1 Corintios 14:1-40
14 Cꞌuyaita ricuchishpa catichij. Shinallataj Dios cushca regalota chasquingapajpish esforzarishpa catichij. Tucuimanta yallica Dios ima nishcata huillangapaj esforzarishpa catichij.
2 Chꞌican chꞌican shimicunapi parlaj runataca ni pi mana intindinchu. Diosllami paitaca intindin. Dios pacalla charicushcacunata espíritu santo parlachijpipish pai nishcataca ni pi mana intindinchu.
3 Shinapish Dios ima nishcata huillajca gentecunata sinchiyachingapaj, animangapaj, cushichingapajmi parlan.
4 Chꞌican chꞌican shimicunapi parlajca paillatajmi sinchiyarin. Cutin Dios ima nishcata huillajca congregaciontami sinchiyachin.
5 Tucui cancunataca chꞌican chꞌican shimicunapi parlachunmi munaniman. Shinapish Dios ima nishcata huillachunmi ashtahuantajca munani. Dios ima nishcata huillajmi chꞌican chꞌican shimicunata parlajtapish yalli can. Chꞌican chꞌican shimicunata parlajca pai ima nishcata mana traducishpaca congregaciontaca mana sinchiyachingachu.
6 Shinaca huauquicuna, cai rato chꞌican chꞌican shimicunapi parlashpa cancunapajman rishpaca, ¿ima shinataj cancunataca ayudashari? Cancunata ayudasha nishpaca Dios imata ricuchishcahuan, alli yachaihuan, shuj profeciahuan, Dios yachachishcacunahuanmi parlana cani.
7 Musicata tocana flautahuanpish, arpahuanpish chashnallatajmi tucun. Maijanpish flautata o arpata mana alli tocajpica, ¿ima shinataj imata tocacushcataca yachangacunari?
8 Shinallataj shuj trompetata mana alli tocajpica, ¿pitaj macanacungapajca allichiringari?
9 Cancunapish imata parlacushpa intindirinalla shimicunapi mana parlajpica, ¿pitaj imata nicushcataca yachangari? Chashna parlashpaca huairaman parlacushca shinallami canga.
10 Cai pachapica chꞌican chꞌican shimicunatami parlancuna. Chai tucui shimicunami intindirin.
11 Shinapish shujtaj shimipi ima nicushcata mana intindishpaca, ñucahuan parlacuj runapajca shujtaj llajtamanta shinami casha. Shinallataj ñucahuan parlacujpish ñucapajca shujtaj llajtamanta shinami canga.
12 Cancunahuanpish chashnallatajmi tucun. Cancunaca espíritu santohuan cushca regalota chasquinatami munacunguichij. Chaimanta congregacionta sinchiyachij regalocunata ashtahuan chasquingapaj esforzarichij.
13 Shinaca shujtaj shimipi parlajca pai imata nishcata traducingapajca Diosta mañachun.
14 Shujtaj shimipi ñuca mañashpaca mana ñucachu mañani. Ashtahuanpish espíritu santomanta chasquishca regalomi mañan. Shinapish ñuca yuyaipica imata nicushcataca mana intindinichu.
15 Shinashpaca ¿imatataj rurasha? Diosta mañangapajca espíritu santomanta chasquishca regalohuanmi mañasha. Shinallataj ñuca nishcacuna intindirinalla cachunmi mañasha. Espíritu santomanta chasquishca regalohuanmi Diosta cantasha. Shinallataj intindirinalla cantocunatami cantasha.
16 Espíritu santomanta chasquishca regalohuan Diosta mana alabajpica, ¿cancunapurapi caj yangalla runaca ima shinataj Diosta pagui nishpa can mañajpica “Chashna cachun”* ningari?
17 Ciertomi, canca Diosta pagui nishpaca sumajtami mañangui. Shinapish caishuj runataca mana sinchiyachinguichu.
18 Ñucaca tucui cancunata yalli chꞌican chꞌican shimicunapi parlaj cashcamantami Diosta pagui nini.
19 Shina cajpipish 10.000 palabracunata shujtaj shimipi ninapaj randica, congregacionpica shujtajcunata yachachingapajmi intindirinalla pichca palabracunallata ninata munani.
20 Huauquicuna, huahuacuna shinaca ama yuyaichijchu. Ashtahuanpish jatun runacuna shina yuyaichij. Shinapish millaita ama rurangapajca huahuacuna shina caichij.
