1 Samuel 1:1-28
1 Ramataim-Zofimpica* Efrainpaj familiamanta Elcaná shuti runami causarca. Cai lugarca Efraín urcucunapimi saquirirca. Elcanaca Jerohampaj churi, Jerohamca Elihupaj churi, Elihuca Tohupaj churi, Tohuca Zufpaj churimi carca.
2 Elcanaca ishqui huarmicunatami charirca. Shujca Ana shutimi carca. Caishujca Peniná shutimi carca. Peninaca huahuacunatami charirca. Pero Anaca ni shuj huahuata mana charircachu.
3 Tucui huatacunami Elcanaca jahua pacha soldadocunata mandaj Jehová Diosta adorangapaj,* paiman sacrificiocunata cungapajpish paipaj llajtamanta Siló llajtaman huichiyaj carca. Chaipimi Hofnipish, Finehaspish Jehová Diospaj sacerdotecuna shina sirvijcuna carca. Paicunaca Elipaj ishqui churicunami carca.
4 Shuj punllaca Elcanaca shuj sacrificiotami curca. Chai sacrificiota rurashca partecunataca Peninaman, Peninapaj churicunaman, ushushicunamanmi curca.
5 Elcanaca Anataca achcatami cꞌuyarca. Chaimantami sacrificiomanta shuj alli parteta Anaman curca. Shinapish Jehová Diosca Anamanca huahuacunataca mana cushcachu carca.
6 Jehová Dios Anaman huahuacunata mana cushcamantami Elcanapaj shujtaj huarmi Peninaca Anata mana alli sintichingapaj siempre paimanta burlarij carca.
7 Huatan huatanmi Anataca chashna mana alli sintichij carca. Jehová Diospaj huasiman Ana huichiyajpipish Peninaca* paimantami burlarij carca. Chaimi Anaca huacashpa imata mana micuj carca.
8 Shinapish Anapaj cusa Elcanaca: “Ana, ¿imamantataj huacangui? ¿Ima nishpataj mana micungui? ¿Imamantataj yallitaj llaquilla cangui? ¿Manachu ñucaca chunga churicunatapish yalli ashtahuan alli cani?” nircami.
9 Siló llajtapi micushca, ubyashca huashami Anaca chaimanta jatarishpa rirca. Chai ratomi sacerdote Elica Jehová Diospaj huasi* pungu cꞌuchupi shuj tiyarinapi tiyacurca.
10 Anaca yallitaj llaquilla cashpami Jehová Diosta mañai callarirca. Huacanatapish mana saqui tucurcachu.
11 Chashna mañacushpami Anaca caita ruranata ari nirca. Paica: “¡Jahua pacha soldadocunata mandaj Jehová Dioslla! Ñuca achcata sufricushcata ricuhuayari. Jehová Dioslla, canta sirvijta yuyarijpi, ñucata mana cungarijpi, ñucaman shuj cꞌari huahuata cujpica pai canta tucui causaipi sirvichunmi canman cusha. Paipaj uma ajchapish mana rutushca cangachu” nircami.
12 Anaca chaipimi Jehová Diosta unita mañacurca. Chashna mañashpa paipaj shimita ima shina cuyuchicujtami Elica ricurca.
13 Anaca paipaj shungu ucupimi Diosta mañacurca. Paipaj shimipish chujchucurcami. Pero pai ima rimashcaca mana uyarircachu. Chaita ricushpami Elica Ana machashca cashcata yuyarca.
14 Chaimi Elica: “¿Ima horacamataj machashca catinguiyari? Vinota ubyanata ña saqui” nirca.
15 Chashna nijpimi Anaca cashna nishpa cutichirca: “¡Mana, ñuca amito! Ñucaca ni vinota, ni shujtaj laya tragocunatapish mana ubyashcanichu. Ñucaca yallitajmi sufricuni. Chaimantami ñuca shungupi ima shina sintirishcata Jehová Diosman huillacuni.
