1 Juan 3:1-24
3 ¡Ricuichij, Diospaj huahuacunami canguichij nishpami Yayaca ñucanchijmanca achca cꞌuyaita ricuchishca! Ñucanchijca paipaj huahuacunatajmi canchij. Chaimantami cai pacha gentecunaca ñucanchijtaca mana rijsin. Paicunaca Diostaca mana rijsishcacunachu.
2 Cꞌuyashca huauquicuna, cunanca Diospaj huahuacunami canchij. Shinapish ñucanchij ima shina cana cashcataca manaraj ricuchishcachu. Pai ricurijpica pai ima shina cashcatami ricushun. Chaimantami ñucanchijpish pai shinallataj cana cashcata yachanchij.
3 Paica chuyami can. Maijanpish paipi shuyajca paillatajmi chuyayarin.
4 Juchata rurashpa catijca leytami mana cazun. Juchaca leyta mana cazunami.
5 Cancunapish ñucanchij juchacunata anchuchingapaj Jesús shamushcataca yachanguichijmi. Paipica ima jucha mana tiyanchu.
6 Maijanpish paihuan shuj shinalla cajca juchataca mana rurashpa catinchu. Maijanpish juchata rurashpa catijca paitaca mana ricushcachu, paitaca mana rijsishcachu.
7 Ñuca huahuacunalla, cancunataca pi ama pandachichun. Cashcata rurashpa catij runaca Jesús cashcata ruraj shinallatajmi cashcata ruraj can.
8 Juchata rurashpa catijca Diablomantami shamun. Diabloca callarimantami juchata ruracushca. Chaimantami Diospaj Churica Diablopaj ruraicunata tucuchingapaj shamurca.
9 Diospaj espíritu* paipi cashcamantami Diosmanta huacharijca juchata mana rurashpa catin. Paica Diosmanta huacharishca cashcamantami juchataca mana rurashpa cati tucun.
10 Diospaj huahuacunatapish, Diablopaj huahuacunatapish cashnami rijsi tucunchij: cashcata mana rurashpa catijpish, paipaj huauquita mana cꞌuyajpish Diosmantaca mana shamunchu.
11 Cancunaca callarimantami cai mandashcata uyashcanguichij: ñucanchijca caishuj chaishujmi cꞌuyanacuna canchij.
12 Caín shinaca mana canachu canchij. Paica Diablopaj* huahua cashpami paipaj huauquita huañuchirca. ¿Imamantataj huañuchirca? Paipaj ruraicunaca millai cashcamanta, cutin paipaj huauquipaj ruraicunaca alli cashcamantami huañuchirca.
13 Huauquicuna, cai pacha gentecuna cancunata pꞌiñajpipish ama mancharichijchu.
14 Ñucanchijca huauquicunata cꞌuyashcamantami huañushca shina cashpapish cunanca causacushcata yachanchij. Maijanpish mana cꞌuyajca huañushca shinami catin.
15 Maijanpish paipaj huauquita pꞌiñajca huañuchijmi. Cancuna yachashca shinaca ni maijan huañuchij runa huiñai causaitaca mana chasquingachu.
16 Jesucristo ñucanchijmanta paipaj causaita cushcamantami cꞌuyai ima cashcataca yachashcanchij. Chaimantami ñucanchijpish ñucanchij huauquicunamanta ñucanchij causaita cuna canchij.
17 Maijanpish causangapaj cai pachapi imallata charishpapish paipaj huauqui ima minishticujta ricushpa mana llaquishpaca, ¿Diostaca ima shinataj cꞌuyangayari?
18 Ñuca huahuacunalla, ama rimashcallahuan, jahua shimillahuan cꞌuyashunchijchu. Ashtahuanpish ruraicunahuan, tucui shunguhuan cꞌuyashunchij.
19 Chashnami mana llullamanta shamushcata yachashun. Ñucanchij shungupipish Dios ñucanchijta cꞌuyashcatami seguro cashun.
20 Ñucanchij shungu imamantapish juchachijpica Dios ñucanchij shunguta yalli cashcata, pai tucuita yachashcatapish yuyarishunchij.
21 Cꞌuyashca huauquicuna, ñucanchij shungu mana juchachijpica mana manchashpami Dioshuanca parlai tucunchij.
22 Pai mandashcata cazucushcamanta, pai munashcata ruracushcamantami tucui imata mañashcata paica cunga.
23 Diosca caitami mandan: paipaj Churi Jesucristopaj shutipi feta charichun. Pai ñucanchijta mandashca shinallataj caishuj chaishuj cꞌuyanacuchunmi mandan.
24 Ashtahuanpish Dios mandashcacunata cazujca Dioshuanmi shuj shinalla catin. Diospish paihuanca shuj shinallami catin. Shinallataj paipaj espirituta cushcamantami pai ñucanchijhuan shuj shinalla cashcata yachanchij.