21 Moisesman cushca leypica: “Jehová* Diosca: ‘Cai llajta gentecunaman huillachunca shujtaj llajtamanta gentecunata, chꞌican chꞌican shimicunapi parlaj gentecunatami cachasha. Chashnapish paicunaca ñucataca mana uyangacunachu’ ninmi” nircami.
22 Chꞌican chꞌican shimicunapi parlanaca Jesusta catijcunapaj señalca mana canchu. Ashtahuanpish Jesusta mana catijcunapaj señalmi can. Shinallataj Dios ima nishcata huillanaca Jesusta mana catijcunapajca mana canchu. Ashtahuanpish Jesusta catijcunapajmi can.
23 Chaimanta, tucui congregación tandanacushpaca tucuicunachari chꞌican chꞌican shimicunapi parlacungacuna. Chashna parlacujpi yangalla runacuna o Jesusta mana catijcuna chai ucuman yaicushpaca, ¿manachu cancunataca locomi canguichij ningacuna?
24 Ashtahuanpish tucui cancuna Dios ima nishcata huillacujpi Jesusta mana catij runa o shuj yangalla runa yaicushpaca paita sinchita cunacushcatami yuyanga. Shinallataj paita callarishpa tucuicuna ricucushcatami yuyanga.
25 Chaimi paipaj shungupi ima pacalla cashcata yachaj chayashpa, pambacama cumurishpa Diosta adorashpaca: “Diosca cancunahuantajmari cashca” ninga.
26 Shinaca huauquicuna, ¿tandanacuipica imatataj rurai tucunguichij? Cancuna tandanacushpaca shujca Diosta alabangapajmi salmocunata cantan, caishujca yachachinmi, caishujca Dios imata ricuchishcatami huillan, caishujca chꞌican chꞌican shimicunapimi parlan, caishujca traducishpami intindichin. Tucui caicunataca congregacionta sinchiyachingapaj ruraichij.
27 Maijancuna chꞌican chꞌican shimicunapi parlanata yachashpapish, ishquilla o quimsalla por turno parlachun. Paicuna ima nishcatapish shujtaj traducichun.
28 Shinapish shuj traducij mana tiyajpica congregacionpica upalla saquirichuncuna. Ashtahuanpish paicunapaj shungupi Dioshuan parlachun.
29 Profetacuna tiyashpaca ishquilla o quimsalla parlachun. Cutin caishujcunaca chai profetacuna imata nisha nicushcata intindingapaj alli uyachun.
30 Shinapish maijan chaipi tiyacujman Dios imatapish ricuchijpica pai parlachun. Cutin puntapi parlacujca upalla saquirichun.
31 Tucuicuna yachangapaj, tucuicuna animaringapajca Dios ima nishcataca tucuicunami shuj shuj huillai tucunguichij.
32 Profetacunaca espíritu santomanta chasquishca regalocunata alli utilizangapajmi jarcarinata yachana can.
33 Diosca imatapish mana maipishcachun ruranchu. Ashtahuanpish sumaj causaita cuj Diosmi.
Jucha illajcunapaj tucui congregacioncunapi ima shinami tucun,
34 chashnallataj huarmicunaca congregacioncunapica upalla saquirichun. Paicunaca congregacionpica mana parlanachu can. Ashtahuanpish Diospaj leypi nishca shinaca huarmicunaca alli cazujcunami cana can.
35 Imata yachasha nishpaca quiquin cusata huasipi tapuchun. Congregacionpi shuj huarmi parlanaca pingaimi.
36 ¿Cancunahuanchu Diospaj shimica callarirca? ¿Cancunallachu Diospaj shimitaca chasquircanguichij?
37 Maijanpish profeta cashcata yuyashpa o espíritu santomanta shuj regalota chasquishcata yuyashpaca, ñuca quillcashcacunaca Amitopaj mandashcacuna cashcatami yuyarina can.
38 Cai mandashcata mana yuyarijtaca Diospish paitaca mana yuyaringachu.*
39 Shinaca ñuca huauquicuna, Dios ima nishcata huillangapaj esforzarishpa catichij. Chꞌican chꞌican shimicunapi parlachunpish ama jarcaichijchu.
40 Tucuita alli ruraichij. Ama maipishcachun ruraichijchu.
Notacuna
^ O “Amén”.
^ “Jehová” shutita huasha diccionariopi ricui.
^ Caitaca “Cai mandashcata mana intindisha nijca manataj intindingachu” nishpapishmi traducishcacuna.