16 Ñucataca imapaj mana valij huarmita shinaca ama ricuichu. Ñucaca yallitaj llaquilla cashcamanta, yallitaj sufricushcamantami caipica achca tiempota chashna mañacushcani” nircami.
17 Chashna nijpimi Elica: “Ama preocuparishpa tranquila rilla, israelitacunapaj Dios can mañashcata cutichichun” nirca.
18 Shina nijpimi paica: “Canta sirvijmantaca allita yuyahuangui” nirca. Chai qꞌuipaca chaimanta rishpami micurca. Paipaj ñahuipish ña mana llaquilla carcachu.
19 Cayandij punlla utca jatarishpaca Jehová Diosta adorashca huashami Ramapi caj paicunapaj huasiman tigrarcacuna. Chaimi Elcanaca paipaj huarmi Anahuan chayarirca. Jehová Diospish Anamantami yuyarirca.
20 Chaimi Anaca chichu saquirirca. Huata manaraj pajtajpimi shuj cꞌari huahuata charirca. Anaca: “Jehová Diostamari mañarcani” nishpami chai huahuataca Samuel* nishpa shutichirca.
21 Tiempo qꞌuipaca Elcanaca paipaj tucui familiahuanmi cada huata Jehová Diosman cuna sacrificiotapish, Diosman cusha nishca ofrendatapish* cungapaj huichiyarcacuna.
22 Anaca paipaj cusamanca: “Huahuataca chuchumanta raquishca huashallami Jehová Diospaj huasimanca apasha.* Chai punllamantami paica chaipi saquiringa” nircami. Chashna nishpami Anaca paicunahuanca mana rirca.
23 Paipaj cusa Elcanaca: “Cambaj alli cajpica* chaita rurailla. Huahuata chuchuchinata saquingacama caipi saquirilla. Jehová Dios can imata nishcata pajtachichun” nircami. Chaimi paica huasipi saquirirca. Paipaj huahuata chuchumanta raquingacamami chuchuchishpa catirca.
24 Huahuata chuchumanta raquishca qꞌuipami huahuahuan Siló llajtaman huichiyarca. Shinallataj quimsa huatata charij torota, 24 libra yalli* harinata, shuj jatun jarra vinotapishmi apashpa huichiyarca. Chashnami paica huahuahuan Siló llajtapi caj Jehová Diospaj huasiman chayarca.
25 Chai qꞌuipaca torota huañuchishpami huahuatapish Elipajman aparcacuna.
26 Paica Elimanca cashnami nirca: “¡Ñuca amito, quishpichihuai! Ñuca amito, cambaj cꞌuchupi Jehová Diosta mañaj huarmica ñucamari cani.
27 Cai huahuata cuchunmi Jehová Diosta mañarcani. Paica ñuca mañashcatami curca.
28 Cunanca ñucaca cai huahuataca Jehová Diosmanmi cuni.* Paica huañungacamami Jehová Diospaj canga” nircami.
Chashna nijpimi Elcanaca Jehová Diospaj ñaupajpi cumurirca.
Notacuna
^ O “Ramá llajtapica, shuj zufita”.
^ O “Diospaj ñaupajpi cumuringapaj”.
^ O “shujtaj huarmica”.
^ Caipica Diospaj carpa huasimantami parlacun.
^ “Samuel” shutica ‘Diospaj shuti’ nisha ninmi.
^ “Diosman cusha nishca ofrenda” shimita huasha diccionariopi ricui.
^ Hebreo rimaipica: “Jehová Diospaj ñaupajpi ricurichun apasha” ninmi.
^ Hebreo rimaipica: “Cambaj ñuahuipi alli cajpica” ninmi.
^ Hebreo rimaipica: “shuj efá” ninmi. Ayuda B14-ta ricui.
^ Hebreo rimaipica: “mañachini” ninmi.
