1 Juan 5:1-21
5 Jesús, Cristo cashcata crijca Diosmantami huacharishca. Maijanpish Yaya Diosta cꞌuyajca paimanta huacharishcatapish cꞌuyanmi.
2 Diosta cꞌuyashpa, pai mandashcacunata pajtachishpami Diospaj huahuacunata cꞌuyashcataca yachanchij.
3 Diosta cꞌuyashpatajca paipaj mandashcacunatami cazushun. Paipaj mandashcacunata pajtachinaca mana sinchichu.
4 Diosmanta tucui huacharishcacunaca cai pachatami mishan. Ñucanchij fehuanmi cai pachataca mishashcanchij.
5 ¿Pitaj cai pachataca mishai tucun? ¿Manachu Jesús Diospaj Churi cashcapi feta churaj runa mishai tucun?
6 Jesucristoca yacuhuan, yahuarhuanmi shamurca. Mana yacullahuanchu shamurca. Ashtahuanpish yacuhuan, yahuarhuanmi shamurca. Chaitaca mana llullata huillaj espíritu santomi huillan.
7 Jesús pi cashcataca quimsami huillan. Chaicunaca:
8 Diospaj espíritu, yacu, yahuarmi can. Quimsandijmi chaillatataj huillancuna.
9 Ñucanchijca runacuna huillashcatami chasquinchij. Shinapish Dios huillashcami chaitapish yalli can. Diosca paillatajmi paipaj Churimantaca huillacun.
10 Diospaj Churipi feta churaj runaca Dios huillashcatami paipaj shungupi chasquishca. Cutin Diospi feta mana churaj runaca Diostami llullapi churashca. Dios paipaj Churimanta huillashcatami paica mana crishca.
11 Chai huillaica caimi: Diosmi ñucanchijmanca huiñai causaita cushca. Chai causaica paipaj Churipimi.
12 Diospaj Churita chasquijca chai huiñai causaitami charin. Cutin Diospaj Churita mana chasquijca chai huiñai causaitaca mana charinchu.
13 Diospaj Churipaj shutipi feta churajcunaca huiñai causaitami charinguichij. Chaita yachachunmi caicunataca cancunaman quillcani.
14 Ñucanchijca Diospimi confianchij. Pai munashca shina imatapish mañajpica paica ñucanchijta uyanmi.
15 Ima mañashcatapish pai uyaj cashcata yachashpaca, paita mañashcamantami ñucanchij mañashcata chasquina cashcata yachanchij.
16 Maijanpish paipaj huauqui mana huañuiman apaj juchata ruracujta ricushpaca Diostami mañana can. Chaimi Diosca paimanca causaita cunga. Caica huañuiman apaj juchata mana rurajcunapajmi can. Shinapish shuj juchaca huañuimanmi apan. Chai laya juchata ruraj runamanta Diosta ama mañachun ninimi.
17 Tucui laya millaita ruranaca juchami. Shinapish shuj juchaca huañuimanca mana apanchu.
18 Ñucanchijca Diosmanta huacharij runa ima juchata mana ruracujtaca yachanchijmi. Paitaca Diospaj Churimi cuidan. Diablopish* imata mana rurai tucunchu.
19 Ñucanchijca Diospaj cashcatami yachanchij. Shinapish tucui cai pacha gentecunaca Diablopaj* maquipimi can.
20 Diospaj Churi shamushcatapish yachanchijmi. Paimi mana llulla Diosta rijsichun ñucanchijmanca intindichirca. Dioshuanca paipaj Churi Jesucristomantami shuj shinalla canchij. Diosca mana llulla Diosmi, huiñai causaitapish cujmi.
21 Ñuca huahuacunalla, rurashcalla dioscunamanta caruyaichij.
