1 Corintios 12:1-31
12 Huauquicuna, Dios cushca regalocunamanta alli yachachunmi munani.
2 Cancunaca Diosta manaraj rijsishpaca* cancunata umajpimi rurashcalla upa dioscunata adorarcanguichij. Paicuna maiman richun nijpipish rijllami carcanguichij ¿nachu?
3 Shinapish caita yachachunmi munani, Diospaj espiritupaj ayudahuan rimajca “¡Jesusca millai runami!” mana ni tucunchu. Ashtahuanpish espíritu santo ayudajllapimi maijanpish “¡Jesusca Amitomi!” ni tucun.
4 Chꞌican chꞌican regalocunami tiyan. Shinapish shuj espiritullami tiyan.
5 Diosta sirvingapajca chꞌican chꞌican ruraicunami tiyan. Shinapish shuj Amitollami tiyan.
6 Espíritu santomi gentecunataca chꞌican chꞌican ruraicunata rurachun ayudan. Ashtahuanpish shujlla Diosmi tiyan. Paimi tucui gentecunataca tucuita rurachun ayudan.
7 Shinapish espíritu santo cada unota ayudashcataca ricunallami. Diosmi tucuicunapaj allipaj chai espiritutaca cushca.
8 Diospaj espiritumi shujtaca alli yachaihuan parlachun ayudan. Chai espiritullatajmi caishujtaca shujtajcuna mana yachashcata parlachun ayudan.
9 Chai espiritullatajmi caishujtaca crichun ayudan. Chai espiritullatajmi caishujmanca alliyachingapaj poderta cun.
10 Chai espiritullatajmi caishujtaca milagrocunata rurachun ayudan. Caishujtaca Dios ima nishcata huillachunmi ayudan. Caishujtaca yachachishcacuna Diosmanta shamushcata o mana shamushcata ricuchunmi ayudan. Caishujtaca chꞌican chꞌican shimicunapi parlachunmi ayudan. Cutin caishujtaca chꞌican chꞌican shimicunaman traducichunmi ayudan.
11 Shinapish tucui chaicunataca Diospaj espiritullatajmi ruran. Chai regalocunataca pai munashca shinami cada unoman cun.
12 Shuj cuerpoca achca partecunatami charin. Achca partecunata charishpapish shujlla cuerpomi. Chashnallatajmi Cristopaj cuerpopish.
13 Tucui ñucanchijmi judiocuna cashpapish, griegocuna cashpapish, sirvijcuna cashpapish, cacharichishcacuna cashpapish shujlla cuerpo tucungapaj shuj espiritullapi bautizarircanchij. Tucuicunami chai espiritullatataj chasquircanchij.
14 Shuj cuerpoca mana shuj partellatachu charin. Ashtahuanpish achca partecunatami charin.
15 Chaquica “Ñucaca mana maquichu cani. Chaimi cuerpopaj parteca mana cani” ningachari. Chashna nishcallamantaca, ¿chaquica cuerpopaj parte canata saquingachu?
16 Rinrinca “Ñucaca mana ñahuichu cani. Chaimi cuerpopaj parteca mana cani” ningachari. Chashna nishcallamantaca, ¿rinrinca cuerpopaj parte canata saquingachu?
17 Tucui cuerpo ñahui cajpica, ¿rinrinca maipitaj canmanyari? Shinallataj tucui cuerpo rinrin cajpica, ¿singaca maipitaj canmanyari?
18 Shinapish Diosca cuerpopaj partecunataca cada unotami pai munashca shina churarca.
19 Tucui partecuna chaillataj cajpica, ¿cuerpoca maipitaj canmanyari?
20 Ashtahuanpish achca partecuna tiyashpapish shuj cuerpollami.
21 Ñahuica maquitaca “Mana minishtinichu” mana ni tucunchu. Umapish chaquicunataca “Mana minishtinichu” mana ni tucunchu.
22 Ashtahuanpish cuerpomanta mana valij shina ricurij partecunaca minishtirishcami can.
23 Shinallataj cuerpomanta mana tanto alaja cashcata yuyashca partecunataca sumajtami allichinchij. Chashnami cuerpomanta pingashca partecunaca sumaj ricurin.
24 Ashtahuanpish alaja partecunaca sumajyachichun mana minishtinchu. Diosmi cuerpotaca rurarca. Chashnami cuerpomanta mana tanto alaja partecunataca caishuj partecunamanta yalli jatunyachin.
25 Cuerpopi chꞌicanyarinacuicuna ama tiyachun, cuerpomanta partecunapish caishujmanta chaishujmanta preocuparichunmi chashna rurarca.
26 Cuerpomanta shuj parte llaquita apajpica, tucui caishuj partecunapishmi paihuan llaquita apan. Cutin cuerpomanta shuj parteta jatunyachijpica, tucui caishuj partecunapishmi paihuan cushicun.
27 Shinaca cancunaca Cristopaj cuerpomi canguichij. Cada unomi Cristopaj cuerpomanta shuj parte canguichij.
28 Diosca congregacionpica cashnami gentecunataca agllarca: puntapica apostolcunata, qꞌuipaca profetacunata, qꞌuipaca yachachijcunata, qꞌuipaca milagrocunata rurajcunata, qꞌuipaca alliyachingapaj poderta charijcunata, qꞌuipaca shujtajcunata ayudajcunata, qꞌuipaca ñaupajman pushanata yachajcunata, qꞌuipaca chꞌican chꞌican shimipi rimajcunata.
29 ¿Tucuicunachu apostolcuna? ¿Tucuicunachu profetacuna? ¿Tucuicunachu yachachijcuna? ¿Tucuicunachu milagrocunata rurajcuna?
30 ¿Tucuicunachu alliyachingapaj poderta charincuna? ¿Tucuicunachu chꞌican chꞌican shimicunapi rimancuna? ¿Tucuicunachu traducincuna?
31 Shinashpaca Dios cushca regalocunata ashtahuan chasquingapaj esforzarishpa catichij. Cunanca cancunamanca ashtahuan alli ñantami ricuchigrini.
Notacuna
^ Griego rimaipica: “shujtaj llajtamanta gentecuna cashpaca” ninmi.
