1 Reyes 19:1-21
19 Chai qꞌuipami Acabca Elías imalla rurashcata, tucui profetacunata espadahuan ima shina huañuchishcata Jezabelman parlarca.
2 Chaimi Jezabelca shuj huillajta Eliaspajman cachashpaca: “¡Can huañuchishca profetacunata shinallataj caya cai horaspaj cantapish mana huañuchijpica dioscuna ñucata sinchita castigachun!” nirca.
3 Eliasca achcata manchashcamantami paipaj causaita quishpichingapaj miticushpa rirca. Judapi saquirij Beer-Sebaman chayashpami paita ayudajtaca chaipi saquirca.
4 Chaquishca pambata shuj punllata purishpami shuj retama yuraman chayashpa chai yura ucupi tiyarirca. Chaimantaca huañunata munashpami: “¡Ña mana ahuantanica! Jehová Dioslla, ñuca causaita* quichuhuailla. Ñucaca ñuca ñaupa yayacunata yallica mana canichu” nirca.
5 Chai qꞌuipaca siririshpami retama yura ucupi dormirirca. Pero ñapish shuj ángel shamushpami paita tuparishpaca: “Jatari, imallatapish micui” nirca.
6 Pai jatarishpaca paipaj uma ladopi cunujlla rumicuna jahuapi shuj redondo tanda tiyacujta, shuj jarra yacu tiyacujtami ricurca. Chaimi paica tandata micushpa, yacuta ubyashpaca cutin dormirirca.
7 Jehová Diospaj ángel cutinllataj shamushpa, paita tuparishpaca: “Jatari, micui. Achcata viajanarajmi cangui” nircami.
8 Chashna nijpimi Eliasca jatarishpa micurca, ubyarca. Chai micuita micushpami Diospaj Horeb urcuman chayangacama 40 punllacunata, 40 tutacunata puringapaj fuerzata charirca.
9 Chaipimi chai tuta samaringapaj shuj jutcuman yaicurca. Ñapishmi Jehová Diosca: “¿Elías imatataj caipica ruracungui?” nirca.
10 Eliasca: “Jahua pacha soldadocunata mandaj Jehová Diostaca tucui shunguhuanmi sirvishcani. Israelitacunaca canhuan ari ninacushcatami saquishcacuna. Shinallataj cambaj altarcunatami urmachishcacuna. Cambaj profetacunatapish espadahuanmi huañuchishcacuna. Ñucallamari saquirishcani. Cunanca ñucatamari huañuchisha* nincuna” nircami.
11 Pero Diosca: “Caimanta llujshishpa cai urcupi Jehová Diospaj ñaupajpi shayari” nircami. Jehová Diosca chaitami pasacurca. Shuj sinchi huairami urcucunatapish chaupicurca, cꞌacacunatapish Jehová Diospaj ñaupajpi ñutushpa urmachicurca. Pero Jehová Diosca mana chai huairapi carcachu. Huairapaj qꞌuipaca shuj terremotomi tiyarca. Pero Jehová Diosca mana chai terremotopi carcachu.
12 Terremotopaj qꞌuipaca ninami ricurirca. Pero Jehová Diosca mana chai ninapi carcachu. Ninapaj qꞌuipaca allijlla rimashcami uyarirca.
13 Eliasca chai rimashcata uyashpaca chai ratomi paipaj ropahuan ñahuita taparirca. Chaimantaca canllaman llujshishpami jutcu yaicunpi shayarirca. Chaipimi rimashca uyarishpaca: “¿Elías imatataj caipica ruracungui?” nirca.
14 Eliasca: “Jahua pacha soldadocunata mandaj Jehová Diostaca tucui shunguhuanmi sirvishcani. Israelitacunaca canhuan ari ninacushcatami saquishcacuna. Shinallataj cambaj altarcunatami urmachishcacuna. Cambaj profetacunatapish espadahuanmi huañuchishcacuna. Ñucallamari saquirishcani. Cunanca ñucatamari huañuchisha nincuna” nircami.
15 Jehová Diosca cashnami nirca: “Tigrai, Damasco chaquishca pambaman ri. Chaiman chayashpaca Siriapi rey cachun Hazaelta agllangui.
16 Israelpi rey cachunca Nimsipaj nieto Jehuta agllangui. Cambaj randi profeta cachunca Abel-Meholamanta caj Safatpaj churi Eliseota* agllangui.
17 Hazaelpaj espadamanta quishpirijtaca Jehumi huañuchinga. Jehupaj espadamanta quishpirijtaca Eliseomi huañuchinga.
18 Israelpica 7.000 runacuna tiyanrajmi. Paicunaca Baalta adorangapaj mana cungurishcacunachu, paitaca mana muchashcacunachu” nircami.
19 Chaimi Eliasca chaimanta rishpa Safatpaj churi Eliseohuan tuparca. Eliseoca allpapimi yapucurca. 12 yunta huagracunami yapucurca. Paica último yuntahuanmi caticurca. Eliasca paipajman cꞌuchuyashpami paipaj ropata Eliseopaj jahuapi churarca.
20 Eliseoca huagracunata chaipi saquishpami Eliasta catishpa callpashpa rirca. Eliseoca: “Ñuca yayata, ñuca mamata muchashpa minchacama ningacama saquihuai. Chaimantaca canta catishallami” nircami. Chaimi Eliasca: “Tigrailla, ñucaca mana jarcacunichu” nirca.
21 Chashna tigrashpaca ishqui huagracunata apashpami huañuchirca. Yapucushca arado caspicunahuan, yugo caspicunahuanca huagracunapaj aichatami yanurca. Chaita gentecunaman carajpimi paicunaca micurcacuna. Qꞌuipaca chaimanta rishpami Eliasta catishpa paita sirvi callarirca.
Notacuna
^ O “almata”.
^ O “ñuca causaitami quichusha”.
^ “Eliseo” shutica ‘Diosca quishpichijmi’ nisha ninmi.
