1 Corintios 16:1-24
16 Cunanca Galacia llajta congregacioncunaman ñuca mandashca shinallataj cancunapish huauquicunapaj* cullquita tandaichij.
2 Ñuca chayajpi chai rato cullquita ama tandana tucuchunca, quiquin charishcamanta cada semana callari punllapi asha cullquita cada uno separachun.
3 Chaiman chayashpaca, shungumanta cancuna cushca cullquita saquinaman richunmi huaquin runacunata Jerusalenman cachasha. Chaipajca cartacunapi quillcashpa cancuna agllashca runacunatami cachasha.
4 Ñucapish chaiman rina cajpica paicunaca ñucahuanmi ringacuna.
5 Macedonia llajtatami pasagrini. Macedonia llajtata pasashca qꞌuipami cancunata visitanaman risha.
6 Tal vez cancunahuanmi asha tiempota saquirisha. Mana cashpacarin ñuca maiman ricushcaman cancuna ñucahuan ashata richunmi, tamya punllacuna pasangacama cancunahuan saquirisha.
7 Cancunata rato ricushpallaca mana pasasha ninichu. Ashtahuanpish Jehová* Dios munajpica cancunahuanmi asha tiempota saquirisha nini.
8 Chashna cajpipish Pentecostés fiestacamami Éfeso llajtapi saquirisha.
9 Cai llajtapica Diosta ashtahuan sirvingapajmi ñucapajca shuj jatun pungu pascarishca. Chashnapish achca contracunami tiyan.
10 Timoteo chayajpica cancunahuan cashpa ima manchaita ama charichun paita ayudanguichij. Paica ñuca shinallatajmi Jehová* Diospaj obrata ruracun.
11 Chaimanta paitaca ama pipish yangapi churachun. Ashtahuanpish ñucapajman alli tigrachun paitaca aviashpa cachanguichij. Ñucaca huauquicunahuanmi paitaca caipi shuyacuni.
12 Ñucanchij huauqui Apolostaca shujtaj huauquicunahuan cancunata visitanaman richunmi achca cutin mañarcani. Shinapish cunanca mana rinatami paica yuyarirca. Pai pudishca horasmi cancunata visitanaman ringa.
13 Rijcharishca caichij, crishcapi sinchi caichij, ama manchaichijchu,* sinchi caichij.
14 Tucui imatapish cꞌuyaihuan ruraichij.
15 Acaya llajtapica Estéfanas runapish, paipaj huasipi cajcunapishmi Jesusta punta catijcuna tucurca. Chaitaca cancunaca allimi yachanguichij. Paicunaca huauquicunatami* tucui shunguhuan ayudarcacuna. Cunanca huauquicuna caitami rogapani.
16 Chai laya runacunatapish, ñucanchijta tucui ayudajcunatapish, sinchita trabajajcunatapish cazupaichij.
17 Ñucaca Estéfanas, Fortunato, Acaico shamushcamantami cushicuni. Paicunami cancunapaj randi ñucataca achcata ayudashcacuna.
18 Paicunaca ñucatapish, cancunatapishmi animashcacuna. Chaimanta chai laya runacunamanca cꞌuyaita ricuchichij.
19 Asia llajtapi caj congregacioncunami cancunamanca saludocunata cachan. Aquilapish, Priscapish, paipaj huasipi tandanacuj huauqui panicunapishmi* Amito Jesushuan shuj shinalla cashcamanta tucui shunguhuan cancunataca saludancuna.
20 Tucui huauquicunami cancunataca saludan. Caishuj chaishuj chuya shunguhuan muchashpa saludanacuichij.
21 Pablomi cani. Cancunata saludangapajmi ñuca propio maquihuan quillcani.
22 Maijanpish Amito Jesusta mana cꞌuyajca llaquichishca cachun. ¡Ñucanchij Amito Jesús utca shamupailla!
23 Amito Jesusca yallitaj llaquij cashcata cancunaman ricuchichun.
24 Cristo Jesushuan shuj shinalla cashcamantami tucui cancunataca pai cꞌuyashca shinallataj cꞌuyani.
Notacuna
^ Griego rimaipica: “jucha illajcunapaj” ninmi.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ O “cꞌari cꞌari caichij”.
^ Griego rimaipica: “jucha illajcunatami” ninmi.
^ Griego rimaipica: “congregacionpishmi” ninmi.
