1 Reyes 17:1-24
17 Galaadpi saquirij Tisbemanta Eliasmi* Acabtaca: “¡Israelitacunapaj causaj Jehová Diospaj shutipimi jurani. Ñucaca paitami sirvini. Cai huatacunapica shulla tamyapish, tamyapish mana tiyangachu. Ñuca mandajllapimi tiyanga!” nirca.
2 Jehová Diosca Eliasmanca cashnami nirca:
3 “Caimanta llujshishpa inti llujshin ladoman ri. Jordán inti llujshin ladopi saquirij Kerit pugru pamba cꞌuchullapi miticugri.
4 Chaipica larcamantami yacuta ubyangui. Micunata chaiman apachunpish cuervocunatami* cachasha” nircami.
5 Eliasca chai rato rishpami Jehová Dios nishca shina rurarca. Pai rishpaca Jordán inti llujshin ladopi saquirij Kerit pugru pamba cꞌuchullapimi saquirirca.
6 Cuervocunaca tutamanta ladomi Eliaspajca tandata, aichata apamujcuna carca. Chishi ladopishmi tandata, aichata apamujcuna carca. Paica larcamantami yacuta ubyaj carca.
7 Asha punllacuna qꞌuipaca chai llajtapi mana tamyajpimi larca yacuca chaquirirca.
8 Chaimi Jehová Diosca Eliastaca cashna nirca:
9 “Sidonpi saquirij Sarepta llajtaman rishpa chaipi saquiri. Canman micunata carachunca shuj viuda huarmitami mandasha” nircami.
10 Chashna nijpimi Eliasca Sarepta llajtaman rirca. Chai llajtaman chayashpaca shuj viuda huarmi yantata pallacujtami ricurca. Chai huarmita cayashpami Eliasca: “Ñuca ubyangapaj shuj vaso yacuta apamupai” nirca.
11 Chai huarmi yacuta apanaman rijpimi paita cayashpaca: “Shuj pedazo tandatapish apamupai” nirca.
12 Chashna nijpimi chai huarmica: “Causaj cambaj Jehová Diospaj shutipimi jurani. Ima tandata mana charinichu. Jatun pꞌundupica* maqui junda harinallatami charini, cutin uchilla pꞌundupica asha aceitellatami charini. Ñucapajpish, ñuca huahuapajpish imallatapish yanungapajmi cai ratoca asha yantata pallacuni. Chai último micuita micushca qꞌuipaca huañushunllami” nirca.
13 Chaimi Eliasca paitaca cashna nirca: “Ama manchaichu. Can imata rurasha nishcata rurangapaj yaicuilla. Pero puntaca ima tiyashcahuan shuj uchilla redondo tandata rurashpa cai canllaman ñucapaj apamui. Chai qꞌuipaca cambajpish, cambaj huahuapajpish imata preparanguillami.
14 Israelitacunapaj Jehová Diosca: ‘Cai allpapi Jehová Dios tamyachingacama jatun pꞌundupi tiyaj harinaca mana tucuringachu, uchilla pꞌundupi tiyaj aceitepish mana tucuringachu’ ninmi” nircami.
15 Chaimi chai huarmica Elías nishcata rurarca. Chashna rurashcamantami Eliaspish, chai huarmipish, huarmipaj familiapish achca punllacunapaj micunata charircacuna.
16 Jehová Dios Eliasman huillachishca shinami jatun pꞌundumanta harinapish mana tucurirca, uchilla pꞌundumanta aceitepish mana tucurirca.
17 Tiempohuanca huasi dueñapaj churica ungushpa, anchayashpami huañurca.
18 Chaimi chai huarmica Eliastaca: “Diosta sirvij runa, ¿cantaca ima dañotataj rurashcaniyari? ¿Culpayuj cashcata yuyachingapaj, ñuca huahuata huañuchingapajchu shamushcangui?” nirca.
19 Pero Eliasca: “Cambaj huahuata apamui” nircami. Chaimi mamapaj rigramanta japishpa, pai maipi saquiricushca cuartoman apashpa paipaj propio camapi sirichirca. Chai cuartoca terrazapimi carca.
20 Paica Jehová Diostaca: “Ñuca Jehová Dioslla, ¿ñucaman pozadata mañachij huarmipaj huahuata huañuchishpachu paitapish sufrichingui?” nishpami mañarca.
21 Chaimantaca huahuapaj jahuapi quimsa cutin siririshpami Jehová Diostaca: “Ñuca Jehová Dioslla, cai huahuapaj causaita tigrachipai” nishpa mañarca.
22 Jehová Diosca Elías mañashcatami uyarca. Chaimi huahuataca causachirca.
23 Eliasca huahuata apashpami terrazapi caj cuartomanta uriyashpa huasiman yaicurca. Huahuataca mamapajman apashpami: “Ricui, cambaj huahuaca causacunmari” nirca.
24 Chaita ricushpami chai huarmica Eliastaca: “Canca Diosta sirvij cashcata, Jehová Dios nishcacunata can huillashcapish cierto cashcataca cunanmi yachani” nirca.
Notacuna
^ “Elías” shutica ‘ñuca Diosca Jehovami’ nisha ninmi.
^ Cuervoca shuj jatun yana pajaromi can.
^ O “puñupica”.
