca. Mehirca Estonpaj yayami carca.
12 Estonca Bet-Rafapaj, Paseahpaj, Tehinapajpish yayami carca. Tehinaca Ir-Nahaspaj yayami carca. Cai runacunaca Recá nishca llajtamantami carcacuna.
13 Quenazpaj churicunaca Otniel, Serayapishmi carca. Cutin Otnielpaj churica* Hatatmi carca.
14 Meonotaica Ofrapaj yayami carca. Serayaca Joabpaj yayami carca. Joabca Gue-Harasimpaj* yayami carca. Paicunaca artesanocuna cashcamantami chai shutita charircacuna.
15 Jefunepaj churica Calebmi carca. Calebpaj churicunaca Iru, Elá, Naampishmi carca. Elapaj churica* Quenazmi carca.
16 Jehalelelpaj churicunaca Zif, Zifá, Tiría, Asarelpishmi carca.
17 Ezrapaj churicunaca Jéter, Méred, Éfer, Jalonpishmi carca. Paipaj huarmica* chichu saquirishpami Miriamta, Samaita, Isbata huacharca. Isbá runaca Estemoapaj yayami carca.
18 (Paipaj judía huarmica Jeredta, Heberta, Jecutieltapishmi huacharca. Jeredca Guedorpaj yayami carca. Heberca Socopaj yayami carca. Jecutielca Zanoahpaj yayami carca). Tucui caicunami Bitiaspaj churicuna carca. Bitiasca faraonpaj ushushimi carca. Paimi Meredhuan cazararca.
19 Nahampaj panimi Hodiaspaj huarmi carca. Chai huarmipaj churicunaca garmitacunapuramanta Queilapaj yayacuna, maacatitacunapuramanta Estemoapaj yayacunami carca.
20 Shimonpaj churicunaca Amnón, Riná, Ben-Hanán, Tilonpishmi carca. Isipaj churicunaca Zóhet, Ben-Zohetpishmi carca.
21 Judapaj churica Selami carca. Selapaj churicunaca caicunami carca. Er, paica Lecapaj yayami carca. Laadá, paica Maresapaj yayami carca. Asbeapaj familiacunapish Selapaj huahua huahuacunamantami shamurcacuna. Cai familiacunaca alli telata rurajcuna cashcamantami rijsishcacuna carca.
22 Cai cꞌaricunapishmi Selapaj huahua huahuamanta carcacuna: Joquimpish, Cozebapi causaj runacunapish, Joaspish, Sarafpish, Jasubi-Lehempishmi carcacuna. Paicunami moabita huarmicunahuan cazararcacuna. Caicunataca ñaupa registrashcacunamantami llujshichishcacuna carca.*
23 Chai runacunaca allpamantami imatapish rurajcuna carca. Netaim, Guederá llajtacunapimi causajcuna carca. Paicunaca chaipi causashpami reypajpish trabajajcuna carca.
24 Simeonpaj churicunaca Nemuel, Jamín, Jarib, Zérah, Shaúl shuticunapishmi carca.
25 Shaulca Salumpaj yayami carca. Salumca Mibsampaj yayami carca. Mibsamca Mismapaj yayami carca.
26 Mismapaj churica* Hamuelmi carca. Hamuelpaj churica Zacurmi carca. Zacurpaj churica Simeimi carca.
27 Simeica 16 churicunata, sujta ushushicunatami charirca. Shinapish paipaj huauquicunaca mana achca churicunata charircachu. Paipaj familiacunapish Judapi causaj runacuna shinaca achca churicunata mana pi charircacunachu.
28 Simeipaj huahua huahuacunaca Beer-Sebapi, Moladapi, Hazar-Sualpi,
29 Bilhapi, Ezempi, Toladpi,
30 Betuelpi, Hormapi, Ziclagpi,
31 Bet-Marcabotpi, Hazar-Susimpi, Bet-Biripi, Saaraimpipishmi causarcacuna. David mandangacamami chai llajtacunaca paicunapaj carca.
32 Simeipaj huahua huahuacunaca Etam, Ain, Rimón, Token, Asán llajtacunapimi causarcacuna. Tucuica pichca llajtacunami carca.
33 Paicunaca cai muyundij llajtacunapi tiyaj uchilla pueblocunapipishmi Baalman chayangacama causarcacuna. Caicunami cada familiamanta registrashcacuna, maillapi causashcacunapish carcacuna.
34 Simeipaj caishuj huahua huahuacunaca Mesobab, Jamlec, Amasiaspaj churi Josá,
35 Joel, Jehupishmi carca. Jehuca Josibiaspaj churimi carca. Josibiasca Serayapaj churimi carca. Serayaca Asielpaj churimi carca.
36 Shinallataj Elioenái, Jaacoba, Jesohaya, Asaya, Adiel, Jesimiel, Benaya,
37 Zizapishmi carca. Zizaca Sifipaj churi, Sifica Alonpaj churi, Alonca Jedayapaj churi, Jedayaca Simripaj churi, Simrica Semayapaj churimi carca.
38 Caipi ricurij shuticunaca paicunapaj familiata pushajcunapaj shuticunami carca. Shinallataj paicunapaj familiacunapish mirarishpami catircacuna.
39 Paicunaca animalcunapaj qꞌuihuata mashcashpami Guedor llajta yaicunacama chayarcacuna. Guedor llajtaca shuj pugru pambapi inti llujshin ladomanmi carca.
40 Chaiman chayashpaca alli qꞌuihuacunata, achca qꞌuihuacunatami japircacuna. Chai llajtaca jatun, alaja, tranquilo lugarmi carca. Chaipimi ñaupa punllacunaca camitacunaca causajcuna carca.
41 Judá llajtamanta rey Ezequías mandacui punllacunapimi cai listapi anotashcacuna shamushpaca camitacunapaj carpa huasicunatapish, meunimcunapaj carpa huasicunatapish tucuchircacuna. Paicunata chashna huañuchishcamantami cunancama pi mana causashpa catin. Chai listapi tiyajcunaca paicunapaj animalcunapaj qꞌuihua tiyashcamantami chaipi causai callarircacuna.
42 Simeonpaj familiamanta 500 cꞌaricunami Seír urcuman rircacuna. Paicunata pushajcunaca Pelatías, Nearías, Refayá, Uzielpishmi carca. Paicunaca Isipaj churicunami carca.
43 Miticushpa rishca amalequitacunatapishmi tucuita tucuchircacuna. Chashnami paicunaca cunancama chaipi causashpa caticuncuna.
Notacuna
^ “Jabez” shutica hebreo rimaipica tal vez ‘nanai’ nisha nijmi yuyachin.
^ Hebreo rimaipica: “churicunaca” ninmi.
^ “Gue-Harasim” shutica ‘artesanocunapaj pugru pamba’ nisha ninmi.
^ Hebreo rimaipica: “churicunaca” ninmi.
^ O “Cai nishcacunaca ñaupa quillcashcacunami can”.
^ Hebreo rimaipica: “churicunaca” ninmi.
