1 Corintios 11:1-34
11 Ima shinami ñucaca Cristopaj ejemplota catini. Chashnallataj cancunapish ñuca ejemplota catichij.
2 Huauquicuna, cancunaca tucuipimi ñucata yuyaringuichij. Ñuca yachachishcacunatapish tucuitami ruracunguichij. Chaimantami cancunataca allitami ruracunguichij nini.
3 Shinapish caitami yachachun munani. Tucui cꞌaricunapaj umaca Cristomi, huarmipaj umaca cꞌarimi. Cutin Cristopaj umaca Diosmi.
4 Maijan cꞌaripish Diosta mañacushpa, mana cashpaca Diosmanta huillacushpa umata taparishpaca paipaj umatami pingachin.
5 Shinallataj maijan huarmipish Diosta mañacushpa mana cashpaca Diosmanta huillacushpa umata mana taparishpaca paipaj umatami pingaipi churan. Chashna rurashpaca uma ajchata lluchullata rutuchishca shinami.
6 Shuj huarmica umata mana taparishpaca uma ajchata uchillata rutuchichun. Shinapish uma ajchata uchillata rutuchinata mana cashpaca lluchullata rutuchinata pinganachishpaca umata taparichun.
7 Cꞌarica Diosman rijchaj, Diostapish jatunyachij cashcamantami paipaj umataca mana taparina can. Cutin huarmica cꞌaritami jatunyachin.
8 Cꞌarica mana huarmimantachu shamun, huarmimi cꞌarimanta shamun.
9 Shinallataj Diosca cꞌaritaca mana huarmipajchu rurarca. Ashtahuanpish huarmitami cꞌaripaj allipaj rurarca.
10 Chaimantami huarmica cusa mandaj cashcata ricuchij señalta paipaj umapi charina can. Angelcunamantapishmi paipaj umataca taparina can.
11 Chaimantami Amito Jesusta catijcunapurapica cꞌarica huarmi illajllaca mana tiyanman, huarmipish cꞌari illajllaca mana tiyanman.
12 Ima shinami huarmica cꞌarimanta shamun, chashnallatajmi cꞌaripish huarmimanta huacharin. Shinapish tucuimi Diosmanta shamun.
13 Cancunallataj juzgaichij: ¿huarmipajca umata mana taparishpa Diosta mañanaca allichu canga?
14 Cꞌarica paipaj ajchata largota huiñachishpaca gentecuna ima shina rurashca cashcatami pingaipi churan, ¿chaitaca manachu yachanguichij?
15 ¿Cutin huarmipaj ajchaca paita sumajyachingapaj cashcataca manachu yachanguichij? Diosca huarmimanca umata taparichunmi ajchata cushca.
16 Shinapish shuj runapajca caita ruranaca mana alli shinachari ricuringa. Ñucanchijpish, Diospaj congregacioncunapish shujtaj costumbrecunataca mana charinchijchu.
17 Cai mandashcacunahuanca cancuna allita ruracushcataca mana nicunichu. Cancuna tandanacushpaca ayudanacunapaj randica llaquichinacunguichijmi.
18 Puntapica cancunapaj tandanacuicunapi chꞌicanyarinacuicuna tiyashcatami uyashcani. Chaitaca ashata crinimi.
19 Cancunamanta maijancunallata Dios chasquina cashcata ricuchingapajmi cancunapurapica chꞌicanyarinacuicuna tiyanga.
20 Amito Jesús callarichishca micuita micungapaj tandanacushpaca mana allichirishcachu canguichij.
21 Chai micuita micungapajca ñami quiquin micunata cada uno micumushcanguichij. Chaimantami maijan yaricaihuan cajpica caishujca ña machashca can.
22 ¿Micungapajpish, ubyangapajpish manachu huasicunata charinguichij? ¿Diospaj congregaciontapish manachu respetanguichij? ¿Imata mana charijcunatapish pingaipichu churanguichij? ¿Cancunataca imatataj ni tucuniyari? ¿Allitami ruracunguichij ni tucunichu? Caimantaca allitami ruracunguichij nishpaca mana ni tucunichu.
23 Ñucaca Amito Jesusmanta imata chasquishcatami cancunamanca yachachircani: Amito Jesusca paipaj contracunaman paita entregai tutaca shuj tandata japishpa,
24 Diosta pagui nishca qꞌuipa chaupishpaca: “Caica cancunamanta cushca ñuca cuerpotami ricuchin. Caitaca ñucata yuyarishpa ruracunguichijlla” nircami.
25 Micushca qꞌuipaca chashnallatajmi copata paicunaman cushpa Jesusca: “Cai copaca mushuj ari ninacushcatami ricuchin. Cai mushuj ari ninacushcaca cancunamanta ñuca yahuarta jichajpimi callaringa. Mashna cutin cai copamanta ubyashpaca, ñucata yuyarishpa chashna ruracunguichijlla” nirca.
26 Cai tandata micushpa, cai copamanta ubyashpaca Amito Jesús huañushcatami pai shamungacama huillacunguichij.
27 Chaimanta maijanpish yangamanta cai tandata micushpa, Amito Jesuspaj copamanta ubyashpaca, Amito Jesuspaj cuerpotapish, yahuartapish mana respetashcamantami culpayuj tucunga.
28 Puntapica quiquin shungupi ima shina cashcatapish, allita ruracushcatapish ricuchun. Chashna rurashpallami tandataca micui tucunga, copamantapish ubyai tucunga.
29 Maijanpish Amito Jesuspaj cuerpota ricuchij cashcata mana cuentata cushpa micujca, ubyajca paipaj llaquipajllatajmi micun, ubyan.
30 Chaimantami cancunamanta achcacunaca irqui, ungushca canguichij. Achcacunacarin huañushcacunami.*
31 Shinapish ñucanchijllataj ima shina cashcata alli ricurishpaca mana juzgashca canchijmanchu.
32 Ashtahuanpish Jehová* Diosca ñucanchijta juzgashpaca cai pacha gentecunahuan ama llaquichishca cangapajmi disciplinan.
33 Shinaca ñuca huauquicunalla, chai micunata micungapaj tandanacushpaca tucuicuna chayangacama shuyaichij.
34 Maijanpish yaricaihuan cashpaca paipaj huasipi micuchun. Chashnami tandanacushcapica mana juzgashca canga. Shujtaj ruraicunataca chaiman chayashpami allichisha.
Notacuna
^ O “huañuipi dormirishcacunami”. Caipica mana huañunamantatajchu parlacun. Ashtahuanpish Diospaj ñaupajpi ña mana alli ricurinamantami parlacun.
^ “Jehová” shutita huasha diccionariopi ricui.
