1 Pedro 3:1-22
3 Chashnallataj huarmicunapish cancunapaj cusacunata cazuichij. Chashnami Diospaj shimita mana cazuj cusacunaca paicunapaj huarmicuna mana imata nijpipish tucuipi alli cajta ricushpa Diospaj shimita cazungacuna.
2 Paicunaca tucuipi alli cashcata, tucui shunguhuan respetaj cashcata ricushpami Diospaj shimita cazungacuna.
3 Ñahui ricuillapi ama allichirichun, ajchapipish ama tucui laya trenzacunata rurarichun, oromanta rurashca adornocunatapish, achca valij churanatapish ama churarichun.
4 Chaipaj randica paicunapaj ucu shunguta sumajyachichun. Chaimanta sumaj causaita, manso shungu canata churarichun. Cashna allichirinaca mana tucuringachu. Diospaj ñaupajpipish achca valishcami can.
5 Ñaupa punlla jucha illaj huarmicunaca chashnami allichirijcuna carca. Paicunapaj cusacunata cazushpami Diospi shuyajcuna carca.
6 Abrahanta Sara cazushca shinallatajmi cazujcuna carca. Saraca Abrahantaca amito nijmi carca. Cancunapish allita ruranata mana saquishpa, manchai mishachun mana saquishpaca Sarapaj ushushicunami canguichij.
7 Chashnallataj cusacunapish cancunapaj huarmicunata alli intindishpa* paicunahuan causashpa catichij. Huarmicunataca pꞌaquirinalla vasota shina cuidashpa alli nichij. Chashna rurajpimi cancuna mañashcata Dios uyachunca ima mana jarcanga. Dios yallitaj llaquij cashcamantami paicunapish cancunahuan herenciata shina causaita japingacuna.
8 Tucuimanta yallica, tucuicuna shuj shinalla yuyaichij,* llaquilla cajcunahuan llaquirichij, familia ucupi shina cꞌuyaita ricuchichij, shungumanta llaquijcuna caichij, humildecuna caichij.
9 Mana allita rurajpipish ama mana allita rurashpa tigrachichijchu. Rimajpipish* ama chashnallataj tigrachichijchu. Ashtahuanpish allicunata rurashpa tigrachichij. Chaipajmi cancunataca Diosca agllarca. Paimi cancunamanca allicunata cunga.
10 “Maijanpish causaita cꞌuyashpa, alli punllacunata charisha nishpaca mana allicunata paipaj cꞌalluhuan rimanatami jarcarina can. Paipaj shimihuan rimashpa umanamantapishmi jarcarina can.
11 Shinallataj mana allita ruranata saquishpa allita rurachun. Shujtajcunahuan sumajta causanata mashcashpa chashna causangapaj esforzarichun.
12 Jehová* Diospaj ñahuicunaca cashcata rurajcunatami ricucun, paicuna rogarishpa mañashcatapish paipaj rinrincunahuanmi uyacun. Shinapish mana allita rurajcunataca Jehová* Diosca mana ricunayachinchu”.
13 Shinaca allita ruranata munajpica, ¿pitaj cancunataca llaquichingayari?
14 Cashcata rurajcuna cashcamanta llaquita apashpapish cushicunguichijmi. Shinapish gentecuna manchashcataca ama manchaichijchu,* paicuna shina ama sustarichijchu.
15 Ashtahuanpish Cristotaca Amito cashcamanta cancunapaj shungupi jatunyachichij. Maijanpish cancuna shuyacushcamanta tapujpica alli cutichingapaj siempre allichirishca caichij. Shinapish manso shunguhuan, achca respetohuan cutichichij.
16 Diospaj ñaupajpi alli concienciata charishcata ricuchichij. Chashnami cancunapaj contra imata nijpipish Cristota catijcuna shina alli causacujta ricushpa cancunapaj contra rimajcunaca pingaipi saquiringacuna.
17 Mana allita rurashcamanta llaquita apanapaj randica Dios munajpica allita rurashcamanta llaquita apanami ashtahuan alli can.
18 Cristoca juchacunamantami shuj cutinlla huiñaipaj huañurca. Cancuna Dioshuan alli tucuchunmi cashcata rurajca cashcata mana rurajcunamanta huañurca. Paitaca aichapimi huañuchircacuna. Shinapish paica espiritupimi causaita chasquirca.
19 Espiritupi causaita chasquishpami paica prezupi caj espiritucunaman huillanaman rirca.
20 Chai espiritucunaca ñaupa Noepaj punllacunapimi mana cazurcacuna. Chai punllacunapica Noé shuj arcata ruracujpimi Diosca pacienciahuan shuyacurca. Chai arcapica asha gentecunallami* yacumanta quishpirirca. Paicunaca pusajcunallami carcacuna.
21 Chai punllacunapi ima tucushcataca bautismohuanmi chꞌimbapurai tucunchij. Jesucristo causarishcamantami cunanca bautismoca cancunata quishpichicun (bautismoca mana aichamanta mapata anchuchingapajchu. Ashtahuanpish alli concienciata charingapaj Diosta mañanami).
22 Jesucristoca jahua pachaman rishcamantami Diospaj alli ladopi can. Diosca angelcunatapish, autoridadcunata charijcunatapish, poderta charijcunatapish mandachunmi paitaca churarca.
Notacuna
^ O “considerashpa”.
^ O “chai shinallataj yuyaichij”.
^ O “Cꞌamijpipish”.
^ “Jehová” shutita huasha diccionariopi ricui.
^ “Jehová” shutita huasha diccionariopi ricui.
^ Caitaca “gentecuna manchachishcataca ama manchaichijchu” nishpapishmi traducishcacuna.
^ O “almacunallami”. “Alma” shimita huasha diccionariopi ricui.
